Thu leh Hla

Siamthatna Chhungkua Atangin... 

C.Zomuana Pa,

Vengnuam

 Khawvelah hian ram leh hnam tha dinchhuaka nei thei tur chuan sawrkar tha din leh neih hmasak phawt a ngai a, chu sawrkar tha chu nei thei tur chuan khawtlang rorel, inpumkhatna tha neih hmasak phawt a ngai leh bawk a. Chumi khawtlang in lungrualna leh relbawlna tha nei tur pawh chuan kohhran nung leh tha din hmasak a ngai leh ta phawt mai. Chu kohhran ngel nghet leh tha nei thei tur chuan chhungkaw inrelbawlna tha din hmasak a ngai bawk a, chu chhungkaw inrelbawlna tha nei thei tur pawh chuan a chhunga cheng mimal tinte kan pawimawh ta em em a ni. 

A chunga kan han tarlan tak ang khian mimal tin te nunah Pathian tihna tak tak a awm loh chuan chhungkaw inrelbawlna tha a neih theih loh va, chhungkua ber a tlakran/tlakchhiat chuan chawplehchilhin kohhranah a pakai nghal a, kohhrana innghirnghona, thatlohna chuan khawtlangah a nghawng chho ta zel a,  khawtlang in awpna leh inrelbawl dan a dik loh viau chuan ram leh hnamin a tuar ta thin a ni. Chuti a nih chuan siamthatna hi khawi atangin nge bul kan tan tak ang le?

Thufing pakhat chuan,"Rinawmna hi hmangaihna tilang fiahtu ber a ni," a tih angiin ram leh hnam, sawrkar, kohhran leh khawtlang, chhungkua leh mimal nun thlenga siamtha tur chuan mihring hi a rinawm hmasak  phawt a ngai a ni. Ram leh hnam kan hmangaih tak tak a nih chuan rinawmnain bul kan tan hmasa phawt tur a ni. Tunlai khawvela ram thang/changkang mekte zinga lar tak S.Korea ram chanchin kan hmuh atang ringawt pawh hian hringnun tha-in mi a siamthat danglam theihzia chu kan hmu thei awm e. Kan fakna hla siamtutena an lo sawi angin 'Mihring chauh lo chu zirtir an ngai lo....' a tih angin chu hringnun insiamthatna bul chu Rinawmnaah a innghat a ni.

Rinawmna chuan mihring hi mihring tak takah a siam a; a tizahawm a, midangte a tithlamuang a, a tihlim thin. Chu rinawmna kal tlang chuan miin ram leh hnam an lo siam tha fo tawh thin a, chuvangin hringnunah hian thil hlu a tling tak zet zet a ni. Sum leh pai aia hlu; rangkachak leh lunghlu ai pawha hlu zawk; khawizu leh khawi thlar aia thlum si, mihring tana lallukhum mawi tak leh ropui leh hlu, Pathianin mihringte a pek chu rinawm theihna hi a ni a. Chu rinawmna chu chhungkuaah kan innghahna bul ber ni fo se la, chu rinawmna hmang chuan chhungkua, kohhran leh khawtlang, ram leh hnam hi kan siam tha thei chauh vang.(?) Rinawmna hi miin a hloh tawh tawh chuan chu mihringah chuan engmah beisei tur a awm tawh lo tihna a ni.

"Khawvel hi engtianga awm nge a nih tih mai pawh ni lo, tun hnaiah leh nakina a awm zel tur enna khawl chu Chhungkua hi a ni." tiin Garner Murphy chuan a lo sawi a. Kan chenna leilung khawvel tana X'Ray tha ber mai chu Chhungkua hi a ni a tihtheih awm e. Chhungkua ber a tlakbal a, a tlakchhiat tawh tawh chuan a siamthat lehna leh a tihdam lehna a vang tawh khawp ang a, khawvel hian beiseina pakhat mah a nei tawh lo tluk a ni.

