Chanchin Thaa Inthlunzawm Chhungkua 

C. Lalmuankima 

Slough, United Kingdom 

Khawi hmunah pawh kalin khawi hmunah pawh thlengin khawi hmunah pawh awm mah ila, Chanchin Tha hi i vuan tlat zel ang u, Chanchin Thaah hian i inthlunzawm tlat thin ang u. Chhungkua hi Chanchin Tha (Pathian Thu) hi kan vawn tlat a, Chanchin Thaa kan inthlunzawm tlat chuan engtik lai mahin kan tisual ngai lo vang. Chanchin Thaa inthlunzawm nachang hre lo leh Chanchin Thaa inthlunzawm duh lo chhungkua bawk hi a ni tisual leh thin ni.

Thil danga kan inthlunzawmna hi chu khua a rei a, a changin inlaichinna a chhiain kan tichat fo thin. Chanchin Thaa kan inthlunzawmna erawh chu Amah kan zawmpui ber Lal Isua khian min thlah hma chu kan inlaichinna/inthlunzawmna hrui hi a chhe ngai lo ang a, a chat ngai lo bawk ang. Chuvangin Chhungkuaah pawh hian Chanchin Thaa inthlunzawmna hi a tlo ber a, khua rei a daih ber bawk thin. 

Chanchin Thaa inthlunzawm Chhungkua hi a va hlu tak em ka ti thin. Chhungkua hi khawvel thil eng eng emaw nia inthlunzawm aiin Chanchin Thaa inthlunzawm hi a lo nghet ber a, a inchhirawm loh ber bawk. Eng eng emaw ni hmanga inthlunzawm kan nih chuan kan inthlunzawmna kha kan duh anga a awm loh hunah chhungkaw kehdarhna a lo thleng thin ang. Chuvangin chhungkua hi chu thil dang hmanga inthlunzawm lovin Pathian Thu (Chanchin Tha) hmangin inthlunzawm tlat thin ila, chu chu a tlo ber a, hmelma Setana pawhin a beih ngam loh chu Chanchin Tha hi a nih tlat avangin kan inthlunzawmna hrui hi engtikah mah a chat ngai lo vang. Hawh u, kan chhungkua hi Chanchin Thain i inthlunzawm tlat thin ang u. 

I chhungkaw inlaichinna lungphum atan Chanchin Tha hi i hmang thin em tih hi nangmah leh nangmah kha lo inzawt thin ang che. I la hmang ngai lo a nih phei chuan tun atang hian hmang nghal turin thu ka rawn duh che a, engtik lai mahin i tisual ngai lo vang tih hi ka sawi sa ngam a ni. Chanchin Tha lungphum atana hman nachang hre lo leh hmang duh lote bawk hi a ni chhungkuaah buaina neuh neuh nei thin ni. Chhungkuaah buaina an nei mai ni lovin chhungkaw kehdarhna hial an tawk thin. Chanchin Tha hi chuan mi te ber atanga mi lian ber thlengin min lo fun kim ber a, chhungkua pawh hi Chanchin Tha pawn lama insuihzawm lovin Chanchin Tha chhung lamah ngei hian insuihzawm thin ila, tichuan chhungkaw ngel nghet tak kan siam dawn tihna a lo ni reng mai. 

Chhungkua hi khawvel thilah a sang thei ang berin inchherchhuan thei mah ila, Chanchin Thaa innghah nachang kan hriat loh phawt chuan nakinah kan tlakna tisangtu mai an la ni thei a ni. Chuvangin Chanchin Thain a luhpawh theih loh khawpin chhungkua hi kan inkharphuiin kan indah sang palh ang tih a hlauhawm hle. Chanchin Thain a en chhuah theih loh khawpin khawvel thilah kan kala kan inkharpui vaih chuan nakinah rorelna hmaah Chanchin Thain min inkharphuisan hun a la thleng ve ngei dawn a ni. Eng tiang khawpa hausa leh mi zahkai pawh ni mah ila, Chanchin Thaah chhungkaw lungphum rem nachang kan hre lo a nih ngat chuan kan tawpna tur hi thil rapthlak tak a la ni dawn a ni. Lal Isuan tiau dup chunga in sa leh lungpui chunga in sa a tehkhin ang khan chhungkua hi kan awm thei a ni. Tiau pho (tiau dup) chunga in sa chu thlipui leh ruahpui a lo thawh khan 'Khai le...' pawh ti hman lovin thlipui leh ruahpui chuan a nuai chhe ta mai a. A sawp chu nasa tak a ni (Matt. 7:24-27). Lungpui chunga in sa erawh chu thlipui leh ruahpuiin a nuai ve lo tihna a ni lo va, thlipui leh ruahpuiin nasa taka a nuai chung khan a innghahna hmun kha a ngheh tlat avangin thlipui leh ruahpui pawhin a nuai chhe thei lo a nih kha. Chutiang chiah chuan chhungkuaa kan inthlunzawmna leh innghahna pawh hi kan Lungpui Lal Isua Kristaah ni thin se la, kan inthlunzawmna leh kan innghahna a nghin hma chu kan nghing dawn lo tihna a ni. 

