Testimony

C.Lalmuankima

Newcastle UK

Photo : Google Image

Vawiin ka gym kal chu ni dang ang lo takin hun ka hmang a, ka hlim hle a ni. Thil dang ni lovin gym a ka infiam zo chu rei lo te ka chawl a, tichuan male changing room lam ka pan nghal a; ka inthlak a, shower luh hmain sauna/steam leh jacuzzi a inchiaha hun ka hman mek laiin ka rilruah 'rilrua tawngtai' a lo lang ta tlat mai a; chu thu lo chu tiin ka rilruah ka tawngtai ta a, ka hriat loh hlanin ka mit ka lo chhing reng mai a; ka ban hial ka lo phar chhuak ta a....! Khawvel hmun hrang hranga awmte tan tawngtaina maicham ka hun hnuin khawvel hmun hrang hranga rawngbawltute leh mission rawngbawlna field tan te, tunhnaia France rama thil thleng rapthlak tak thlengin tawngtaina maicham ka hung thei a, ka rilru awm a nuamin a hlim em em a, ka tan chuan hun chhinchhiahtlak tak a ni chiang mai le. (Darkar khat dawn hun ka lo hmang reng mai.... sauna/steam leh jaccuzi a rawn kal te ngaihah chuan a atthlak viau mai thei a ni.)

Chutia ka rilrua tawngtaina ka hman zawh hnu chuan ka rilruah thil pakhat a rawn lang hlawl mai a. Chu chu engnge tih chuan, rawngbawltute thu sawi ka ngaihthlaka ka benga ka lo ngaihthlak fo leh mite lehkhabua an ziak 'khawi hmun pawh hi Pathian min pawlna a ni thei a ni, Pathian min pawlna hmun a nih chuan kan tan hmun thianghlim a ni a, Pathian nena kan inbiak pawhna hmun apiang hi hmun thianghlim a ni' tih hi a awmzia ka hre thiam tan ta chiah a ni....! Midang tan chuan thil ho tak a ni thei ang a, kei ka tan erawh chuan testimony ka chang thar ve tlat mai le; sawi chhuah loh atan ka ui em a, thiam lo chung chungin ka rawn sawi chhuak ve a ni e.

Kristian thalai chu a taima tur a ni (Johana 5:17; Ephesi 4:28; I Thessalonika 3:10 )

C.Lalmuankima

Newcastle

United Kingdom

Ram ropui tehna chi khat chu 'hausakna' hi a ni awm e. Chu hausaknaa ropui leh zah kai tur chuan kha ram kha a taihmak hmasak phawt a ngai a, chu taihmakna chuan hlawhtlinna a thlen ta thin a; taihmakna tel lovin ram ropui leh thiltithei a din theih loh a ni.

Photo : Google Image

Thufing pakhat chuan, "Mi that chhe tan nitin mai hi awl ni a ni" a ti a, "Mi taima tan erawh chuan nitin mai hi thawh ni a ni." a ti ve thung a. He thufing hi tha ka ti hle mai. Mi that chhe tana nitin mai hi awl ni a nih laiin mi taima tan erawh nitin mai hi thawh ni a lo ni si a. Mi that chhia chuan a hma khua a ngai ngai lo va, a tawpah a tawrh phah thin. Mi taima erawh chuan a hma khua a ngai thin a, harsatna a lo thlen huna a do zawh dan a lo zir lawk thin. Taihmakna hmelma lian ber mai chu that chhiat hi a ni a, that chhiatna chuan hlawhchhamna a hring chhuak thin.

Hnam Lungphum Thalaite

 Martin L. Chhakchhuak

Newcastle

United Kingdom

 

Lungphum nghet pawimawhzia hi in hrilhfiah leh chuan ngai lovin kan hre tlang vek awm e, Lungphum nghet a awm loh chuan a chungah in tha leh ropui tak tak te a sak theih loh va, lungphum a ngheh tawk loh chuan miin an lo sak sa pawh a hnuk chim leh thin. Chutiang bawkin hnam lungphum a ngheh loh chuan ram leh hnamin a tawrh phah thin a, a tawpah ram leh hnam chhiat rupna a thleng ta thin a ni.

Photo : Google Image

 

Ram leh hnam lungphum innghahna hi Thalaite ah thui tak a innghat a, Thalaite hi ram leh hnam siamthat thu ah te, venhim thu ah te, tihchangkan leh tihhmasawn kawngah te a thawh hlawk ber ber te zinga mi an ni a, Thalaite ke penna lam apiang chu khawvel nih phung leh nih dan tur emaw tih tur khawvel hian kan zui dul dul ta a nih ber hi maw......!

