Zo Vapual

Lalpa tellohna hmun apiang hi Hremhmun a ni a, Lalpa telna hmun apiang erawh Vanram a ni ve thung. .....tih thu hi.



I nunah khan Lalpan Lalna a chang thin em? Nge Lalpa khi chhiahhlawh ang leh inhlawhfa ang lekah kan ngai zawk? Chhiahhlawh anga duh hun huna tirh phar tawk lekah leh inhlawhfa anga kan mamawh hun chauhva koh leh thawhsak turin rawih/koh kan ching zawk...? I nunah khan Lalna a chang tak tak em...?



Photo : Google Image

Lalpa khi i nuna Lalna a chan dawn tak tak chuan Nangmahah ngei pawh sawithiah tur (paih ngai) tam tak a awm a ni. Lal Isua ngeiin tu pawh a kraws pua mi zui duh chuan nitin hrehawm pawi sa lovin a kraws puin mi zui rawh se...a tih ah hian mahni nun inphatna a tel nghal a, rawngbawlnaa ke kan pen tak tak dawn hian kan chenpui chhungte ngei ngei pawhin min daltu an ni tel ve leh tlat thin. Chu aia min daltu, pal tlang harsa ber mai chu keimaha Keimah hi a ni fo thin. He kan pianpui tisa thinlung mizia hian min hnuk bet tlat thin a, chu ngei chu Lal Isua Krista thisen hmanga nitin Hnehna puan khum a ngai ta thin a ni. Chumiah chiah chuan nitin a kraws put theihna a awm. Hei ngei hi a ni Tirhkoh Paula ngei pawhin,"Nitin ka thi thin...." a tihna hmun ngei kha a ni.



Nitin a kraws puin mi zui rawh se....a tih avangin put zeuh zeuh leh ni kar thlak a put a kawk lo va, nitina kan tisa thinlung mizia rawn in lar thin kan tih thihna hmunah chiah hian kan hriat loh hlanin nitin a kraws kan lo pu ta thin a ni. (Keini zawng, ni khat kan pu a, kan sim ti tih mai emaw ni tih turin kan kraws put lai hi kan hlamchhiah fo thin......) Mahni nun theuh i in enfiah ang u. Nitina a kraws putna hmunah chiah hian a ni Lalpan kan tana a buatsaih, kan chan tura a ruat chu kimchang taka kan lo chan thin ni.

Lalpa telna hmunah chuan eng anga harsatna, manganna leh tihduhdah na thlengin tawk thin mah ila, nun chhungril berah Hlimna leh Lawmna thu ruk, thlamuanna thuruk a lo awm tlat. Lalpa tellohnaah erawh chuan lei lam thilah eng emaw zat pawh neiin in chhek arbawm luih mah ila nun chhungril berah zawn ruk kan la nei fo thin. Lalpa tellohnaah chuan nun a kim thei lo va, kan dawn tam poh leh kan mittui a tla tam tihna a ni.

Israel faten anmahni hruaitu Mosia leh Pathian a tih thinur laia Mosia thu sawi hi a tha ka va ti thin tak em....... "LALPA, kan zingah i tel ve dawn lo a nih chuan i vana ka hming i chhinchhiah kha thai bo mai rawh..." tiin Pathian a lo kar a. Tichuan Pathian, khawngaihna ngah, thinnel leh lainatnaa khat thinlung chu a lo tui ral a; Israel fate chunga a thinurna leih buak tum chu a lamlet leh ta a ni. Mosia hmanga Pathian inpuanna hi a ropui ka ti.

Kan sawi tak ang khan Lalpa tellohna hmun apiang hi chu Hremhmun a ni tawp mai a, Hremhmun hrehawmzia tur chu in hrilhfiah leh chuan vak a ngai awm lo ve. A tawi thei ang bera sawi chuan,"Hrehawm zawng zawng awm khawmna a ni tawp mai....." Vanram erawh Nuam zawng zawng awmkhawmna a ni leh phawt a, Lalpa telna hmun apiang hi Vanram a ni thung.

Billy Graham-a khan "Vanram in hmuh duh chuan ka inah lo kal/leng rawh u" a ti a, a inah khan vanram a awm tak tak tihna lam ai mahin an chhungkua kha Vanram siamtu ngeiin a awp/luah lum tlat a, Lalpan a luah chhungkua an lo ni ta a, chu lo liama Vanram chu a awm thei chuang dawn em ni...? Lalpa telna hmunah chuan nitin van nun kan tem thin tihna a nih chu.....

Mi tam tak chuan Vanram hi nakin kan taksa leh kan thlarau inthen hunah chauh tem tur leh hmin tur angin kan in ngai fo thin a, hei hi chu a dikna chin pawh a awm ang; mahse i hring cham chhung ngei pawh khan he leiah hian Vanram nun i tem thei a ni....tih hi.

Lalpa telna hmun apiang chu Vanram a ni a, Lalpa tellohna hmun apiang erawh Hremhmun a ni ve thung.