Chanchin Thaa innghat ngai reng reng lo chhungkua kan nih chuan kan hmabak hi a thim em em ringawt mai a. Chanchin Tha eng dawng ngai reng reng lo chhungkua kan nih phei chuan kan in chhungkhur hi thim thuneihna inah kan chantir mek zel tihna a ni. Chuvangin chhungkuain a ngaih pawimawh hmasak ber tur chu Chanchin Tha eng hi a ni tur a ni a. Chu Chanchin Tha eng chuan chhungkuaa a thim lai ber pawh hi a chhun eng thei a, a chhunga cheng member tinte hnenah Chatuan Nunna a pe thei bawk a, Chanchin Tha engin a chhun en theih loh khawpa thim a awm ngai lo. Chu chu chhungkua pawhin kan innghahna atan kan hman phawt chuan kha chhungkua kha engtikah mah a boral ngai lo bawk ang. Thu hmasa lama kan sawi tak ang khan chhungkua pawh hi Chanchin Thaa inthlunzawm nachang hre lo chhungkua kan ni palh ang tih hi a hlauhawm ber a, Chanchin Thaah inthlunzawm nachang kan hriat loh chuan thil dangah inthlunzawm tum sa teh mah ila rin aiin nghet takin inthlunzawm a har hle thung. 

Chanchin Tha avang a nih loh chuan unau thisen zawmpuite ngei pawh hi duhamna avangin a lo inhmuhmawh theih dawn khawp mai. Inhmuhmawh mai ni lovin a then te phei chu court-ah hial inkhin duh hial khawpa mahni thisen zawmpuite chunga rilru chhe tak pu duh hial pawh zu han awm theih a! Chuvangin Chanchin Tha (Lal Isua) tel lohna hi chuan duhamna min siamsak a, a tawpah pianpui thisen zawmpuite hial pawh mi hrangah min siam thin a ni. Chuvangin chhungkua hi Lalpa Pathianah hian inthlunzawm tlat zel ila, chhungkaw neitu Pathian avangin chhungkaw kalphung a lo fuh ang a, tichuan chhungkaw ngel nghet tak kan din zel dawn tihna a lo ni reng mai.

  

Ka Pa Theological College

C. Lalmuankima

Slough, United Kingdom

'Ka pa Theological College-a ka kalna kha tun thleng hian ka chhawr ta a ni...' Rev. Vanlalzuata

Kohhran leh khawtlang rawngbawlnaa pate hniak hnung theihtawpa ka lo zui ve thinna kha vawiin thlengin chhawr tangkai hlein ka inhre thin. Mi thenkhat chuan kohhran leh khawtlanga akul ataia inhman te hi an sawisel lek lek thin a, mahse kei ka tan chuan ka hringnun inzirna bul tanna pawimawh tak a ni ve thung a, kei chuan kohhran leh khawtlanga a tam thei ang bera inhman tluka min chherhriamtu thil tha hi a awm thei chuangin ka hre lo. Kohhran leh khawtlangah kan inhmang lo a nih chuan thil dangah kan inhmang tho tho va, chutianga thil danga kan inhmanna chuan sual kawng min zawhtir fo thin zawk a ni. Chuvangin kohhran leh khawtlanga inhman hi a hlawk a, hringnunah min chher puitling bawk. 

Mi upain an lo sawi angin, 'Dotu za, duhtu za' tih a ni a, kan thiltihnaah hian dotu za kan neih laiin duhtu za pawh kan nei tel ve a ni tih hi hre kar ila. Min sawiseltu leh min sawihnawmtu an awm laiin min duhsaka min fuiha min chawimawitu pawh an awm ve bawk a ni tih hi kan hriat reng atan a tha hle ang. Mite sawisel avanga kan thiltih tha lai kan chawlhsan zel a nih chuan engtikah mah hlawhtlinna kan tawng ngai lo bawk ang. Mite sawiselna hi a thlir dan kan herrem thiam phei chuan min tichaktu hmanraw tangkai tak a ni thei thung. 

