Engin nge Pathian hnaihtir che?

C. Lalmuankima

Newcastle, United Kingdom

Pathian min hnaihtirtu hi a in ang lo theuhvin a rinawm. Thenkhatin harsatna khur thuk tak atanga Lalpa an hnaih laiin a then erawh chuan thihna hial an tawh chiahin Lalpa an hnaih ve thung. A then erawh chu thununna leh zilhhauna tawh phawt loh chuan emaw mahni chunga eng eng emaw a lo thlen phawt loh chuan Pathian lam hnaih tum reng reng lo te pawh an awm ve bawk a. Eng dinhmunah pawh awm mah ila, Lalpa min hnaihtirtu a nih phawt chuan a tha vekah i ngai ang. Amaherawhchu chu aia pawimawh zawka lang chu Lalpan a khawngaihna kan chunga a lantir avanga a khawngaihna haidera kan awm erawh a pawi hle thung ang.

Photo: Google Image

Kan harsatna te leh mangan lusunna te hi Lalpa min hnaihtirtu an ni thei bawk a ni. Lalpa hnaihna a nih dawn phawt chuan eng dinhmunah pawh ding mah la a pawi reng reng lo turah ngai ila. Mahse thununna leh zilhhauna a lo thlen phawt loh chuan that tum hauh lo leh Lalpa hnaih tum hauh loh hi thil tha ber a ni chuang lo va, zilhhau fo pawha ring tihkhawng tlat leh luhlul chhuah fo phei chu vawi leh khata boralna thlen theihna a ni (Thufingte 29:1). Thununna leh zilhhauna kan nghak kher thin a nih chuan kan ti fuh hauh lo vang. Chuvangin thil zawng zawng hi Lalpa min hnaihtirtu a nih a, a that vek rual rualin thlahdah taka awm erawh chu a rem leh hauh lo a ni (Jeremia 48:10). Ringtuten kan nun kan hman danah kan fimkhur hle a tha hle mai. Keimahnia Lalpa hlawkna tur awm lovah hi chuan i inham tang thin lo vang u.

Fak leh chawimawi ninawm loh Pathian

(Sam 150:1ff, Galatia 6:9)

C. Lalmuankima

Newcastle, United Kingdom

Pathian fak leh chawimawi thangte chuan a hun leh a hmun hi an lo thliar lem lo khawp mai. Pathian fak leh chawimawi thangte chuan nitin an mita an hmuh leh an benga an hriat te hmangin an fakin an chawimawi mawlh mawlh mai a ni. An siamtu Pathian fak leh chawimawi an ning ngai lo.

Photo: Google Image

Thenkhatin Biak inah chauh emaw Pathian fak leh chawimawi tum ni awm ang taka kan rilru kan siam a nih chuan a fuh ber chuang lo vang. Kan thlenna chin chinah hian siamtu Pathian thilsiam mawizia leh ropuizia fak leh chawimawi tur a lo awm khat tlat a ni tih hi kan hriat a tha hle mai. Pathian fak leh chawimawi hi a hun leh a hmun thliar hran a awm chuang lo va, Lalpa nena kan inpawlna hmun apiang mai kha kan tan chuan hmun thianghlim a lo ni vek zawk a ni. Biak inah kan kal khawma Lalpa kan faka kan chawimawi hi kan sawi sel lo va, Biak in chauh hi Amah Lalpa fak leh chawimawina hmunah chauh kan ngai palh ang tih hi ka hlauh vang zawk a ni. Kohhranho chu pakhat leh pakhat intiharh/inchawkharh tawn tura tih kan nih angin kan testimony kan in share te leh pakhat leh pakhat rawngbawlna kan inhriat tawnsak hi a tha hle a, chakna tha hrui kan inpe phah a ni tih hi i hre reng ang u.

Inrintawkna nei thin rawh

C. Lalmuankima

Newcastle, United Kingdom

Mahnia inrintawkna kan neih loh hian kan thiltih a bahlah thin a, hlawhtlin a har hle bawk. Mahni tawka inrintawkna neih loh hi kawng engkimah kan hnufual a, kan che zia a khawr a, mahni leh mahni kan inrin zawhlohnain a ken tel mahni leh mahni lak tlak lo leh tlaktlai lovah min chhuah ta thin a ni.

Inrintawkna nei tur hian thil tih tur pawimawh tak tak sawi tur a awm thei ngei ang. Chu lam chu kan sawi tum a ni lo va, mahni inrintawkna nei tura kan inzirtir dan lam hi kan sawi tum tak zawk chu a ni.