Rev.Dr.Kenneth Chafin pawhin,"Chhungkua ber a fuh tawh loh chuan khawvela eng pawl mah a fuh tak tak thei tawh lo," a lo ti tawl mai le. Ni e, he khawvela eng pawl pawh hi chhungkua atanga rawn irhchhuak, bul tanna tha a awm loh chuan a tum leh ilo chu tha viau thin mah se, milem/milim mawi tak engmah titheilo ang mai a ni a, a that tur ang leh nih dan tur ang a ni pha tak tak ngai lo vang. Chhungkaw nun hi darthlalang nen tehkhin ta i la. Khawtlang darthlalang ber chhungkua a fuh tawh loh chuan khawtlangin a nih tur ang a ni pha tawh ngai lo vang. Khawtlang nun chhia chuan ram leh hnamah chawplehchilhin a nghawng chho nghal a, ram leh hnam a chhiat chuan kan zavai chhiat a ni ta ber mai.

Thil reng reng chu mawhphurhna nei ve nia inhriatna hian nun a tihlim a, neitu chan a chantir a, taihmakna bul pawh a ni. Tih tak takna nun min pe a, hlawhtlinna bul a ni. Mawhphurhna nei ve nia inhriatna chuan mi a tihuaisen a, mi puitling nihna leh finna leh remhriatna min pe bawk. Chuvangin tun dinhmuna i mawhphurhna kha eng nge ni le? Chhungkaw pa ber i nih chuan chhungkaw awp lum hna chu i tih tur hmasa ber a ni phawt mai. Zu hmun atang leh thenawm te in atang chuan chhungkaw nun chu siamthat a har hle ang. Chanchin tha hril tih avanga nupui fanaute ngaihsak hmanlo leh enkawl hmanlo khawpa kan buai a nih chuan i in chhung khur atanga rah tha rawn chhuak lawh tur a vang hle bawk ang. Tehkhinna thawnthu an sawi fo thin te pawh hriat chhuahtir uai uai mai. Rawngbawltu hmingthang tak mai a ni a, a nupui fanaute ngaihsak hman lo khawpa ramthim lam vei mi a ni bawk. Tum khat chu ramthim lam nawr eng tura a kal chhuak chu a nupui hnen atangin lehkha thawn a dawng ta tlat mai. Eng dang a ni lo, 'i in chhung ramthim tak hi rawn nawr eng hmasa phawt la, tichuan thenawm ramthim pawh i nawr eng thei ang...' tih hi a ni. A dik viau mai le, mahni in chhung ramthim tihen hmasak hi chhungkaw pa ber kan nih chuan kan tih mak mawh a ni chiang. Chuti ni lo va, mahni in chhung thim tak pawh tieng hmanlo khawpa thenawm ramthim kan vei ve ringawt a nih chuan chhungkua chuan tlakranna bak hmachhawn tur a nei tawh lo tihna a ni. Ramthim vei hi kan sawisel miah lo, ringtu Pathian tihtu kan nih tak tak chuan ramthim vei hi kan tih tur leh Lalpa rawng kan bawl theihna a ni na rawh e, amaherawh chu mahni in chhung ramthim tak kal kana thenawm ramthim kan vei thin hian kohhran, khawtlang, ram leh hnamah nghawng tha lo a chhuah ta thin a ni.

Tichuan chhungkaw nu ber tan pawh pasalte ngaihsak leh fate enkawl leh nunkawng tha zirtir thin hi a hna chu a ni. Nu nih chu a awl a, nutling nih erawh chu thil har tak a ni thung.  Thenawm khawvengte sawisel leh rel zut zut chung chuan nu tha leh nu tling nih chu a har hle ang le. Nute dinhmun han sawi dawn hi chuan Lal ropui tak Napoleon-a kha rawih a ngai leh thin. 'Ka pu, kan ram hian engnge a mamawh ber?' tiin a hoten an zawh khan "Nute" a ti a nih kha. Nute hi an va hlu tak em! Nute  hlutna leh pawimawhna pawh hi a nep chuang hauh lo mai. Chuvangin fate nun kawng khalh ngil tur leh chhungkaw nun siamthat hna thawk tur hian nute hi a kila lung pawimawh leh tangkai ber te zinga mi an ni ve tlat. 