Photo Image: Google 

Hlawhtlinna Rahbi

C. Lalmuankima

Slough, United Kingdom

Thuhmahruai

Hlawhtlinna rahbi hriat hi hringnuna thil pawimawh tak pakhat a ni a, mi hlawhtling taka min siamtu leh hlawhtlinna tlang lawn chhuak thei tura min siamtu kailawn dawhzawmtu pawimawh tak a ni. Mi hlawhtling tak ni tur hian mi pakhat leh pakhat hlawhtling tura kan hmalak dan hi a in ang vek kher lo thei a, a hnahchawi kan bel duh dan pawh a in ang vekin a rinawm loh. Amaherawhchu chutiang mi hlawhtlingte chuan hlawhtling tura tih dan phung an neih tlanglawn tak erawh a in ang thung. Hlawhtlinnaa inhlangkai tur hian hringnunah rahbi pawimawi tak tak paltlang tur kan nei nual thei ang a, chung zingah chuan a pawimawh zual kan tih thenkhatte kan la chhuak dawn a ni.

Photo: Pinterest 

Lemchang Ngai Lo - Nu Hmangaihna Thinlung

C. Lalmuankima
Slough, United Kingdom

Hringnun hi lemchanna khawvel a ni tiin ti ti thiam deuhten an tawngkamah an hmang rimin an sawi uar hle mai a, an thlirna zawn atang chuan a dikna lai tam tak chu a awm ngei ang le. Amaherawhchu hringnun hi lemchanna khawvel angin miten hmu fo thin mah sela, lemchang ve ngai reng reng lo pakhat erawh a awm a ni. Chu chu engnge kan tih chuan Nu Hmangaihna Thinlung hi a ni. 

Photo: BBC

Nu Hmangaihna Thinlung chuan thil dang zawng zawngin lem an chan lai pawhin ani chuan lem a chang ve ngai lo va, a ti tak tak a, a pasal fanaute tan a inhlan ral thak thin. Hei tak mai hi mi tam takin kan hrethiam lo fo thin a, nu hmangaihna thinlung hi pawnlang takin kan chhuah a, a pawi hle a ni. 

Damdawi in hmasa ber -  Chhungkua (Sam 68:6)

C. Lalmuankima 
Slough, United Kingdom 

Mal ngawih ngawiha awmte tan Damdawi in hnai ber chu chhungkua hi a ni a. Kristian Chhungkua chu an tawngtaiho thin tih a ni.

Chhungkua chu kan mangan, kan lungngaih, kan harsat, buaina niah pawh kan hahchawlhna in nuam a ni tur a ni. Chhungkuaah chuan a chhunga cheng chhungkaw member tinten kan harsatna kan inhriatthiampuiin kan intawrhpui thiam thin angin hlimna leh lawmna a lo thlen pawhin thiam takin kan inlawmpui thiam thin. Chhungkua chu taksa peng hrang hrang invuah khawm ang hian an lo tehkhin fo thin reng a ni. Taksaah hian peng hrang hrang a awm a, chung peng hrang hrangte invuah khawm chu taksa pumpui tia koh a ni. Chutiang bawkin chhungkuaah pawh hian a chhunga cheng member tinte infin khawm leh inchuktuah rem taka kan awmho hian chhungkua kan din thin a ni. Chu chhungkua chu Lal Isua Kristan a luah chiahin 'Kristian Chhungkua' tiin an lo koh thin a ni thung.

Photo Image: Living Country Magazine 

Zirlai pawimawh Nute mal chungah

C. Lalmuankima

Slough, United Kingdom

Nute mal chung hlutna leh pawimawhna hi kan ngaihtuah ngai em le? A hlutzia leh pawimawhzia hrethiamte chuan an fate an nakin hun lo awm tura an hringnun zirlai pawimawh tak tak leh an chatuan nun daih tur zirlai pawimawh tak tak pekna hmun atan an hmang thin asin! 

Nute mal chung hi an fate tan chuan an zirna sikul hmasa ber a ni a, chu mal chungah chuan an fate tana an dam chhung daih mai bakah an chatuan nun daih thil hlu tak a inphum ru tlat a ni. I faten an zirna sikul hmasa berah khan eng zirlai nge an zir thin tih leh eng zirlai nge i peka i zirtir thin tih hi mahni leh mahni lo inzawt fo thin ang che. I faten an zirna sikul hmasa berah khan an dam chhung khawsak daih mai piah lamah an chatuan nun daih thleng zirlai pek nachang i hre lo a nih chuan a pawi hle ang. Chuvangin i fate nakin hun lo awm lehzel tur hmakhua i ngai a nih ngai chuan i mal chung atang khan an chatuan nun daih tur zirlai pek nachang hre thin ang che. 

Photo: Masterfile

Lalpa Pathian tan i hun sen a thlawn ngai lo

C. Lalmuankima 

Slough, United Kingdom 

Lalpa tan a nih chuan minute khat chauh pawh hun seng mah la, i hun sen kha a thlawn ngai lo vang. Pathianin heti khawp hian hun tha min pe a, chuti chung chuan a tana hun sen kan hreh thin lutuk erawh hi chu a nih dan tur a ni ngai lo. 

