Zo Vapual

Testimony

C.Lalmuankima

Newcastle UK

Photo : Google Image

Vawiin ka gym kal chu ni dang ang lo takin hun ka hmang a, ka hlim hle a ni. Thil dang ni lovin gym a ka infiam zo chu rei lo te ka chawl a, tichuan male changing room lam ka pan nghal a; ka inthlak a, shower luh hmain sauna/steam leh jacuzzi a inchiaha hun ka hman mek laiin ka rilruah 'rilrua tawngtai' a lo lang ta tlat mai a; chu thu lo chu tiin ka rilruah ka tawngtai ta a, ka hriat loh hlanin ka mit ka lo chhing reng mai a; ka ban hial ka lo phar chhuak ta a....! Khawvel hmun hrang hranga awmte tan tawngtaina maicham ka hun hnuin khawvel hmun hrang hranga rawngbawltute leh mission rawngbawlna field tan te, tunhnaia France rama thil thleng rapthlak tak thlengin tawngtaina maicham ka hung thei a, ka rilru awm a nuamin a hlim em em a, ka tan chuan hun chhinchhiahtlak tak a ni chiang mai le. (Darkar khat dawn hun ka lo hmang reng mai.... sauna/steam leh jaccuzi a rawn kal te ngaihah chuan a atthlak viau mai thei a ni.)

Chutia ka rilrua tawngtaina ka hman zawh hnu chuan ka rilruah thil pakhat a rawn lang hlawl mai a. Chu chu engnge tih chuan, rawngbawltute thu sawi ka ngaihthlaka ka benga ka lo ngaihthlak fo leh mite lehkhabua an ziak 'khawi hmun pawh hi Pathian min pawlna a ni thei a ni, Pathian min pawlna hmun a nih chuan kan tan hmun thianghlim a ni a, Pathian nena kan inbiak pawhna hmun apiang hi hmun thianghlim a ni' tih hi a awmzia ka hre thiam tan ta chiah a ni....! Midang tan chuan thil ho tak a ni thei ang a, kei ka tan erawh chuan testimony ka chang thar ve tlat mai le; sawi chhuah loh atan ka ui em a, thiam lo chung chungin ka rawn sawi chhuak ve a ni e.

Tun hmaa rawngbawltute thu sawi ka lo hriat fo thin 'kal chung pawhin a tawngtai theih' an tih te, 'dailenna (toilet) ah pawh miin Pathian a biak phawt chuan kha hmun kha hmun thianghlim a ni' an tih te chu a awmzia ka hrethiam tan a, Lalpa nena kan inpawlna hmun apiang hi kan tan chuan hmun thianghlim a lo ni dawn reng mai....tih hi ka hrethiam ta a ni. Dailenna/ek in a nih avang khan a bawlhhlawh chiam a ni lo va, biak in a nih avangin a thianghlim bik a ni hek lo. Pathianin kan rilru/thinlunga min biakna (thu a sawina hmun) hmun apiang hi a lo thianghlim mai a ni tih hi ka sawi uar duh. He nun hi hruaitu ropui Mosia nun atang khan kan hmu thei ang. Mosia chu a pu Jethroa ran rual te enkawla Pathian kohna a chan khan, thlaler hnim buk atanga mei alh leh Pathian aw lo chhuak chuan a dinna hmun kha hmun thianghlim a nih thu a rawn hrilh a; tichuan a pheikhawk te phelhin Pathian a be ta a nih kha......! Khawvel thil taka kan thlir chuan Mosia dinna hmun kha a thianghlim hauh lo vang a, thlaler hmun na na na chu vaivut leh bawlhhlawh te a awm teuh mai thei. Mahse khami hmun kha Lalpan a thlansak tlat mai a, hmun thianghlimah a puansak ta a ni. Keini pawh Lalpan amah biakna hmun atana min thlansakna hmun atan apiang hi kan tan hmun thianghlim leh ralmuang a lo ni zel a, kan nuna kan rah ngam chin apiangah inpuang turin Lalpa khi kan hmaah a ding reng a ni.

Paula leh Sila te pawhin Lung in thuk thim tak atangin Pathian an fak a, an chawimawi bawk a; an taksa chu tan in (lung in) thuk thim taka awm reng chung si khan 'keini zawng van khua leh tui kan ni' tiin an lo au chhuahpui dap dap mai a. Khawvel thlirna zawn atang chuan thil ni thei lo (thil tu lo ber) leh thil awihawm loh ber, Rome sawrkar lung in thuk thim taka tang tawl reng leh an chung thu rel hun nghaka tang mek an ni. Mahse tan in thuk thim tak hnuai atang khan an nunin van khua leh tui nun an tem a, "van khua leh tui kan ni" tiin Pathian fakna leh chawimawina hla an sa thei tlat a ni.

Photo : Google Image

Chutiang bawkin keini pawh hi kawnga kan kal chung te, kan hnathawhna hmuna kan thawk reng chung leh kan zirna hmuna kan zir malh malh te, tawng mawi lo ni suh se la - dailenna kan dailen mek lai te leh adt.....hian Lalpa khi a biak theih a ni. A hun leh a hmun a awm chuang lo, kan nuna Lalpa inpuanna hmun apiang hi hmun thianghlim chu a ni a, Lalpa inpuanna chang fo turin kan nun i buatsaih thin ang u.

Pathian thuin a kaltlang fona nun tluka awhawm a awm lo va, an bula awm pawh a nuam thin. Lalpa thuin a kaltlang fo nun neih kan duh chuan a thua chen ve hmasak a ngai ngei ang a, a thu tan tlat thin Pathian a nih avangin a thu hmang veka kan kar chuan lei leh van leh a chhunga awm zawng zawng siamtu Pathian khi a che lo thei lo a ni.

Lalpa tan i nun kha han buatsaih ve teh le, vawi khat mah i inchhir lo vang. Lalpa tan kan hun te kan pek tam poh leh Lalpa khian kan tan hun min lo pe tam ve dawn a lo ni reng mai.

Lalpa tana hun pe hman lo khawpin he khawvel thilah hian kan lo hmanhlel palh ang e. Eg. Tunlai social media lar tak Facebook te, Twitter te leh adt....te ah hian thalai tam tak chuan hun kan khawh ral a, kan khawh ral mek bawk a; Pathian min hnaihtirtu ai mahin amah min hlattirtu a ni thei tlat. (Kei ngei pawh hi heng Social Media te hmang thiam lo ber te zinga mi ka ni a, a chang chuan ka insum zo lo fo thin a; ka hun tam tak ka khawh ral fo thin.....) Hengte hi a hman dan kan thiam a pawimawh a ni....tih hi ka sawi uar duh hle mai.

Tichuan Lalpa tana hun kan pek tam phawt chuan a ni pawn kan tan hun min pe tam ve ang a, kan nun hi malsawmin a lo awm ang a; midang tam tak te tan malsawmna kan lo ni zel tawh dawn a ni.