Chhungkua fate mawhphurhna pawh hi a dang leh a, chhungkuaa faten an tihtheih atana tha leh sang ber mai chu Lalpa tih chunga nu leh pate thu awih/zah hi a ni. Nu leh pate hi kan lei pathian an ni si a, an thu thuin kan awm tur a ni bawk. Kan Bible-in min kawhhmuh angin nu leh pate thu awih hi malsawm dawnna a nih rual rualin dam reina pawh a keng tel nghal bawk a ni. (Eph. 6:3 ; Thuf. 6:20) Tunlai kan thalaite zingah sum zawnga nu leh pate chawm thei kan awm ta nuk a, a lawmawm. Chutih rual rual chuan sum zawngtu kan nih vanga nu leh pate chunga mawi lo taka che thin kan nih erawh chuan a fuh hauh lo vang. (Sum zawngtu nih vanga nu leh pate hnuaichhiah tum tlat hi an awm thin.....) 

Chhungkua hi lungthu angin tehkhin i la, lungthu a tang hian a tehkhin thu i han zir dawn teh ang. Lungthu chuan ke pathum a nei tih chu kan hre theuh va, a ke pathuma a din chiah hian a tanhmun a nghet a, a tanhmun a nghet mai ni lovin nasa taka rit pawh a dawl zo a ni. A ke pakhat a chhiat vaih erawh chuan a dinhmun a nghet lo va, a pel he zo va, amahin a ding zo va, engtihna atan mah a hman tlak tawh lo ang chiah hian chhungkua pawh hi kan tehkhin tak lungthu ang khian pa dinhmun a awm a, nu dinhmun a awm leh a, fate dinhmun a awm bawk a ni. Chung dinhmun pathum te chuan lungrual taka an dinhmun tur ang theuhva an tan theuhvin chhungkaw ngel nghet an din thei a, chu chuang khawtlang leh kohhran, ram leh hnamah rah tha a chhuah thei ta thin a ni.  Chuti ni lova pa-in a dinhmun tur ang a hauh loh emaw nu pawhin chuti bawk- fate pawhin chutiang bawka an dinhmun tur an hauh loh chuan chhungkaw hmasawnna aiin tlakranna a thleng thin a ni.

Dr.Billy Graham-a thu sawi atang hian thu hmawr i han bawk dawn teh ang. "Tunlai in tha, bungraw famkim leh cheimawina kim hian chhungkua a siam thei lo. In chhung hi Hotel emaw, mite chawlhna leh chaw eina a ni mai lo va. Thlarau lam thiltihtheihna leh inzirtirna hmun he leia awm, van hnaih ber chu a ni." tiin. Chhungkaw din takah chuan remna, muanna, hmangaihna, thlamuanna, hahchawlhna leh Thlarau lam thiltihtheihna leh zirtirna tha a awm (reng) a ni.

Chuvangin thenawmte in atanga chhungkaw nun bul tana siam that tum i nih chuan lei benthelh a hlauhawm loh tluka chiangin i fel (fail) sa a ni ang a, tuna i hnathawhna hmun leh zirna run in sang i belhna hmun atang pawh khan chhungkaw siam that hna chu thawh tum duh suh. I hlawhchhamna khua tithuitu a ni palh ang e: Siamthatna i tanna hmun tur dik tak zawk chu i in chhung khur, i chhungkuaah ngei khan ni se la, kohhran leh khawtlang, ram leh hnam chu i siam thain rah tha i chhuah thei ang.


Lehkhabu rawnte : @ The Holy Bible
                                @  I Hun Leh I Nun            B.Lalhriattira
                                @  Nunkawng Entu           Khatla Kohhran Social Front Comittee

---

Hringnun Olympics
By Khuma Chhakchhuak

Tungchho a kal mihringte kan lo dinchan chhoh zel dan ngaihtuahin thil pakhat la dik chho zel a awm tlat mai. Chu chu ‘Survival of the fittest’ tih hi! Greek mi te’n an lo tan a, vawiin thlenga khawvelin ropui taka kan la hman chhoh zel Olympic Games -ah hian, sports -chi hrang hranga talent -nei tha te’n an thiam leh finna zawng zawng chu theihtawp chhuahin khawvel hmaah an pho lang thin a ni lawm ni.

Tunlai khawvel kan thlirin keini Mizo te paw’n kan ram(India) pum level la phak chiah lo mah ila, kan changkang sawt ve hle a ni. Kan ramah University- kan nei tawh. IT department- pawh hmanni lawk khan a ding ve ta bawk. IT/Computer Science subject -lam leh Mathematics- lam zir te pawh kan pung ve tial tial e. Doctor- zir ringawt mai kan tum bur vek tawh bik lo. Thil pakhat ah chauh fittest- nih ai chuan thil tamtak-a fittest -nih a tha zawk e. Olympics- hman zawh chiah ah pawh Chinese- ho an che tha hle mai. Achhan chu sports- tamzawkah fittest- nihna an hauh tlat vang a ni.