 

Hmanlai kan Mizo pipute nun hlui kha han thlir let lawh teh ang. Thalaite ah an innghahzia kan hmu thei a ni. Entirnan : Khawtlangah sa a tlakin emaw ral khel dar (raldo) a lo rikin emaw thalai rual te chuan mahni awm hmun atangin Zawlbuk lam an pan khawm a, chutah Val Upate nen ral khelh dan tur an rel ho thin a, sa hrang leh ral lakah khawtlang an lo chhanhim ta thin a nih kha. Thalaite hi sa hrang leh ral laka ram leh hnam inhumhimna kulhpui an ni a, an tel lovin khawtlang a him lo a ni.

Kohhran leh chanchin tha hril (Mission)
(Tirhkohte 1:8; 10:36; Marka 16:15; Matthaia 28:19; Rom 10:13-15.)
C. Lalmuankima
Newcastle, United Kingdom

Lal Isua he khawvela a hringnun a chan laia a ngaih pawimawh leh thupui ber mai chu Chanchin Tha hril hna a ni a, chanchin tha avanga mi zawng zawngin nun an neih theihnan (Johana 3:15) a nunna hial pawh kraws lerah mualpho taka khenbeha thlan thuk thim taka phumin a lo awm a, ni thum niah kaih thawhin a awm leh ta a nih kha...!

Photo : Google Image

D.L.Moody - a thu sawi ka duh em em pakhat a awm a, engnge kan tih chuan,"Ka thil hriat zawng zawngah Chanchin Tha hi a tha ber a, chuvangin thil hi ka sawi dawn a nih chuan chanchin tha hi ka sawi tam ber tur a ni." a tih hi a ni. Tha ka va ti tak em...! Keini hi engnge kan an ve le..? Kan ka atang hian chanchin tha hi a chhuak tam ve reng em? Chanchin Tha aiin mite hmuhsit leh tawngkam bawlhhlawh /mawi lo leh mite chhiatna lai sawi nuam tia relna tawngkam kan lo chhak chhuak fo thin te a ni lo maw...? In enfiah a va tha em......

Pathian hna pawimawh ber mai chu khawvel zawng zawngah kala chanchin tha hril a ni (Marka 16:15) kan tih tawh kha. Hei hi thupek a ni a, thupek reng reng chu tih ngei ngei tur a ni. Amaherawhchu khawvel zawng zawngah kalin kan fang chhuak thei kher lo mai thei. Mahse kan sum leh pai hmang te hian chanchin tha erawh kan hril ve thei a ni. Mission field ah kalin kan hun pumpui kan hmang thei lo a nih pawhin kan sum leh pai leh tawngtaina hmang pawhin chanchin tha hi kan hril thei a ni tih hi i hre thar leh ang u.

Good morning Lalpa

C.Lalmuankima

Newcastle, United Kingdom

Chu pa chu 'good morning Lalpa' tih ngawt mai chu sawi tur a va hre lo tak em....in ti mai thei. In thlirna zawn atang chuan a dik viau vang.

Photo : Google Image

Rawngbawltu pakhat thu sawi ka hriat reng mai hi a awm a. "Pathian be hmasa lovin thil dang ka ti hmasa lo vang, midang ka be hmasa lo vang" a tih tawngkam hian ka rilru a hneh hle a, chu thil tha chu zawm ve ngei tumin 'good morning Lalpa' or 'Lalpa chibai le' tih hi ka rilruah a lo lian ve ta hle a ni. Chumi ka hriat atang chuan ka theih ang tawka tamin zawm ka han tum ve ringawt a, a lo awlai lo khawp mai. Zawh loh nghawngkawlah mahni leh mahni ka inbarh lut a ni ta ringawt mai lawm ni tih te ka ngaihtuah let hnu hnawh a.

Sam 139 atanga zirlai pawimawhte
C. Lalmuankima
Newcastle, United Kingdom

 

He Sam 139 hian sawi a hlawh hle mai a, he Bible bung leh chang atang hian zir tur pawimawh tak tak te kan nei tih chu a hriat a ni. Sam 139 pumpuiah hian Pathian chu engkimtithei leh engkim mai hria a nihzia te, a enkawl zui zelzia te leh khawi hmuna pawh awm, a lak atanga tlanbona awm miah lo, amah chu khawi kipa awm Pathian a nihzia te kan hmu a. Sual erawh chu huain Sam ziaktu ngei pawhin a huat ve thu te, engkim chunga thunei, engkimtithei, ropuinaa khat leh thiltihtheihnaa khat a nihzia kan hmu bawk a ni.

 

Bible mithiamte chuan Sam 139 pumpui hi then thum emaw then li emaw in an then a, tun tumah hian then lia an then hmangin ringtu nun zir ho kan tum dawn a ni.

Photo : Google Image

Ka mi ngaihsan zawng (Bible thlirna atangin....)

