Zo Vapual

Mahni i in el thin ang u.....( Mahni i in teh thin ang u.....) 

Japan thufing chuan,'Mite er suh la, mite el hek suh,' 'Nangmah zawk kha in el ang che' a lo ti a. Vawi tam tak ka ngaihtuah nawn leh thin pawhin a lo tha hlein ka hria. Bible-a Tirhkoh Paulan,' boruak mai hnek lova mahni inhnek thin...' a sawi nen khan a inhnaih hlein ka hre bawk.

A ni tak e..... mi er chu a tha lo law law a, ringtute tan phei chuan tih hauh loh tur a ni a, mi i el erawh chuan,'i el hnehin i hmusitin i chapo khum ang a, i el hneh loh chuan i itsik thung ang' tih hi ka rilruah a rawn lang hlawl mai. Hei vang hian a nih ka ring, tirhkoh Paula ten intihsiakna thianghlim bei zawk tura min lo chah ni. 

Photo : Google Image

Mihring nih chhung hi chuan kan mihringpui te nen a huhovin kan chengho lo thei lo va, chu a huhova kan chen ho chhung chuan nitin mai hian zir tur hi kan nei zel a ni. Mi tumahin ka zir zo tawh, ka hre vek tawh, ka thiam vek tawh a tih theih loh va; apui apang alian atein tungchhova kal mihringte hian Hringnun Zirlai hi kan zir vek a ni. Kan hringnun zirlaiin min chim chin chu a in ang lo mai thei, mahse Zirna zawng zawnga Zirlai hnuk sei ber mai Hringnun Zirlai hi chu tumahin thiam zawh, hriat zawh, zir zawh a awm thei lo va, hriat belh zel a ni a, kan hringnun a tawp hun hi kan zir zawh hun chu a ni tawp mai. Rangon pa ti ti thiam leh fiamthu thiam Pu Kawlvelan, 'Mi zawng zawng hi Zirtawpniah kan thi vek dawn....' a tih hian fuihna leh finna thu a va keng tel nasa teh reng em....! Kan Hringnun Zirlai kan tawpsan hun tur chu kan hringnun a lo tawp hunah chiah hian a ni, chu tak chu Zirtawpni dik tak zawk chu a ni.

Kan thupuiah khan kir leh dawn tawh ila, i damchhung hun tawi te ah khan mahni leh mahni inel na chang i hriat loh phawt chuan i bula mite i el apiangin i el hneh hunah i hmusit ang a, i el hneh lo hunah i itsit thung ang. Chuti ni lova mahni leh mahni in elna chang i hriat a, nangmah leh nangmah i in el phawt chuan i el hneh leh hneh lohvah i buai tawh lo vang a; i hringnun kawng kha ngil takin i khalh kal thei tawh ang. 

Mahni in el tih hian in el dan tha a awm a, chu in el dan tha chu mahni ngei inthunun hi a ni. Isua nun hmanga mahni ngei i inthunun theih hunah chuan midangte nunah i buai tawh lo vang a, midangte nun atang khan thil tam tak i zir chho zel dawn a ni. Mahni inhnuaichhiah dan thiamna hi a ringtu nun hle bawk a, Lal Isua ngei pawhin,'Mahni nun phat a tih kha....' Kha mahni nun phat, hrehawm pawi sa lo nun atang khan midangte nun pawh i chhanchhuak/la chhuak thei tawh dawn a ni. 

Isua atang ni lo, mihring lam takin kan thenawm te kan thian te, kan thawhpui te, kan pawlpui te kan teh chhung chuan mi tumah kan teh tling hauh lo vang. (Nang leh kei ngei pawh hi Isua Krista avang chauhva tling kan ni miau si a.... ) Chuti ni lova Lal Isua atanga kan teh phawt chuan mi tupawh mai hi kan lo tling ta vek a, tlinglo kan awm tawh lo a ni. Tehna dik lo thei lo chu Pathian thu zel hi a ni, mihring lam atanga i teh chhung chuan mi tumah i teh tling ngai lo vang a, Lal Isuan nun min pek hmanga i teh erawh chuan mi tlinglo an awm lo ve thung.

Lal Isua tello chuan mi zawng zawng hi Pa Pathian hmaah kan tling zo lo va, Lal Isua nunna min pek avang erawh chuan mi zawng zawng hi Pa Pathian hmaah tlinglo kan lo awm ta lo ve thung a ni.