Zo Vapual

Kristian Chhungkua Chhunzawmna

C.Lalmuankima

Newcastle UK

Mahni part lova kan luh phawt chuan zaipawl a buai nuaih thin angin Chhungkua pawh hi kan dinhmun tur ni lova din phet kan tum hian kan buai nuaih ta thin a ni. Pain nu dinhmun chuh phet tum se la emaw, nuin pa dinhmun luah lam phet tum se la emaw, faten nu leh pate dinhmun lak sak phet tum se la emaw, movin a pi dinhmun luah lan tum se la emaw a nih chuan chhungkua hi a buai ta nuaih thin a; mahni part lovah kan sa tihna a ni a; mahni part ni lo na na na chu kan zaipawl a buai ta nuaih thin a ni.

Photo : Google Image

Thil reng reng chu mawhphurhna nei ve nia inhriatna hian nun a tihlim a, neitu chan a chantir a; taihmakna bul pawh a ni a; chu mai ni lovin nun a khalh kal a ni. Mawhphurhna nei ve nia inhriatna hian mi a tihuaisen a, mi puitling nihna leh mi zahawmah min siam bawk. Chuvangin tun dinhmuna i mawhphurhna kha engnge ni le? I mawhphurhna hlen zo thei lo khawpin eng enginnge dal thin che? I mawhphurhna hlen ngam lo khawpin i dawihzep thin em? Kan thu sawi tum te a fiah theihnan chhungkuaa mimal tinte dinhmun i han sakhi chul ram fan thuak thuak dawn teh ang.

1. Chhungkuaa Pa Dinhmun

Chhungkuaa pa ber i nih chuan chhungkaw awplum hna leh Lalpa hmaa i nupui fanaute hruai thlen chu i tih tur pawimawh hmasa ber a ni ta phawt mai. Kan sawi tawh angin chhungkua hi Krista tel lo pawhin a din theih tak meuh meuh va, Kristian Chhungkua erawh chu Krista tel lovin a din theih miah loh ve thung. Chhungkaw pa ber, Krista hnena hruai ngai lo chuan a in chhungah Kristian Chhungkua engtinnge a din theih ang?

Photo : Google Image

Zu hmun hlimna leh thenawm te in atang chuan chhungkaw nun siamthata nupui fanaute Krista hnena hruai thlen chu a har hle ang le? Chhungkaw pa ber, mahni nupui fanaute entawntlak awm lo khawpa nun uluk lo chuan a chhungkaw din a hlawhchham hul hual tihna a ni. Chhungkaw pa ber chu, nupui fanauten an thlamuanpui tham/tlak leh innghahna bul ber a ni tur a ni. Chu a dinhmun chu a luah zo lo emaw a luah ngam lo emaw a nih chuan a chhungkaw dinah a hlawhchham chiang hle tihna a ni. Chhungkaw pa ber chuan Kristian chhungkaw dinhmunah chuan thuneihna a keng kawh tur a ni a, chhungkaw roreltu ber leh chhungkaw puithiam a ni tur a ni. Joba Hani te anga fate tana tawngtaisak leh inthawina hlansak thin pa an ni tur a ni.

Kohhran leh khawtlang, ram leh hnama in hman hi a va tha tak em....! Amaherawhchu Chhungkaw awplum hmanlo khawp leh ngaihsak hmanlo, nupui fanaute Krista hnena hruai hmanlo khawpa kan inhmang a nih chuan a fuh leh chuang hauh lo vang.

2. Chhungkuaa Nu Dinhmun

'Nu nih chu a awl a, nutling nih erawh chu thil har tak a ni....' tih tawngkam hi kan hre zing/ngun tawh hle a, kan hriat zin/ngun tlukin a takin kan pen chhuahpui hlei thei lo chu a nih hi maw. Chhungkaw nu ber chuan pasalte ngaihsak leh fate enkawl leh nunkawng tha zirtir hi a hna a ni a. D.L.Moody phei chuan,"Ka nuin min enkawl ang hian mi nute hian an fate enkawl sela chuan Lung In hi a awm lo vang," tiin nute pawimawhzia leh hlutzia a lo sawi chhuak hial a ni. 

Nute dinhmun pawimawhzia leh hlutzia sawi hi chuan France ram sipai General ropui Napoleon-a hming hi lam tel a tul leh fo thin. Nute hlutzia leh pawimawhzia hriain,"France ramin a tlakchham ber chu Nu te an ni," tiin a hote leh mipui hmaah a sawi a, he a thusawi hian Nu dinhmun pawimawhzia a tilang chiang hle a ni. Kristian Chhungkaw ngial nghet din tur hian pate chauh an pawimawh lo va; nute leh fate pawh hi a kila lung tangkai ber ber te an ni. Nute hi am va hlu tak em....! Fate nunkawng khalh ngil tur leh chhungkaw nun siam that hna thawk tur hian nute hi a kila lung pawimawh leh tangkai ber te zinga mi an ni tlat.

Fate hian nute hi pate aiin kan (ngaina/hnaih) close zawk a ni lawm ni tih tur khawpin kan bel bul zawk a. Kan manganna/lungngaihna tam ber leh lawmna  tam ber pawh nute hnenah kan thlenin kan zualko thin. An bulah pate lo thu ve reng mah sela nute hnenah tho kan zualko thin. Chhungkua hi nute ah hian kan innghat nasa em em a; fate harsatna leh pasalte lungngaihna thlenga chhawk zangkhaitute an ni. Fate tual chai lo hawin an rawn lam hmasak ber chu nute an ni a, pasalte hnathawk hawngin an rawn lam hmasak ber pawh nute bawk an ni. Hetiang neuh neuh atang pawh hian nute hlutzia leh pawimawhzia chu kan hre thei mai awm e.

Fate nena inhnaih bik leh fate bula awm tam ber an nih avangin fate enkawl leh zirtirna kawngah kawng dik leh tha kawh hmuh chu nute kutah a innghat thui hle a; D.L.Moody sawi ang khan faten nunkawng sual an zawh leh zawh loh thu hi nute zirtirna hnuaiah thui tak a innghat a tih theih a ni. Mi nute angin mi ropui leh thil tithei i/ka ni lo mai thei, mahse fate tan erawh zirtirtu tha tak i/ka ni thei a ni. 

Photo : Google Image

Vawiina i fate i/ka zirtirna hian an hmalam hun tur thui takin a hril a; nakina an thlarau nun seol-a kal liam mai tur i/ka chhanchhuak thei a ni tih hi rilruah vawng tha reng ila, fa sual leh kawhmawh bawl hmang fa neihna lakah kan him thei dawn a ni. Fate enkawl that lohna hian chhungkua chauh a nghawng lo va, kohhran leh khawtlang,  ram leh hnam thlengin a nghawng chho va; ram leh hnam nghawng thlen meuh chuan ram leh hnam ah rah chhe tak a chhuah a, a tawpah sualna chi hrang hrang leh tualthahna thlengin a thlen ta thin a ni. A bulpui ber chu chhungkuaah fate kan enkawl that tawk lohna vang a ni a, chu tak chu ringtu nu leh paten Pathianin min pek kan fate hi kan Mission field hmasa ber a ni a, awmhmun atangin Missionary ropui tak kan thawk a ni tih hi i hre thar leh ang u.