Photo : Google Image

C.Lalmuankima

Newcastle, United Kingdom

 

Khawvelah hian mi ropui tak tak te, mi nei nung leh hausa, mi thil tithei tak tak te, mi chak fing tak tak ram leh hnam tana mi hratkhawkheng te, mi ropui tlawmngai leh chhuanawm, entawntlak tak tak te an awm a. Chung mi te chu an ngaihsanawmin an chhuanawm tak meuh meuh va, amaherawhchu mi mal tin ten kan ngaihsan zawng te chu a in ang vek kher lo mai thei a ni. Kristian kan nih angin Kristian thlirna (Biblical view atangin thlir dawn ila....) atanga thlirin kan nitin nuna kan entawn fo tura ka duh leh ka mi ngaihsan zawng te chu a hnuaiah hian ka han tarlang ang e. Heng mite nun hi a awhawm mai ni lovin an ngaihsanawmin an chhuanawm a, an entawntlak tel bawk. An nun atang hian ringtuten zir tur tam tak kan nei a ni.

 

 

Abrahama

 

Abrahama angin Pathian i ring ngam ang u (Genesis 12:1-7) Abrahaman Pathian kohna a chan khan, "LALPA, chumi chu ka va ti phawt ang e, khami kha ka va ti phawt ang e, ka unaute ka va hrilhin thlahna ka va siam phawt ang e," a ti reng reng lo. Amah koh tu Pathianah a chiang a, a kalna tur lam pawh hre hawt lovin a kohtu Pathian chu a ring a, a zui nghal tawp a ni. A rin Pathian ngei chuan a tithlawn dawn lo tih a hrechiang a, chu a rin Pathian ngei chuan ama felna ah ruatsakin a lo awm ta a ni. Keini hi engnge kan an ve le...? Min kohtu Pathian khi kan hrechiang em? Hrechiang hlei lo hian miten an zui/biak avangin kan lo zui/be ve tawp a ni ang e. Sakhaw rawng bawl hi awl deuh mai a nia. Sakhaw rawng hi kan bawl ang a, min kohtu Pathian rawng bawl lo hian kan awm palh ang tih a hlauhawm hle a ni. Pathian rawng bawl tel lo hian sakhaw rawng hi thui tak a bawl theih a ni.

"To achieve something you've never had before, you must do something you've never done before....."

You earn your body...... 💪💪💪

Photo : Google Image

Hriselna tha neih hi a pawimawh a, hriselna tha neih a pawimawhzia hre mah ila; hrisel tur leh hriselna tha nei tura insawizawi erawh a harsa hle thung. Hriselna hi Pathian thilpek hlu ber te zinga mi a ni a, chumi enkawl chhunzawm tur erawh chuan nangmah ngei i chet chhuah a ngai a ni.

Hriselna tha nei tur hian ei in tui tui leh ei tur tha tha te ei thei mah ila, insawizawi leh a enkawlna lamah kan inthlahdah leh si chuan kan taksa hi awm ze nei lo leh bawrhsawmna khurah kan nawr liam thei bawk. Chuvangin hriselna tha nei tur hian ei in chauh a pawimawh lo va, taksa insawizawina tha neih hi a pawimawh tel a ni. Chu mai ni lovin rilru sawizawina neih tel a pawimawh bawk. Chumi pathum tang kawp a hma i lak phawt chuan a tlo fat tawh mai a, hmuh theihin a rah chhuah i ei thei ang.

Lalpaah i tlan lut thin ang u

C.Lalmuankima

Newcastle, United Kingdom

Nimin 5th September 2015 (inrinni) khan thil mak deuh mai ka hmu ve tlat mai pek a, (thenkhat tan chuan a ho viau vang a) mahse ka tan chuan thil mak ve deuh a nih avangin ka han share ve teh ang.

Photo : Google Image

Ka inluahpui (room leh lama mi...a hming chu ka sawi lo mai ang a...) hian ka tuk tho kitchen lama breakfast ka siam mawlh mawlh laiin mangang lungchhe tak mai hian min rawn pan a, good morning hlei thei lo khopin a rilru a mangang a, a lungngai a ni. Naupang tap leh Hmeichhe mangang lungchhiatthlak taka tap hi ka lo hmu ve fo tawh thin a, patling (tlangval) lungchhiaa tap erawh ka lo hmuh ngai meuh loh avangin ka rilru a khawih hle mai a, (video/movie ah te chuan hmu ve bawk thin mah ila, hmaichhana hmuh nen chuan a dan a dang kher mai.....) tichuan ka han zawt chiang a, ni hnih kal ta khan medical report lamah a pum lam chianlohna endoscopy (kawchhung lam en ngai....) khopa a awm avanga lungngai leh a ekah thisen a tel thu hi niin. A mangangin a mitmeng te hi a dul ruih a, ka thiam ang tawk chuan ka han thlamuan ve a, tichuan a darah kut nghatin ka tawngtaisak nghal a......A rilru hahna chu tawk fang chu a chhawk zangkhai ta a......

