Zo Vapual

Engvangin nge Chanchin Tha hi hril a tul?

C. Lalmuankima

Newcastle, United Kingdom

Bible bung leh chang : Mark a 16:15; Tirhkohte 1:6-8; 17:11; Matthaia 28:18-20.

Chu zawhna chu a van mawlthlak deuh ve in ti mai thei. Mahse a mawh lo ve.... kohhranin a nih dan tur leh a tih tur a tih loh chiah hian kohhran chuan a thanmawh phah a, Thlarau lamah a chauh phah a; kohhran nunglo kohhran thi kan tih phah thin. Pathian ringtute, Pathianin ringtu hnena a hnathawh tura a thupek ropui ber leh ngaih pawimawh ber mai chu Chanchin Tha hril hi a ni miau si a. Chu chu ringtu hna tur reng a ni. Chu hna chu ringtuin a tihpuitloh ni apiangah kohhranho te zingah ngetna leh hri tha lo tak tak a lo thleng thin a; kohhran thi leh ro a lo awm phah thin a ni.

Photo : Google

Kan thu sawi tum a fiah theihna he tehkhin thu tawi te hi i han zep tel teh ang: Tum khat chu khaw pakhatah hian an Biak in sira an tar signboard ah hian 'Krista Chanchin Tha kan ril thin...' tih hi an tar a, an hlim em em mai a; an thu sawi te pawh miten an ngaihven em em mai a; an kohhran pawh a nung em em a ni. Khua a lo rei deuhva chu an signboard tar chu hnim hnah tawm leh hlingin an bawm khat ti tih a; 'Krista Chanchin Tha kan hril thin' tih chu hliahin '....kan hril thin ' tihna lai chiah hi a lang ta a, chumi hnuah chuan kohhran rawngbawlna pawh a tlak hniam phah a, an nunglo sawt em em mai a; an zuih ral ti tih ta mai a. Chutia an zuih ral mai tur chu thlarau lam miten Pathian an han auhva an han tawngtai leh chuan.....kohhranho hruaitute nen an han ngaihtuah let a: 'Thu sawituten Krista Chanchin Tha ni lo khawvel chanchin tha dang kha sawi an lo ngah ta lutuk a, kohhranin a dinchhan ber mai Krista Chanchin Tha hril chu an lo hlamchhiah reng mai tih an hmu chhuak ta a.... Chumi atang chuan inzir chhuakin kohhranho zingah chhunglamah leh pawn lamah siamthat hna an thawk chho ta a, an signboard hliahtu hnim hnah leh hling te chu an sam fai a, tichuan a tira an signboard ngai an tar ang ang chu a lo lang leh ta a, chumi hnuah chu kohhranin hma a sawn ta em em a, a hma aiin Chanchin Tha hril kawngah an phurin an nung ta em em a ni.

Kan sawi tum chiah sawifiah leh vak chuan tur awm lovin a fiah hle mai. Kan sawi tak tehkhin thu atanga kan zir tur pawimawh ka tih em em mai chu: Krista Chanchin Tha ni lo chanchin tha dang hi kan thupui ber leh thal tawp khawpin kan hril palh ang a, kohhran ah nget leh ro na a lo chhuak palh ang tih hi a hlauhawm hle a ni. Kohhranin a tih tur a tih loh leh a thupui ber Krista Chanchin Tha hril hna a hlamchhiah hun apiangah kohhran ah ro na leh nget chi hrang hrang a lo chhuak ang a; pakhat leh pakhat inkarah in hmangaihna leh in ngainatna a tlakhniam phah ngei ang. Hei tak hi tunlai khawvel changkang tak tak Europe leh a chheh vel ei chhe mektu nget lian tak a ni a, pulpitah thil dang chanchin tha kan sawi tam ta lutuk hian kohhran rawngbawlna a tithuanawp thin a ni. Chuvangin kohhran hna pui ber leh pawimawh ber hi dik takin i hril zel ang u. Chanchin Tha hi kan hril loh chuan nakinah Pa hmel kan hmu ngam dawn em ni...? Vanram kan thlen hunah zawhna kan la tawk ngei ang, khawnge i chanchin tha lawmman chu tiin min la zawt ngei ang, chutih hunah chuan engnge kan sawi ve ang le?

Photo : Google

Kan thupui nen chuan a in persan thui ta deuh va... Engvangin nge Chanchin Tha hi kan hril? tih ah khan i han lut leh teh ang. A hmasa berin Pathian thupek a nih vangin ringtu chuan a tih mak mawh a ni a, thil siam zawng zawng hnena Chanchin Tha hril hi kan tih mak mawh a ni. Lal Isua ngeiin vana hruai chhohva a awm dawna a thupek/thuchah pawimawh ber a nih vangin kan hril thin a ni. A pahnihnaah chuan mi zawng zawng chhandama awmah leh Pathian thu hria ah a duh duh a ni. Chuvangin Chanchin Tha hi hrilh a tul thin. Tirhkohte pawh khan tihmak mawh an chunga tla a nih avangin hril lovin an awm thei lo. A pathumnaah chuan nakinah vanram kan thlen hunah kan lawmman titamtu tur a la ni dawn a ni. Chuvangin Chanchin Tha hi i hril ang u.

Chanchin Tha hril dan erawh chi hrang hrang a awm a, mite angin mission field ah kalin emaw pulpit tlangah emaw i aupui dum dum thei lo a ni mai thei. A pawi reng reng lo, Lalpan a pek che talent tha tak i nei ngei ang tih ka ring. Nangmah ngei i kal chhuak thei lo a nih pawhin i neih thil sum leh pai hmang pawhin zau takin rawng i bawl thei a ni. Chupawh chu i tan a la harsa lutuk a ni mai thei. Hei erawh i tih theih loh ka ring hauh lo, Tawngtaina hi. I tawngtaina hmang pawh khan Lalpa grape huanah i thawk ve thei a ni tih hi..... kan awmhmun atanga kan tawngtaina pawh hian nasa takin hna a thawk thei a ni tih hi i hre thar leh ang u.

Khawvel chanchin tha hi chu e...rei a daih thin lo. I lawm zat chiah kha i la tahpui leh tur a ni tlat. He lei lawmna hi chu kan lawm zat chiah hi kan tahpui leh thin. Krista Chanchin Tha erawh hi chu chutiang a ni ve tlat lo. I lawm zat tahpui a hnekin i lawmna tizualtu a ni zel ang. Chuvangin hun tha kan neih chhung hian Lalpa Chanchin Tha hi thahnemngai takin i hril zel ang u.

Lalpan kan zaa tan mal min sawmsak theuh rawh se. Vawiin ni hun hman nuam ule...

Photo : Google