Lal Isua ngeiin a taksa leh a thisen zawng zawng Kraws lerah kan tan a hlan ral thak a, chuti chung chuan eng vanga a tana hun sen hreh nge kan nih le? Kan nun hi inenfiah a va hun tak em!

Photo: Pinterest 

I harsatna Lalpa Pathian hmaah pharh (thlen) thin rawh

C. Lalmuankima 

Slough, United Kingdom 

Tuna i harsatna leh manganna, nangmah leh i chhungten in tawn mek kha Lalpa Pathian hmaa pharh (thlen) nachang i hre thin em? tih hi duhsak takin ka han zawt teh ang che.....

Mi tam tak chuan harsatna kan tawn mek hi a pharhna dik takah pharh nachang kan hre thin lo va, harsatna dangin kan nun min tlakbuak fo thin reng a ni. Engtiang khawpa harsatna lian pawh ni rawh se a pharhna tur dik tak Lalpa Pathian hmaa kan pharh thin phawt chuan a sutkian dan kawng min zawnsak turin kan rin Pathian khi a inpeih reng a ni tih hi kan hriat hmasak a tha hle. 

Photo: Pinterest 

Lal Hezekia chu Assuria hovin an ram lak tumin an rawn vau/vo va, Assuria lalten an chheh vel ram zawng zawng tichhe vekin an chunga an thiltihte chu rikrap nan rawn hmangin an rawn vau/vo leh a, tichuan Lal Hezekia chuan palaite kut ata lehkha chu a hmu a, a han chhiar a. Tichuan Hezekia chu LALPA inah chuan a han lut a, LALPA hmaah chuan a pharh ta a.....(Isaia 37:8ff) (A thawnthu chu Isaia 37-ah hian chipchiar takin chhiar tur a awm tho va, duh tawk mai ila.....)

Hun ka nei lo...??? 

C. Lalmuankima 

Slough, United Kingdom 

'Hun ka nei lo....' tih hi chu mite hmaa kan inphat mawina leh tlip mawina mai a ni. Hun ka nei lo kan ti hi chu kan hun pek duhna hmun azira hun nei leh hun nei lo thei kan ni ve bawk. Chuvangin i hun pek duhna hmun azirin hun i nei thei a , i hun pek duhna hmun azir bawkin hun i nei lo thei bawk.

Siamtu Pathianin kan ni tin hun hi kan hman tur indaih tawk theuhvin min pe vek a, chu chu kan hman thiam dan azira tangkaipui thei leh tangkaipui lo thei kan ni. Kan hman thiam dan azara hlawkpui thei leh hlawkpui lo thei kan ni bawk. 

Photo : Google Image

Pathian pawlna hun nei lo khawpin i buai thin em ni? Lalpa nena inpawlna hun ka nei lo kan ti hi chu mahni leh mahni kan inbumna mai niin ka hria. Pathian be hman lo khawp chuan i hnaah i buai ka ring lem lo. I ngaih pawimawh loh avang zawka Pathian be hman lo anga inngaihna i nei a ni zawk ang. Entirna pakhatin ka han tarlang teh ang. Pathian be hman lo khawpin i hnaah lo buai ta pawh ni la, i hnathawhna kalkawngah tal khan Lalpa nen hun hlimawm tak in hmang thei asin!

I mission i thawk tha em? 

C. Lalmuankima 

Slough, United Kingdom 

'Mission' tih thumal hi kan mi thiam hmasa J.F.Laldailova khan a Dictionary-ah heti hian a hrilhfiah a, 'Palai intirhna, palai tirh chhan, palai rual, kohna, palai hmunpui, sakhaw theh darhtu atana tirh chhuahte' tiin a dah a. A bik takin Kristiante chuan Lal Isua vana lak chhohva a awm dawn tum khan a zirtirte hnena a thuchah hnuhnung chu chang chawiin khawvel hmun tinah kala hnam tina mite zirtira siam tura tih kan nih thu hian a tifiah hle a ni. (Matt 28:19-20a).

Mission han tih hian mi tam tak rilrua lo lang hmasa ber mai chu ram thim ram rova (Chanchin Tha la hmelhriat reng reng lote hnena rawngbawlna) rawngbawlna hi a ni a, a dikna lai tam tak a awm ve bawk tho mai. Pathian thu la hre ngai reng reng lote sawina a nih theih lai hian keimahni in chhungah pawh Pathian thu hre fo si-a piantharna la chang hauh lote hi a kawhtir theih ve bawk a ni. Mission thumal hi Tlangmite rilruah chuan a mikhual lo hle mai a, mahni tawng tluka kan hman leh rilrua fiah a ni a tih theih bawk awm e. A...mission chungchang hrilhfiah vak lam kha chu kan sawi tum a ni viau lem lo va, mimal tin hian kan mission hi kan thawk tha tawk em tih lam hi kan sawi tum tak zawk chu a ni.