Ka han sawi tum tak zawk chu..... kan awmna hmun theuhvah hian kan chheh vela thil thleng leh kan nuna thil thlengah hian chanchin chhia kan dawn/hmuh chang a awm thin, (mihring kan la ni miau si a, chanchin thalo hriat chang kan nei thin ang....) chutih hunah chuan Lalpaa kan tlan luh vat hi a lo pawimawh ber dawn a ni tih hi ka sawi uar duh hle a ni. Lalpaa kan tlan luh phawt chuan a ni chuan kan harsat, manganna te leh kan phur te min chhawk zangkhai turin a inpeih reng a, a hnena pek mai leh a chunga nghah mai hi kan tih tur hmasa ber chu a ni. Chuti lova mahnia chin fel kan tum chhung chuan kan nun hi a thlamuang thei chuang lo vang. Hmelma lah hi a fing em em mai si a, thu dik zat ve hmangin mi rawn thlem leh ang a; a ni dawn tak e tiin khawvel lam thilah kan rilru kan pe leh ang a, thu dik tluan tling ni lo na na na chu a tawpah lungngaihna min siamsaktuah a chang leh dawn a ni. Chuvangin mihring kan nih chhung chuan kan chunga thil lo thleng te hi (a bik takin harsatna, lungngaihna, manganna....) keini chuan kan dang zo lo vang, mahse a lo thleng chung chung pawha Lalpaa kan tlan luh phawt chuan heng harsatna zawng zawng hi a chinfel dan a lo awm zawk a ni.

LALPA chunga lawmna chu chakna
(Neh 8:9,10; Sam 4:7; 1:2; Heb 3:17-18; I Thes 5:16-22; Phil 4:4;)

C.Lalmuankima

Newcastle, United Kingdom

Photo : Google Image

Bible-ah hian 'Lawmna' tih thu mal hi hmuh tur a awm nual a, a bik takin LALPA A lawmna, LALPA avanga lawmna, LALPA chunga lawmna leh adt...a ni deuh zel a; kan thupui sawi tum pawh chu ti lam hawi zawng chuan sawi kan tum dawn a ni. 'Lawmna' tih thu mal hian pawimawhna riau a nei a, mihring kan nih chhung chuan kan tlansan theih hauh loh tur, kan nuna bet tel tlat, mahse pawimawh em em si a ni. Lawmna hi a chi neuh neuh va kan then dawn chuan then hran tur tam tak a awm thei ang a, kan thu sawi tum a fiah lehzual theihnan chi hnihin then hran kan tum dawn a ni. Lei lam thila lawmna (LALPA tel loa lei lawmna ) tih leh LALPA A lawmna....tiin.

'Lawm' han tih hian LALPA tel miah lo pawhin he khawvel thilah hian a lawm theih teh meuh a. Mahse lawmna ze dik leh tluantling a nih tlat loh avangin a rah chhuah erawh a tha lem lo a ni. LALPA tel lo a khawvel thila lawmna hi chuan kan lawm zat chiah min titap leh thin. Lei lam thila lawmna hi chuan mihring min tichapo va, chumai ni lovin nei ve lo te leh hre ve lo te chaldelh leh hmuhsit nan kan hmang fo thin. Entirnan: kan sumdawnna a lo hlawhtlinin emaw, thil thar motor, bike, thawmhnaw thar kan neih in emaw te hian nei ve lo te chunga intih theihna leh inlak khum kan ching thin a ni.

Kan pulpit hi ba thinna a ni em...?

C.Lalmuankima

Pathian hi a zahawm teh reng nen, thahnem ngaih luat vang kan ti dawn nge kan at/mawl vang? Kan pulpit te hi ba thin nan kan hmang ta zawk a ni lawm ni...tih mai turin kan inphut nasa ta mai le. Dan thu hnuaia awm kan ni tawh lo va, khawngaihna hnuaia awm kan ni tawh zawk. Thuthlung Hlui Dan hmanga fel, that, thianghlim famkim tura in phut vak hian awmzia a nei tawh lo. A khawngaihna Dan hnuaia awm kan nih angin a khawngaihna ropuizia puan chhuah mai hi kan tih tur awm chhun a ni.

Photo : Google Image

Pathian thilsiamnaah kan tel lo va, a remruat leh tha a tih angin min lo din zawk a; chu chu nang leh keia han complaint theih zia zang a ni lo. A remruatnaa lawm thiam mai hi a lo hahdam ber zawk. Chuti ni lova Lalpa remruatna a lawm tum lova kaw dang hreuh kan tum chhung chuan kan nunah hian in enfiah tur kan nei tihna a ni.

Mi fel aiin mi sual thihna thu, Kalvari tlanga misualte aia a thihna thu hi Chanchin Tha chu a ni a, Lal Isuan misual hi a en kham thei reng reng lo. A hmaia an ben dukna te, an hnekna leh a hmaia chil an chhaka hrehawm tinrenga an sawisakna te chuan min hmangaihzia a tilang a, fakna hla siamtu in ' min hmangaih hi tuman an dang zo lo ve' a tih angin misualte min hmangaihna hi dan a hnekin a zual zel zawk a ni.

