Kristian Chhungkua

Kristian Chhungkua

Bible bung leh chang : Sam 127:1; Matthaia 7:24; Sam 68:6

By C.Lalmuankima

Newcastle UK

Photo : Google Image

Tunlai chu 'Kristian Chhungkua' tih thupui hi ka rilruah a khat liam ve teh tlat a, lei danin mahnia chhungkua pawh la din si lovin a Kristian Chhungkua thupui han sawi chu....tiin ka inthiam lo hle mai a, ka sawi ngam lawk lo zawk a ni. Mahse zawlnei Jeremian, 'Ani chu ka lam lo vang a, a hmingin thu ka sawi tawh hek lo vang..ti mah ila, ka ruh chhunga mei kang inkhung ta ang mai hian ka thinlung chhungah hian a awm si thin; ka pai hle hle zo lo va, ka chelh ngang lo a ni....' a tih ang deuh hian ka rilruah a thi thei tlat lo mai a, ka han au chhuahpui ve leh thawr mai a ni e. (Kristian Chhungkua hi nu leh pa, chhungkaw din tawh te tan chauh a ni tih a lo awm lo kher kher hian sawi chhuahna hun remchang min siamsak a, min tihuai sawt bawk.... hehe )

'Kristian Chhungkua' tih thupui hi kohhran ho leh khawtlangah te seminar leh consultation te neiin kan lo nei fo tawh thin a, a hming han lam rik atang ringawt pawh hian kan rilruah a ruangam tur chu kan mitthla thei nghal maiin a rinawm a, kan zingah a mikhual tawh lo hle mai a ni. Chutia kan zinga mikhual lo hle e ti lo chuan....Kristian Chhungkua din erawh zu har fu a maw le.....! A har em avanga tlanchhiatsan mai chi lah ni hek suh, Kristian kan nih angin Kristian chhungkaw din erawh kan mawhphurhna a ni miau si a, a bik takin Lalpain a luah chhungkua emaw Lalpain a awmpui, a pawl thin chhungkua emaw nih hi kan thupui innghahna tur chu a ni e. 

'Kristian Chhungkua' tih hi a pawimawh hle mai. Kristian Chhungkua tih chu a tawi thei ang berin sawifiah dawn ila, Kristan a luah chhungkua tih hian a sawifiah mai awm e. Chhungkua hi Krista tel miah lo pawhin a din theih tak meuh meuh va, Kristian Chhungkua erawh chu amah Krista (Lalpa) tel miah lovin a din theih tlat loh. Sawi tawh angin chhungkua chu tam tak i din thei a ni mahna, mahse Kristan a luah leh chenchilh chhungkua a ni lo thei tlat. He lai te hi hrechiang hmasa ila, hemi thuah hian kan chian phawt chuan kan thupui sawi tum ah hian mark 50% kan hmu sa tihna a ni. Chhungkua kan din dawn hian a pawimawh ber ber lai hi kan hlamchhiah fo thin a, chu chuan khua rei ah chhungkuaah harsatna min siamsak leh chawk thin. 

Rev.Dr.Kenneth Chafin chuan, "Chhungkua ber a fuh tawh loh chuan khawvela eng pawl mah a fuh tak tak thei lo," tiin a lo sawi a, he thu hian finna a va pai tam tak em...! Ka rilrem zawng tak leh ka pawm zawng tak a ni e. Khawvelah hian pawl lian tak tak leh ropui tak tak te a lo dingin a lo keh chhe fo tawh thin a, chung thil tichhetu bul pui ber chu chhungkaw in relbawl dan fuh lo leh Lalpan a luah loh chhungkua atangin a intan niin ka hmu ve tlat. Engvangin nge chutianga i sawi huai viau? in ti a ni mai thei. A chhan chu Kristan a luah loh chhungkuaah chuan hlemhletna,  tualthahna, sual pawisak lohna, rukrukna leh thil tha lo tin reng a rawn chhuah thin vang a ni. Lalpan a luah leh awp beh tlat chhungkua atang erawh chuan khatiang kan sawi tak sual chi hrang hrang kha a chhuak ve tlat lo. Chhuah a hnekin a doral lian ber a ni zawk. 

Chhungkua tih hi zaipawl (choir band) nen an lo tehkhin fo thun a, kan thu sawi tum a fiah theihnan i han tuihnih teh ang. Zaipawlah chuan a part chi hrang hrang a awm a, supprano,  contralto, tenor, alto leh bass tiin. Heng part hrang hrang te hian anmahni part theuhvah hneh taka an dinchhuahpui theih hunah zaipawl zai nalh tak kan ngaithla thin ang hian chhungkuaah pawh 'Pa' dinhmun a awm a, 'Nu' dinhmun a awm bawk a; tichuan 'Fate' dinhmun a awm leh a, chu mai bakah mo or makpa dinhmun thlengin a awm a ni. 

Bass part satu chuan a air (supprano) ah va sak ve phet tum se la, a nih loh leh tenor khan contralto sak ai va chuh fo se la.....kha zaipawl khan a nih dan tur a ni pha tawh lo vang a, nalh taka zai ri mawi chhuah chu sawi loh, ngaihthlak tlak awm lo khawpin a chhuak thei a ni. Chutiang bawkin chhungkuaah 'Pa' dinhmun a awm a, Pa chuan a dinhmun kalsanin 'Nu' dinhmun kha va chuh tlat se la, a nih loh pawhin Mo/Makpa khan a pi/pu dinhmun emaw fate dinhmun emaw luah tum phet se la,...faten nu leh pa dinhmunah din tum phet se la, kha chhungkua khan a hmabak chu a thim hle ang a, keh chhiat chiah a hmabak a ni. Chuti ni lo va anmahni dinhmun theuhva an din a, rem taka an inchuktuah chuan chhungkaw ngial nghet an din zawk ta thin a ni.

Chhunzawm leh atan......

Photo : Google Image