"Burma Where Next?" Burma Day

by LM Kima

Ni 3 November 2011 Inrinni chawhnu dar 2 atanga chawhnu dar 4:30 vel thleng khan "Burma Where Next?" Burma Day (sawihona leh presentation) kan hmang a ni. Subject hi pahniha then a ni a, subject pakhat zawk chu Burma-Where Next? tih a ni a, Ben Rogers-a (Christian Solidarity Worldwide) hnen atangin kan ngaithla a, kan hlawkpui hle a ni. Tichuan zawhna leh chhanna hun te hman zawh a nih hnuin Rohingya hruaitu pakhat hnen atangin presentation kan ngaithla chhunzawm nghal. Presentation hi darkar chanve chuang kan ngaithla a, tichuan presentation neih zawhin zawhna leh chhanna neih chhunzawm nghal a ni. Tichuan zawhna leh chhanna kan neih zawh hnuin rei lo te kan chawl zuai.

Tichuan subject pahnihna kan ngaihthlak chhunzawm nghal a, thupui pahnihna chu "Free the political prisoners" tih a ni a, Tony Fairman-a (Amnesty International) hnen atangin fuihna thu chah kan ngaithla leh a ni. Tony-a hnen atanga thu tha tak tak kan ngaihthlak hnuin zawhna leh chhanna hunin kan hmang chhunzawm nghal. Tichuan chawhnu dar 4:30 velah kan zo fel thei a, tichuan a group-a thlalakna te kan nei a ni. 

Burma-Where Next? hi St. Andrew's Church, Short Street, Waterloo,London, SE1 8LJ a neih a ni. Mi 20 tha vel kan kal khawm.

Hmeichhe tan zu in a tha lo lehzual

Swedish scientist-te chuan zirchianna an neih thar zu in nasat hi mipa aiin hmeichhe tan a a tha lo lehzual niin an sawi a, zu hian hmeichhia thluaka serotonin system chu mipa thluak aiin a khawih chhe rang zawk niin an sawi.

Zirchianna  neitu te  chuan  hmeichhe  zu in  nasaah  chuan an  thluaka  serotonin system zu in a  tihchhiat dan hi  kum 4  vel atangin a lang tan niin an sawi a, chutih laiin mipaah chuan kum 12 vel atang a lang ve tan chauh, an ti.

    Serotonin chu hormone pawimawh tak, kan mood (hlim leh hlim loh) control tu a ni.

University of Gothenburg, Sweden-a Department of Psychology leh Sahlgrenska Academy-a mithiam ten zirchianna hi neiin, an zinga mi Kristina Berglund chuan, "Neuroendocrine technique hmangin zirchianna hi kan kalpui a, hemi hmang hian zu  in thluak a khawih dan kan hrechiang thei ta a. He system hian impulse control leh mood bakah thluak hnathawh dang a khawih dan te kan hre thei ta a ni," a ti.

Hmanlai kan pi puten pathian an ngaihdan

Kan pi pute chuan pathian hi chi hrang pali awmin an ngai a.

1. Puvana 

Puvana hi chu khawpui ri siamtu leh tiritu a ni. Van chhuatlaiah a thleng pui a hnuk ri rum rum thin; leia miten chu mi thawm chu, 'Khawpui a ri,' kan lo ti thin. Puvanan a thlengpui a hnuh rual chiahin tui huai a lo thawk chhuak ve a, tekah a lo chang a, a duh duh a rawn deng thin.

2. Vanchungnula

Vanchungnula hi chu ruah chunga thuneitu a ni, leia miten tui an mamawh veleh a chawi a, leiah a zuk leihbua a, leia miten 'Ruah a sur,' kan lo ti thin a ni.

3. Vanhrika

Vanhrika hi chu lei leh van finna leh thiamna (Science) vawngtu, lei mite hnena pe chhawng thintu a ni; a hnen atangin Lalruangan dawi a la chhawng a nih nghe nghe kha.

4. Khuavang (Khuanu)

Hei hi chu lei leh vana malsawmna vawngtu a ni. A hnen atangin mi tinin malsawmna an dilin an dawng thin. Tin, rama chaw ei dawn apiangin, 'Khuatlai' tiin chaw leh hmeh tlem te an pe ve ziah tur a ni.

Thu lakna : Mizo Pi Pute Leh An Thlahte Chanchin

                 K. Zawla

US Secretary of State Hilary Clinton-i Myanmar (Burma) ah

Vawiin khan US Secretary of State Hilary Clinton-i chu Myanmar sawrkar nena inbe turin Myanmar khawpui Naypyidaw a thleng. US Foreign Minister pi Clinton-i hi tukin zing khan Myanmar sawrkar hruaitute nena inhmu turin a vawi 1 na atan Naypyidaw a rawn thleng a ni. 

Photo : DVB

President U Thein Sein telin Foreign Minister U Wanna Maung Lwin, Speaker of the Lower House of Parliament Chairman (Pyithu Hluttaw) U Thura Shwe Mann, Speaker of the Upper House of Parliament (Amyotha Hluttaw) Chairman U Khin Aung Myint te chuan US Foreign Minister pi Clinton-i chu President office ah an kawm a ni.