Tehna dik lo thei lo Isua (Pathian thu)
Martin L. Chhakchhuak

'Nupui/pasal kan inneih ni atanga tehna sang tak hmanga kan inteh thinna hian inthenna a chawk chhuak fo thin a, hmangaih luat vangin kan inthen chawk thin....' 

Hmangaih luat vangin kan inthen... han tih chu,a ti mah mah in ti mai thei. Mahse a nihna a ni tlat si a ni. Huat vangin kan inthen.... ti ila chuan thu dik awm sa a sawi a nih hi min ti mai thei, mahse kei chuan heti zawng hian ka thlir ve tlat. Nupaa kan insiam hma atangin he Hmangaihna hi a lo piang a, chu chu a vawn nun dan kan thiam loh thin avangin chu hmangaihna chu huatnaah kan chantir fo thin. Huatnaa kan chantir chinah chuan pakhat leh pakhat inkarah lak tlak awm lo khawpin kan inchhuah a, chu chuan nupui/pasal inthenna hi a lo chawk chhuak ta thin a ni. Nupui/pasal inthen ta te hi han zawt hlawm ila, an chhanna tam zawk chu an inhuat vang a ni hauh lo vang. 

Photo : Google Image

Kristian Chhungkua 

Chhunzawmna

C.Lalmuankima

Newcastle, United Kingdom

Kristian Chhungkua chuan Goal Setting (tumna) a nei tur a ni. Goal tih tawngkam hi mizo tawng emaw tih mai tur khawpin kan hmang rim a, a tawi fel thei ang bera sawifiah dawn chuan Thlen Tumna ti te pawhin sawi ta ila, a thu tum kan sawi bo em lo vang chu maw. (Thlen tumna hi goal tiin kan sawi zel tawh ang.) Kristian Chhungkua chuan goal setting tha tak kan nei tur a ni. Tum bul bal nei lo chhungkua chuan thlen tumna a neih miau loh avangin a hmabak chu thim chhah tak a ni ringawt.

Photo : Google Image

Mihring tum bul bal nei lo chu lawng karfung nei lo nen an lo tehkhin thin a, an tehkhin fuh hlein ka hria. Lawng karfung nei lo chu thliin a chhemna lam apiangah a kal a, a thlen tumnaah a thleng thei lo ang hian mihringah hian tumna bul bal nei lo te chu thli chhem len kan sawi ang khan miten an tih avanga tha ber ta emaw tiin leh mite sawi apiang leh tih apiang awiha phar buai a awl duh hle a, chu chuan kan tum ramah min hruai thleng thin lo a ni. Chuvangin Kristian Chhungkua pawh hian tum bul bal tak a nei tur a ni.

Mahni i in el thin ang u.....( Mahni i in teh thin ang u.....) 

Japan thufing chuan,'Mite er suh la, mite el hek suh,' 'Nangmah zawk kha in el ang che' a lo ti a. Vawi tam tak ka ngaihtuah nawn leh thin pawhin a lo tha hlein ka hria. Bible-a Tirhkoh Paulan,' boruak mai hnek lova mahni inhnek thin...' a sawi nen khan a inhnaih hlein ka hre bawk.

A ni tak e..... mi er chu a tha lo law law a, ringtute tan phei chuan tih hauh loh tur a ni a, mi i el erawh chuan,'i el hnehin i hmusitin i chapo khum ang a, i el hneh loh chuan i itsik thung ang' tih hi ka rilruah a rawn lang hlawl mai. Hei vang hian a nih ka ring, tirhkoh Paula ten intihsiakna thianghlim bei zawk tura min lo chah ni. 

Photo : Google Image

Mihring nih chhung hi chuan kan mihringpui te nen a huhovin kan chengho lo thei lo va, chu a huhova kan chen ho chhung chuan nitin mai hian zir tur hi kan nei zel a ni. Mi tumahin ka zir zo tawh, ka hre vek tawh, ka thiam vek tawh a tih theih loh va; apui apang alian atein tungchhova kal mihringte hian Hringnun Zirlai hi kan zir vek a ni. Kan hringnun zirlaiin min chim chin chu a in ang lo mai thei, mahse Zirna zawng zawnga Zirlai hnuk sei ber mai Hringnun Zirlai hi chu tumahin thiam zawh, hriat zawh, zir zawh a awm thei lo va, hriat belh zel a ni a, kan hringnun a tawp hun hi kan zir zawh hun chu a ni tawp mai. Rangon pa ti ti thiam leh fiamthu thiam Pu Kawlvelan, 'Mi zawng zawng hi Zirtawpniah kan thi vek dawn....' a tih hian fuihna leh finna thu a va keng tel nasa teh reng em....! Kan Hringnun Zirlai kan tawpsan hun tur chu kan hringnun a lo tawp hunah chiah hian a ni, chu tak chu Zirtawpni dik tak zawk chu a ni.

