Kan ram (Myanmar) ram hrang hrangah tui lian
A pawi tih hian a hrilhfiah zo lo a ni ber e, chhiatna zawnga chhiatna rapthlak ber te zinga mi, mite tawrh tur chauh emaw tia kan lo ngaih thin kha Khawchhak Zofate chungah a thleng ve ta tlat mai le; a pawi tih tawngkam aia thuk zawk hi awm thei se la chuan chu ngei chu kan hmang duh zawk ngei ang.
Khawchhak Zofate chunga thil thleng hi a rapthlak tak meuh meuh va, Pathian hnena tanpuina dila tawngtai ngawt loh chu kan tih theih a tlem hle mai.
 |
| Photo : Facebook Image |
Tui lianin a tih chhiat buh... leh bal, in leh lo, kawng pui inkalpawhna te hi cheng man tam tak man tur a ni. Hmun tam takah zirna sikul in thlengin khar a ni a, thil man a let eng emaw zatin a sang nghal a,...... Heng zawng zawng aia pawi ber leh rilrua lo lang lian ber mai chu, tui lianin a ken tel natna hrithalo chi hrang hrang hi a ni. Heng natna hrithalo te hian tui lian a reh hnuah pawh min la nuai dawn chauh va, mipuite pawh kan fimkhur hle a pawimawh dawn a ni.
Sawrkar tha ah chuan ramdang tanpuina te hi, chhiat tawk te hnenah a thleng pha thin a; kan sawrkar hian ram changkangte tih danin chhiat tawk te chungah hmalakna runpui nei ve thei thin se la aw....tih hi rilruah a rawn lang nghal vat a. Kum 2008 Nargis thlipui kan tawh kha kan hre theuhvin a rinawm, khatih hun laia an thiltih anga an kalpui leh a nih ngai chuan tuilian tuartute chunga harsatna lehzual lo thleng tur hi a sawiin a suak loh a ni ber mai.
Hetiang hunah te hian a ni sawrkar tha kan mamawh zia a lan thin ni..... Sawrkar tha inawpna hnuaiah chuan a ramchhunga thil te ber thlengin a thleng pha a, harsatna an tawh pawhin an in tawrhpui thiam a; a thlum a al thlengin an ei zain an chen thin. Chutiang sawrkar chu kan ram pawh hian kan mamawh ber chu a ni a, a bik takin tawngkaa sawi mai lo a taka lantir thin sawrkar tha kan mamawh lehzual.
 |
| Photo : Facebook Image |
Kan rin Pathianin kan chungah zah ngai hram se la, hei aia chhiatna rapthlak lehzual lo thleng lo tur pawhin i tawngtai mawlh mawlh ang u.... tih hi ka thlirna zawn atangin ka rawn tui hnih ve a ni e.
Tuilian tuar te leh tuar mek te, nunna hial chan ta te ka va lainat tak em..... Lalpan awmpuiin thlamuan tlat rawh se....tih hi ka tawngtaina a ni e.
 |
| Photo : Facebook Image |
No comments:
Post a Comment