Zo Vapual

Kristian Chhungkua 

Chhunzawmna

C.Lalmuankima

Newcastle, United Kingdom

Kristian Chhungkua chuan Goal Setting (tumna) a nei tur a ni. Goal tih tawngkam hi mizo tawng emaw tih mai tur khawpin kan hmang rim a, a tawi fel thei ang bera sawifiah dawn chuan Thlen Tumna ti te pawhin sawi ta ila, a thu tum kan sawi bo em lo vang chu maw. (Thlen tumna hi goal tiin kan sawi zel tawh ang.) Kristian Chhungkua chuan goal setting tha tak kan nei tur a ni. Tum bul bal nei lo chhungkua chuan thlen tumna a neih miau loh avangin a hmabak chu thim chhah tak a ni ringawt.

Photo : Google Image

Mihring tum bul bal nei lo chu lawng karfung nei lo nen an lo tehkhin thin a, an tehkhin fuh hlein ka hria. Lawng karfung nei lo chu thliin a chhemna lam apiangah a kal a, a thlen tumnaah a thleng thei lo ang hian mihringah hian tumna bul bal nei lo te chu thli chhem len kan sawi ang khan miten an tih avanga tha ber ta emaw tiin leh mite sawi apiang leh tih apiang awiha phar buai a awl duh hle a, chu chuan kan tum ramah min hruai thleng thin lo a ni. Chuvangin Kristian Chhungkua pawh hian tum bul bal tak a nei tur a ni.

Tumna neih rikngawt hi a tawk lo va, chu kan tumna chu hmathlir (vision) kan kawp tur a ni. A nih leh chu goal chu engtia neih theih nge ni ang....tiin han inzawt ta ila. Ziaktu pakhat chuan,"Goal siam hi damchhunga kan nunphunga kan vawn reng tur a ni a, nitin goal thar kan siam reng ang a, kan tihlawhtling reng tur a ni." tiin a sawi a. Nitin goal thar siam chu i harsat a ni mai thei. Bakah vawi leh khatah i goal set kha ropui taka parchhuahtir i tum a ni mai thei bawk. I thiltih turah khan chiang hmasa phawt mai la, i bul tanna hmun tur kha han hrechiang leh phawt mai la; i tan hlawhtlinna tur kawng chu a tah tawlin a inhawng zel mai ang. Chu goal chu kan set thiam a pawimawh a, ruahmanna kan siam thiam phawt chuan kan tum ram ngeiah kan thleng thei ang. Tumna chu tam tak a neih theihin a siam theih ang a, mahse a taka kan tihhlawhtlin chuan si lih chuan awmzia a nei chuqng lo va; a taka kan tihhlawhtlin chiah khan kan goal setting ah min hruai thleng thin.

Kristian Chhungkua in a tum bul ber mai chu mi zawng zawng Krista hnena hruai hi a tum bulpui ber chu a ni. Chatuan hmuna inkhung luh vek hi Kristian Chhungkua in a tum ber a ni bawk.

Photo : Google Image

Chhungkaw pawimawhzia hriain Garner Murphy chuan, "Khawvel hi engtianga awm nge a nih tih mai pawh ni lo, tun hnaiah leh nakina a awm zel dan tur enna khawl chu Chhungkua hi a ni." a ti a. Chhungkaw pawimawhzia chu a chhunga cheng thang te chauh lo chuan hriat theih a ni lo. Chhungkuaah hian taksa chauhvin a chen theih a, kan rilru erawh a cheng lo ve thei thung. Chutiang chhungkua atang chuan inthenna/inthen darhna a chhuak fo thin a ni. Chuvangin chhungkuaah hian taksa a chen hi a tawk mai lova kan rilru ngaihtuahna te lama chen tel a pawimawh a; chu chuan chhungkuaah zung nghet tak a kaih a, pakhat leh pakhatah inpumkhatna tha a siam thin. Chu inpumkhatna avang chuan chhungkaw keh chhiatna lakah venhimin kan awm thin.

Chhungkua chu kohhran bul ber a ni. (Philemona 2; Matthaia 16:18) Kohhran hi chhungkua atangin bul tan tur a ni a, chhungkua hi kohhran innghahna a ni bawk. Chhungkua hi inzirtir mai a tawk lo va, in kaihhruai tel a ngai. Kristian Chhungkua hi zir mai a tawk lo va, inkaihhruai tel a ngai kan tih tawh ang khan.