Kan ram (Myanmar) ram hrang hrangah tui lian

 

 

A pawi tih hian a hrilhfiah zo lo a ni ber e, chhiatna zawnga chhiatna rapthlak ber te zinga mi, mite tawrh tur chauh emaw tia kan lo ngaih thin kha Khawchhak Zofate chungah a thleng ve ta tlat mai le; a pawi tih tawngkam aia thuk zawk hi awm thei se la chuan chu ngei chu kan hmang duh zawk ngei ang.

 

Khawchhak Zofate chunga thil thleng hi a rapthlak tak meuh meuh va, Pathian hnena tanpuina dila tawngtai ngawt loh chu kan tih theih a tlem hle mai.

 

Photo : Facebook Image

Tui lianin a tih chhiat buh... leh bal, in leh lo, kawng pui inkalpawhna te hi cheng man tam tak man tur a ni. Hmun tam takah zirna sikul in thlengin khar a ni a, thil man a let eng emaw zatin a sang nghal a,...... Heng zawng zawng aia pawi ber leh rilrua lo lang lian ber mai chu, tui lianin a ken tel natna hrithalo chi hrang hrang hi a ni. Heng natna hrithalo te hian tui lian a reh hnuah pawh min la nuai dawn chauh va, mipuite pawh kan fimkhur hle a pawimawh dawn a ni.

 

Sawrkar tha ah chuan ramdang tanpuina te hi, chhiat tawk te hnenah a thleng pha thin a; kan sawrkar hian ram changkangte tih danin chhiat tawk te chungah hmalakna runpui nei ve thei thin se la aw....tih hi rilruah a rawn lang nghal vat a. Kum 2008 Nargis thlipui kan tawh kha kan hre theuhvin a rinawm, khatih hun laia an thiltih anga an kalpui leh a nih ngai chuan tuilian tuartute chunga harsatna lehzual lo thleng tur hi a sawiin a suak loh a ni ber mai.

Lalpa tellohna hmun apiang hi Hremhmun a ni a, Lalpa telna hmun apiang erawh Vanram a ni ve thung. .....tih thu hi.



I nunah khan Lalpan Lalna a chang thin em? Nge Lalpa khi chhiahhlawh ang leh inhlawhfa ang lekah kan ngai zawk? Chhiahhlawh anga duh hun huna tirh phar tawk lekah leh inhlawhfa anga kan mamawh hun chauhva koh leh thawhsak turin rawih/koh kan ching zawk...? I nunah khan Lalna a chang tak tak em...?



Photo : Google Image

Lalpa khi i nuna Lalna a chan dawn tak tak chuan Nangmahah ngei pawh sawithiah tur (paih ngai) tam tak a awm a ni. Lal Isua ngeiin tu pawh a kraws pua mi zui duh chuan nitin hrehawm pawi sa lovin a kraws puin mi zui rawh se...a tih ah hian mahni nun inphatna a tel nghal a, rawngbawlnaa ke kan pen tak tak dawn hian kan chenpui chhungte ngei ngei pawhin min daltu an ni tel ve leh tlat thin. Chu aia min daltu, pal tlang harsa ber mai chu keimaha Keimah hi a ni fo thin. He kan pianpui tisa thinlung mizia hian min hnuk bet tlat thin a, chu ngei chu Lal Isua Krista thisen hmanga nitin Hnehna puan khum a ngai ta thin a ni. Chumiah chiah chuan nitin a kraws put theihna a awm. Hei ngei hi a ni Tirhkoh Paula ngei pawhin,"Nitin ka thi thin...." a tihna hmun ngei kha a ni.



Nitin a kraws puin mi zui rawh se....a tih avangin put zeuh zeuh leh ni kar thlak a put a kawk lo va, nitina kan tisa thinlung mizia rawn in lar thin kan tih thihna hmunah chiah hian kan hriat loh hlanin nitin a kraws kan lo pu ta thin a ni. (Keini zawng, ni khat kan pu a, kan sim ti tih mai emaw ni tih turin kan kraws put lai hi kan hlamchhiah fo thin......) Mahni nun theuh i in enfiah ang u. Nitina a kraws putna hmunah chiah hian a ni Lalpan kan tana a buatsaih, kan chan tura a ruat chu kimchang taka kan lo chan thin ni.

Kristian Chhungkua 

Chhunzawmna

C.Lalmuankima

Newcastle, United Kingdom

Kristian Chhungkua chu zavaia Kristian a nihna ni mai lovin Chhungkuaa Kristian nuna chenhona a ni. Kristian nuna chenho hi a va pawimawh tak em...! A hmingin Kristian kan ni ang a, Kristian nuna cheng pha lo ringtu kan nih vaih chuan ringtu azawnga mi khawngaihthlak ber kan ni ang tih hi a hlauhawm hle mai. Ringtu ni ve si, Lalpaa beiseina pakhat mah nei hauh lo ringtu i/kan nih phei chuan i/kan nun chan hi inenfiah nasat a ngai hle tihna a ni. Chung mite chu an damlai pawhin an thi a ni.