Photo: Google Image

Zofate hi mahnia inrintawkna kan tlachham hle a, chutianga inrintawkna inzirtirna phei chu kan tlachham lehzual a ni. Chutiang lamah chuan inzirtirna leh infuihna tha kan neih loh avangin mahnia inrintawkna kan tlachham lo thei lo va, mahnia inrintawkna kan tlak chham na na na chuan thiltih kan zuam loh phah nge nge thin. Thiltih kan zuam loh chuan hnathawhna leh kawng engkimah kan khawrin rual kan pawl lo nghal a, a tawpah inkiltawihna min siam a, mi hlawhchhamah kan chhuak ta thin a ni. Mahni leh mahni inrintawkna neih lohvin a hrin chhuah chu mahni leh mahni tlaktlai lova inngaihna a hring nghal a, a tawpah hlawhchham bik tura inngaihna tha lo takah min hnuk lut thin.

A theih loh….tih hi tehna puitling a ni ngai lo!

C. Lalmuankima

Newcastle, United Kingdom

A nih theih loh dan vawi sang tel sawi leh ngaihtuah aiin a nih theih dan tur vawi khat ngaihtuahna sen hian hringnun hmasawnna a thlen thin a, tih hma hauhva tlanchhiatsan chingte hi mi dawihzep tak te an ni. A nih theih lohna lam ringawt ngaihtuah chingte hian a tawpah anmahni hial pawh an intichhe thin.

Mi tam tak hlawhchhamna hi han chhuiin han zir chiang ila, a tih theih lam aia a tih theih loh lama tang thin leh rilru pe thin leh thutlukna siam thinte an ni duh khawp mai. 

'A theih loh....' tih hi kan Dictionary atanga kan chawh reh ngam ni apiangah kan hringnun hi 'A theih....' tiin kan thlak ang a, chu chuan hlawhtlinna kawngpuiah min hruai thleng ang. Kan ngaihtuahnaa thil theih loh kan ngaihtuah chhung chuan kan hringnunah hian engtik lai mahin thil kan ti thei lo vang a, hlawhtlinna a thleng ngai lo bawk ang. Chuvangin kan ngaihtuahna hi 'A theih a ni....' 'A ni thei a ni....' adt. tih thu tein thuam khat tlat thin ila, tichuan chu chuan kawng dikah min hruaiin thil tha ngaihtuah chhuak thei turin rah tha min chhuahpui mai dawn a ni.

Chanchin Thain i kum bul chhiar tan ang che

Photo : Google Image

Khai le, Pathian khawngaihna leh zahngaihna azarah kum 2019 kum bul kan lo tan ve leh ta reng mai. Chu kum bul tanna atan chuan Pathian Thu hi kan hmang em tih erawh mimal tinten mahni leh mahni inzawt theuh ila a tha awm e. Kan chhungkua hi Chanchin Tha (Pathian Thu) hmanga kum bul kan tan lo a nih phawt chuan kum tawpa a rah chhuah tur hi entlak awm lo khawpin a chhe thei a ni. Kan chhungkaw nun min kaihruaitu atan Pathian Thu hi kan hman loh phawt chuan a hnu lo kal leh tur hi kan en ngam hauh lo vang. Chuvangin Pathianin a khawngaihna avanga hun thar min hmuhtirah hian a duh ang taka Chanchin Thaa kum bul kan tan a pawimawh a, chutianga Chanchin Thaa kum bul kan tan phawt chuan engtik lai mahin kan tisual ngai lo vang. Chanchin Tha avanga kum bul min tansaktu chuan kum tawp thleng pawhin hlim takin min hruai thleng leh dawn a ni. I kum bul tan kha Chanchin Thaa bul tan ni rawh se. Tichuan i chenpui, i thawhpui, i zirpui leh i mihringpui te tan pawh malsawmna luankawr atan Lalpan a hmang zel ang che.

Chanchin Thaa kum bul i tan phawt chuan i harsat leh mangan huna tanpui tur chein Lalpa khi i bulah a awm reng a ni. Chanchin Thaa kum bul tan hi a inchhirawm loh va, inchhir ahnekin i nitin nun tihlimtu a ni zel tawh mai ang. He kum thar tan hian duhsakna tam tak hlan duh che ka nei ve teuh mai thei, chung zinga ka duhsak ber che chu 'Chanchin Tha (Pathian Thu) in i kum bul chhiar tan rawh' tih hi a ni. Chanchin Thaa i kum bul i chhiar phawt chuan i kum tawp lo thleng tur pawh malsawmin a awm zel dawn a ni.

Chanchin Thaa kum bul chhiar nachang hre lote bawk hi kan buai leh dawn a, kum tawpah kan la inchhir leh dawn a ni. Chuvangin he kum 2019 hi Pathian khawngaihna leh zahngaihna azara i chhiar thleng ve a nih chuan i kum bul tan pawh Chanchin Thain kum bul chhiar tan ang che. I inchhirna hun a lo thlen hma hian he kum bul hi Chanchin Thain han chhiar tan teh le.