Zo Vapual

Thlarau Thianghlim tihharh tharna dilin i tawngtai ang u

C.Lalmuankima

Newcastle UK

Lalpa tan i hun engzatnge i pek ve thin tih leh Thlarau Thianghlim tihharh tharna a lo thlen leh theihnan i tawngtai ngai em...tih hi mimal tin te i han inzawt teh ang u....

Thlarau Thianghlim hi min pawl harh leh turin i au fo vang u..... A bik takin he kumpinu leh khawthlang ram tan hian i au lehzual ang u. Thlarau Thianghlim tihharh thar lehna kan mamawh a ni.

Tum khat chu kan tawngtai zawh zanlai thingpui ina kan break laiin tlaivar tawngtainaa min hotu an pastor - nu leh kohhran member dangte nen chuan tawk fang kan ti ti a; anni pawhin an sawi ber chu.... engtinnge he kohhranah hian mi tam zawk kan hip theih ang? Engtinnge UK a harhna lo thleng leh tur hian hma kan lak ang.....tih te a ni a. Kan ti ti a kal chho zel a, kum 1950-70 inkar vel kha chuan tuna Brunswick Methodist Church ah hian Pathian thlarau kaihhruaina changa member sang tel in biak in an pan mup mup thu an sawi a, inkhawm tur pawhin inkawm tan hma darkar hnih/thum vela kal lawk a thutna lo va hauh lawk sa a ngaih thin thu te an sawi chhuak a..... kum 40-50 bak a la liam lo, tun hmaa kohhran dinhmun an sawi leh vawiin ni a kohhran dinhmun chu a va inthlau ta em..?? Chawh rualin member 100 pawh kan/an inkhawm ang em.. tih khawpin kohhran dinhmun hniamzia an sawi hian ka ngaihtuahna lung a tichhe tak meuh meuh va, ka rilru a rum a ni ber mai...! Tawngtai nasat a va tul tak em....! tih hi ka ngaihtuah nawn fo thin.

Photo : Google Image

Kohhran chu keimahni hi kan ni tih hi a dik rual rualin chu kohhran chuan midangte nena inpawlhona a nei thin tur a ni. Pakhat leh pakhat harsatna te , manganna te, lungngaihna te phurrit inchhawk zangkhai tura din kan ni. Chuti a nih si loh chuan kohhran hian a nih tur angin a ni pha lo fo vang.

Kan inkhawmna piah deuh lawka Shopping Mall leh Pub leh Restaurant ah hian apui apangin an insul pel zut zut a, Biak in lam pana rawn kal erawh an vang/khat deuh pharh mai. UK ka thlen hlima ka rilru ti na em em tu leh ka mittui hial titlatu chu; Biak in luahtu awm lo va ram ta mai leh Biak In sakhaw dangin an luah tak ka hmuh te hi an ni. Chanchin Thaa min hringtute hi an mu thlu zo tawh a ni lawm ni tih leh mutthlukna thlarau sualin min va bum nasa ve..... tih hi.

Kan hriatloh hlan hian Setana hian min lo va hruai kawi nasa tak em....mutthlukna thlarauvin min hruai a, kohhran hi a muthlu ta thup mai a ni. Chu kohhran muthlu kai tho leh tur chuan nang leh kei hi kan tawngtai nasat a pawimawh a, Lalpa tan kan hun kan sen ve a hun ta....

Pathian khawngaihna avangin nikhatah darkar 24 hun pek kan ni a, a petu Lalpa tan khian darkar engzatnge i hman ve le...? Ni khatah darkar 8-10 inkar chu hnathawh hun atan paih ta ila, darkar 12 hi mut leh ei, family leh private hun atan paih leh ta ila... darkar hnih dang kan la nei a, darkar hnihah darkar khat chu social hun atan paih leh ta ila, darkar khat kan la nei a....chu darkar khat kan neih chhun poh chu kan rilruin a la tam lutuk kan ti a mai thei, darkar chanve in paih leh ta ila. Darkar chanve kan la nei a, chu darkar chanve kan neih hlu tak chu Lalpa tan kan hmang phal em....? Hei hi a pawimawh ka ti khawp mai.... Vawiin ni a i hun hlu tak petu che kha hrechiang la chu e.... A petu tan khian i hun hi i khawh ral phal tawh miah lo vang.

Thlarau Thianghlim harh tharna lo thleng leh turin thahnemngai takin i tawngtai mawlh mawlh ang u.