Photo : Google Image

Kristian Chhungkua hi zir mai a tawk lo va, inzirtir leh inkaihhruai tel a ngai a ni. Dr Billy Graham-a chuan,"Tunlai in tha, bungraw famkim leh cheimawina kim hian Chhungkua a siam thei lo. In chhung hi Hotel emaw, mite chawlhna leh chaw eina hmun a ni mai lo va; Thlarau lam thiltihtheihna leh inzirtirna hmun he leia awm, van hnaih ber chu a ni." a ti a. He evangelist ropui tak thu sawi hi a va ropuiin tha ka va ti tak em...! Mi tam takin chhungkua kan din dawna kan tih fuh loh fo mai chu, in tha pui pui, building lian leh changkang tunlai tak taka sak, a chhung bungrua pawh changkang, nalh leh manto tak taka chei mawi, pangpar huan (garden) mawi tak leh tui chenna (swimming pool) pawh nei thlap, car nalh leh manto tak tak hung tlar thei leh nei tha te chu chhungkaw hlawhtling leh ropui ber berah kan ngai fo thin hi a ni. Chu chu a ni hauh lo.

Lalpaa beiseina

Chhungkuaah hian Chair latu (chairman thawktu) chu LALPA a nih phawt chuan, chu ngei chu tehna puitling dik lo thei lo a ni a; engkim mai hi a fel vel vek thin. Keini chu LALPA khi chairman thawhtir lovin tirhkah ah hman kan tum zawk thin a, keimahni ngeiin chair (chairman hna) lak kan tum thin avangin kan chhungkaw din hi a buai nuaih ta thin a ni.

Photo : Google Image

Engkim kan tihna apiangah Lalpa khi dah lal zel ila, Lalpaah khian innghat ngam zel ila, kan nun hi a hah chawl ve tawh ang. Nang leh keia chhungkaw mamawh chu nang leh kei aiin Lalpa khian a hre zawk daih a, nang leh keia chhungkaw tana tha tur pawh a hre zawk a ni. Amahah khian beiseina nghat zel ila, rinna chu thil beiseite awm ngeia hriatna, thil hmuh loh te hriatfiahna a ni (Heb 11:1) a tih angin kan beiseinate min tihhlawhtlinsak turin kan Pathian khi a inpeih reng a ni.

Thlarau Thianghlim tihharh tharna dilin i tawngtai ang u

C.Lalmuankima

Newcastle UK

Lalpa tan i hun engzatnge i pek ve thin tih leh Thlarau Thianghlim tihharh tharna a lo thlen leh theihnan i tawngtai ngai em...tih hi mimal tin te i han inzawt teh ang u....

Thlarau Thianghlim hi min pawl harh leh turin i au fo vang u..... A bik takin he kumpinu leh khawthlang ram tan hian i au lehzual ang u. Thlarau Thianghlim tihharh thar lehna kan mamawh a ni.

Tum khat chu kan tawngtai zawh zanlai thingpui ina kan break laiin tlaivar tawngtainaa min hotu an pastor - nu leh kohhran member dangte nen chuan tawk fang kan ti ti a; anni pawhin an sawi ber chu.... engtinnge he kohhranah hian mi tam zawk kan hip theih ang? Engtinnge UK a harhna lo thleng leh tur hian hma kan lak ang.....tih te a ni a. Kan ti ti a kal chho zel a, kum 1950-70 inkar vel kha chuan tuna Brunswick Methodist Church ah hian Pathian thlarau kaihhruaina changa member sang tel in biak in an pan mup mup thu an sawi a, inkhawm tur pawhin inkawm tan hma darkar hnih/thum vela kal lawk a thutna lo va hauh lawk sa a ngaih thin thu te an sawi chhuak a..... kum 40-50 bak a la liam lo, tun hmaa kohhran dinhmun an sawi leh vawiin ni a kohhran dinhmun chu a va inthlau ta em..?? Chawh rualin member 100 pawh kan/an inkhawm ang em.. tih khawpin kohhran dinhmun hniamzia an sawi hian ka ngaihtuahna lung a tichhe tak meuh meuh va, ka rilru a rum a ni ber mai...! Tawngtai nasat a va tul tak em....! tih hi ka ngaihtuah nawn fo thin.

Kristian Chhungkua Chhunzawmna

C.Lalmuankima

Newcastle UK

Mahni part lova kan luh phawt chuan zaipawl a buai nuaih thin angin Chhungkua pawh hi kan dinhmun tur ni lova din phet kan tum hian kan buai nuaih ta thin a ni. Pain nu dinhmun chuh phet tum se la emaw, nuin pa dinhmun luah lam phet tum se la emaw, faten nu leh pate dinhmun lak sak phet tum se la emaw, movin a pi dinhmun luah lan tum se la emaw a nih chuan chhungkua hi a buai ta nuaih thin a; mahni part lovah kan sa tihna a ni a; mahni part ni lo na na na chu kan zaipawl a buai ta nuaih thin a ni.