Changkanna lamtluangah hian a tha lam a awm ang bawkin a chhe lamah pawh hma a sawn chak hle theih tho. Hmanni deuh lawka TOI-in a tarlan dan chuan ram changkang-developed countries- ho data- pawimawh a bo nual a. Canadian researcher- hovin an chhut dan chuan hackers- ho hi Chinese ho ni ngei turah an ngai a, Asia-khawmual puia ram lian ber kan thenawm ram mai khi a lo changkang chak khawp mai. US- leh ram changkang tak takah te zir turin an thalai te an inthawnchhuak zung zung reng a, hna an va thawk thei nghal zel a, an ramah sum an thawn haw leh chur chur bawk a. Income -tamtak an siam a ni ringawt mai. IT -lamah chuan India -ram pawh hi a ber hauh te zinga mi kan ni. Ama’rawh chu, IT field -a Mizo thawkte erawh kan la chhiar phoh phoh theih tlat mai. Hmabak tamtak kan la nei a ni. Kan thianpa sawi ka la hriat reng chu, “Keini Mizo te hi zawng syllabus lam aiin non-curriculum- thil kan thiam phian zawk thin hi chu a pawi ngawt mai.. ” a ti hial a. A dikna tamtak a awm tlat a ni. Tum bulbal nei lem lovin a lo zir thui ve hle theih dawn tlatin ka hria. Ama’rawh chu; “ka tum nge ruh saruh” ti te pawh kan zingah an lo awm ve zel bawk a. Delhi a kan hmuh mai theih ah chuan IAS/IPS/IFS etc nih tum rana lehkha zir te an thahnem hle a, an entawn tlak hlein ka hria.

Recession- boruakin min nangching chho a, ram hausa ber US- ngei pawh a buai ve hle zawng a nih khu! Obama- pawh a lu a hai ve thei viau ta ve ang. Company- lian te lah bang bik lo, an policy- te revise- chung zelin sumdawn dan thar- new strategy- te an duang chawp a, tan an la nasa hle mai. A thenin salary- an cut emaw an pun loh laiin, a then erawh chuan cost cutting- an lo ti ve bawk. Hei vang hi aniang satya- lamah pawh current- neih loh avangin zan hnih thum chu a lum hle a ni awm e. He recession- boruak hi company –fit- deuh te chuan an survive- chho mek tho. India rama company- lian ber berte chuan hnathawk tur recruit- an la bang chuang lo. An chhuanawm zawng a ni.

South India a IT/BPO- hnathawk hovin policy - pakhat an chin thar tha ve em em chu ramdanga inzarpharh tumin foreign language- an zir belh chur chur mai. European language- te leh Japanese- tawng zir an pung sawt hlea chhut a ni bawk. Keini Mizo ten kan National language- kan zir peih loh laiin mi fate chuan foreign language- an lo zir leh der tawh nia. Ram pum huapa literacy % sang tak kan neih mai te hi duhtawk lovin scholar- kan pun chhoh zel a van pawimawh tak em! Thil reng reng chu tumna a awm a, kan beih fan fan chuan hlawhtlinna pawhin min lo hnaih nge nge thin a lo ni.

Tamil- ho khu English leh science subject- ah te thiam vak lo, Maths- a thiam hle thung si an tam ngawt mai! An tette atang an lo ngai pawimawhin an lo thlurbing bik subject -zuk ni tlat a! Chuvang chuan talent- kan neih that bikna theuh hi thlur bing bik a tha hle ang. “Practice makes perfect” an lo tih kha maw!! Kan tuina theuhah kan thlen san theih ber thleng rak thlen tum phawt mai ila.

Awle, a pawimawh hmasa ber chu tumna (ambition) chiangkuang tak neih phawt a, chu kan tum ram chu thleng thei ngei tura chhum lo chat lova kan tang fan fan peih tikah he hringnun Olympics- ah hian Mizo te kan inphochhuak ve thei ngei dawn a lo ni.