By Vanlal Zawma
Kalemyo (Tahan) biala cheng thin tawhte chuan Dr. Zachhinga hi kan hre tlang viauin ka ring. Kum 2010 a famkhua min lawisan ta, 1990 kuma NLD party atanga MP thlantlin Pu Do Thawnga fapa pali zinga mi a ni. Dr. Zachhinga hian 1994 December thlaa MBBS a zirzawh hnuin Kalemyo Hospital-ah “House Surgeon” a thawk nghal a; khawchhak zofate chenna hmupui ber a nih ang bawkin zofaten a zar kan zo na sain kan thlamuanpui hle a ni.
“House Surgeon” a zawh hnu hian Kyauk Me (Shan State)ah a han awm zet a, mi inzir tak leh tum ruh tak a nih angin Master of Medicine Science in Surgery zir chhunzawm thei turin a tling leh ta hlauh mai a, Mandalay ah a zir chhunzawm leh ta a ni. Tichuan M.Med.Sc (Surg.) chu kum 2005 khan a zo fel leh thei ta a; Mandalay hospital leh Mawla Myaing Hospital ahte a thawk chhunzawm nghal a ni. (Kawl tawng takin “Ta-Ma-Daw” kan tih ang chi kha a ni). Mandalay leh Mawla Myaing damdawiinpuia a thawh lai hian mi fak a hlawh hle a, private clinic ten a hun awl zawng zawng pawh an booking khat vek thin a ni. Mawla Myaing ah phei chuan mipui leh private clinic ten an duh ber doctor leh mi zai (surgery) thiam bera an sawi a tling hial a ni.
Dr. Zachhinga chuan hnathawh tur tam tak karah a sum lakluhturte chu chhuta awm mai mai lovin zir chhunzawm zel dan a ngaihtuah phah zel a. United Kingdom chhunga Scotland ram Edinburg khua a awm “Royal College” an tih khawvela college thra bera an ngaih ah zirzawm turin entrance exam a chhang leh ngat ngat a. He exam hi Burma sorkar thuneihna hnuaia tih a ni a, induhsakna a na hle thin a, Dr. Zachhinga hian tum hnih thum lai entrance exam chu a chhang a, writing leh oral test ah te titha hle thin mahse a pa (Pu Do Thawnga) NLD MP a lo nihna leh a unau thenkhatte rampawna tlanchhuak zinga hming lang tham an lo nih ve avangin duhsakna a chang thin lo a ni. A tawpah chuan a thiama thiam na na na leh a mah thik thei tura thiam dang tumah an awm tak loh avangin kum 2008 atang khan MRCS a tling ve ta tawk a ni. (RC hi under graduate tan a ni lo va, Post-graduate tan leh an thiamna field a experiance nei tam tawhte chauh in entrance exam chhan theih a ni).
Damdawi lam zir mite sawi dan in: “Royal Collge (RC)” hmunpui ber hi Edinburg ah a wm a, UK ram hmun hrang hrangah Campus a nei a, London ah pawh a awm. He RC hian an hnena zirzo ho hi “Degree” ni lovin “Member” nihna leh “Fellow” nihna an pe a, MRCS a nih chuan “Member of Royal College Surgery” tih na a ni a; FRCS a nih chuan “Fellow of Royal College Surgery” tihna a ni. “Member” aiin “Fellow” hi a sang zawk a. RC ah hian thiamna chi tireng an zirtir a; MRCP, FRCP an nih chuan “P” chu “Physician” tihna a ni a, FRCOG, FRCPath etc… tamtak an pe. Zirna lam ah chuan Ph.D ai mahin an ngaisang zawk ti ila kan tisual awm lo ve.
Dr. Zachhinga hian kum 2008 atrang khan FRCS Course hi Burma ah hnathawk pah in a zir ngar ngar tawh a, tun hi Edinburg ah candidate turin a kal ta a ni a, practical in an collge-ah thla 3-4 vel a bei ang a, RC Surgeon ho hmaah Viva leh practical in exam a chhang a; RC Medical council in an duh a tlin chuan FRCS an pe ang. A fail chuan a tih nawn zel a ngai ang a, engchen nge a rei dawn sawi theih a ni rih lo. Burma lam Zofate zingah chuan Dr. Ni Khuaia (fam) kha FRCS awmchhun a la ni awm e. Dr. Ni Khuaia khan “RC ah chuan an uluk in a har lutuk a, ka beidawng trep a ni; Interview-na ah Professor rualin ‘Necktie’ suih dik leh pheikhawk tle leh tle lo thlengin min endik” tih a sawi thin an ti. (FRCS hi Kawl trong chuan “Pa-Ra-Gu” an ti mai thrin)
Dr. Zachhinga chu United Kingdom, Scotland khawpui Edinburg ah doctor zirna sang zawk FRCS zir turin leh exam chhang turin Febuary 22, 2011 khan a thlengthla ta rup mai a. Kawlram zofate zingah ni mai lovin Zohnahthlak pum huap pawh hian han inchhiar dawn ila, FRCS hi kutzung tang daih emaw bak kan awm a rin awm lo hle a, hetianga kan thian, kan u meuhvin a zir thei leh a in candidate thei hi a chhuanawm tak meuh meuh a ni. Dr. Zachhinga hlawhtlinna chu zofate hlawhtlinna a nih dawn avangin tawngtaina in i tanpui theuh ang u hmiang.
Thulakna : www.zoin.info