Photo : Google Image

Thil reng reng chu mawhphurhna nei ve nia inhriatna hian nun a tihlim a, neitu chan a chantir a; taihmakna bul pawh a ni a; chu mai ni lovin nun a khalh kal a ni. Mawhphurhna nei ve nia inhriatna hian mi a tihuaisen a, mi puitling nihna leh mi zahawmah min siam bawk. Chuvangin tun dinhmuna i mawhphurhna kha engnge ni le? I mawhphurhna hlen zo thei lo khawpin eng enginnge dal thin che? I mawhphurhna hlen ngam lo khawpin i dawihzep thin em? Kan thu sawi tum te a fiah theihnan chhungkuaa mimal tinte dinhmun i han sakhi chul ram fan thuak thuak dawn teh ang.

Lalpa malsawmna chhiar thiam ringtu

C.Lalmuankima

Newcastle UK

Photo : Google Image

Kan neih chhun te te pawh hi Lalpan a khawngaihna a min humsak loh chuan a ni lo lamah an peng fo thin. Bible - a Zawlnei Hagaian a sawi 'ip mawng pawp...' kha a lo thleng ta thin a ni. (Hagaia 1:6) Tam tak ching a, tlem te chauh seng a, ei teuh si a puar leh tlai si lo hian a awm theih a ni.

Lalpaah zel hian kan neih ang ang te hi i kawltir ang u, tichuan anin eiraltu leh rawk hmang leh suamhmangte lakah min lo humhimsak zel dawn a ni. Chuti a nih lohva ni khatah pawh cheng eng emaw zat hai chhuak (la lut) thei ni mah ila, chung lamin eiraltute leh rawktute laka min venhimsak si loh chuan ip mawng pawpa thil thlak ang maiin a tla hiau hiau mai dawn a ni.

Kristian Chhungkua

Kristian Chhungkua

Bible bung leh chang : Sam 127:1; Matthaia 7:24; Sam 68:6

By C.Lalmuankima

Newcastle UK

Photo : Google Image

Tunlai chu 'Kristian Chhungkua' tih thupui hi ka rilruah a khat liam ve teh tlat a, lei danin mahnia chhungkua pawh la din si lovin a Kristian Chhungkua thupui han sawi chu....tiin ka inthiam lo hle mai a, ka sawi ngam lawk lo zawk a ni. Mahse zawlnei Jeremian, 'Ani chu ka lam lo vang a, a hmingin thu ka sawi tawh hek lo vang..ti mah ila, ka ruh chhunga mei kang inkhung ta ang mai hian ka thinlung chhungah hian a awm si thin; ka pai hle hle zo lo va, ka chelh ngang lo a ni....' a tih ang deuh hian ka rilruah a thi thei tlat lo mai a, ka han au chhuahpui ve leh thawr mai a ni e. (Kristian Chhungkua hi nu leh pa, chhungkaw din tawh te tan chauh a ni tih a lo awm lo kher kher hian sawi chhuahna hun remchang min siamsak a, min tihuai sawt bawk.... hehe )

'Kristian Chhungkua' tih thupui hi kohhran ho leh khawtlangah te seminar leh consultation te neiin kan lo nei fo tawh thin a, a hming han lam rik atang ringawt pawh hian kan rilruah a ruangam tur chu kan mitthla thei nghal maiin a rinawm a, kan zingah a mikhual tawh lo hle mai a ni. Chutia kan zinga mikhual lo hle e ti lo chuan....Kristian Chhungkua din erawh zu har fu a maw le.....! A har em avanga tlanchhiatsan mai chi lah ni hek suh, Kristian kan nih angin Kristian chhungkaw din erawh kan mawhphurhna a ni miau si a, a bik takin Lalpain a luah chhungkua emaw Lalpain a awmpui, a pawl thin chhungkua emaw nih hi kan thupui innghahna tur chu a ni e. 

Engvangin nge Chanchin Tha hi hril a tul?

C. Lalmuankima

Newcastle, United Kingdom

Bible bung leh chang : Mark a 16:15; Tirhkohte 1:6-8; 17:11; Matthaia 28:18-20.

Chu zawhna chu a van mawlthlak deuh ve in ti mai thei. Mahse a mawh lo ve.... kohhranin a nih dan tur leh a tih tur a tih loh chiah hian kohhran chuan a thanmawh phah a, Thlarau lamah a chauh phah a; kohhran nunglo kohhran thi kan tih phah thin. Pathian ringtute, Pathianin ringtu hnena a hnathawh tura a thupek ropui ber leh ngaih pawimawh ber mai chu Chanchin Tha hril hi a ni miau si a. Chu chu ringtu hna tur reng a ni. Chu hna chu ringtuin a tihpuitloh ni apiangah kohhranho te zingah ngetna leh hri tha lo tak tak a lo thleng thin a; kohhran thi leh ro a lo awm phah thin a ni.

Photo : Google