Zo Vapual

Kristian thalai chu a taima tur a ni (Johana 5:17; Ephesi 4:28; I Thessalonika 3:10 )

C.Lalmuankima

Newcastle

United Kingdom

Ram ropui tehna chi khat chu 'hausakna' hi a ni awm e. Chu hausaknaa ropui leh zah kai tur chuan kha ram kha a taihmak hmasak phawt a ngai a, chu taihmakna chuan hlawhtlinna a thlen ta thin a; taihmakna tel lovin ram ropui leh thiltithei a din theih loh a ni.

Photo : Google Image

Thufing pakhat chuan, "Mi that chhe tan nitin mai hi awl ni a ni" a ti a, "Mi taima tan erawh chuan nitin mai hi thawh ni a ni." a ti ve thung a. He thufing hi tha ka ti hle mai. Mi that chhe tana nitin mai hi awl ni a nih laiin mi taima tan erawh nitin mai hi thawh ni a lo ni si a. Mi that chhia chuan a hma khua a ngai ngai lo va, a tawpah a tawrh phah thin. Mi taima erawh chuan a hma khua a ngai thin a, harsatna a lo thlen huna a do zawh dan a lo zir lawk thin. Taihmakna hmelma lian ber mai chu that chhiat hi a ni a, that chhiatna chuan hlawhchhamna a hring chhuak thin.

Kan hnamin a neih ro hlu ber mai chu Thalaite hi an ni. Chuvangin kan Thalaite nunah hian taihmakna hi bet tel tlat se la, ram leh hnam hian a va thlamuanpui dawn teh reng em.....! A thlamuanpui chauh ni lovin rah tha a chhuah ang a, ram leh hnam tan malsawmna a thlen ngei bawk ang. Kristian kan nih angin Bible in min zirtirna thu hi kan dah lal ber zel tur a ni a, Kristian thalai chu a taima tur a ni. Bible - in 'Thawk peih lo chuan ei pawh ei suh se....' (I Thes 3:20) tiin min lo hrilh reng a, Kristian te chu Kristian ve lo te aiin kan taima tur a ni.

Photo : Google 

Taihmakna hi a thu (theory) ngawta inzirtir a tha mai chi a ni lo va, a theory piah lama a taka chet chhuahnaah hian hlawhtlinna a lo awm thin a ni. A theory zawng chuan kan inzirtir tam tawk viau tawh e, mahse a taka zawm emaw thawh emaw in a zui loh chuan tiau pho chunga tui leih ang maiin a tham ral leh mai ang. A taka thawh chhuah naah hian a ni hlawhtlinna chu a lo awm ni.

Kan chenna leilung leh a chhunga awm zawng zawng siama enkawltu ngei pawh khian taihmakna in bul min lo tan sak tawh a, kan Pathian khi that chhe Pathian a ni lo va, taima Pathian vawiin ni thlengah kan hnena a hnathawh te thulh ngai lo Pathian a ni. Kan Pathian ngeiin kan chenna leilungah hian hausakna chi tin reng a lo phum ru teuh mai a, chumi chu taihmak chhuaha hai peih a piangin leilung hausakna hi an hai chhuak tam mai a ni. Chuvangin kan Thalaite nunah hian taihmaknain bu khuar nghet tlat se la, kan ram leh hnam hian engtikah mah tlak chhiat ni kan nei leh tawh ngai lo vang.

A hma lama Kan sawi tawh ang khan mi that chhe tana nitin mai hi awl ni a nih laiin mi taima tan erawh chuan nitin mai hi thawh ni a ni ve thung.

Chuvangin kan chenna leilung hi mi thatchhe tan chen peih na tlak a ni lo va, mi taima tan erawh chuan chhuahsan phal chi a ni lo ve thung. Kan chenna khawvel hi mi taima te, rem hria te dinchhuahna, hlawhtlinna, din channa khawvel a nih laiin mi that chhia te; tlak chhiatna, hlawhchhamna, tlakranna khawvel a ni ve thung.

A bul tan that chu a zat ve zo ang kan ni....tia thufingin a sawi angin kan Thalaite nunah hian taima turin chi nung kan in tuh ngheh a ngai a, chu chi nung chu kan in tuh luh theih phawt chuan kan hnam hian engtikah mah tlakchhiat ni kan nei leh ngai tawh lo vang.

Photo : Google