Kohhran leh Politics

C. Lalmuankima

Newcastle, United Kingdom

Kohhran leh politics hian inzawmna thuk tak a nei a, kan kalpui thiam dan azira hlawkpui thei leh hlawkpui lo thei a ni. Mihring kan nih chhung chuan a mala khawsa thei kan ni lo va, a huhova khawsa thin kan nih avangin hruaitu emaw hotu emaw kan neih a ngai a ni. Ramsa tak ngial pawh a huhova khawsain hotu/hruaitu an nei thin a, ran a zawka kan ngaihte mahin hotu/hruaitu an neih chuan mihringte chuan hotu/hruaitu kan neih a ngai a ni. Hotu/hruaitu kan neih chhan erawh kan hriat a tha hle ang, hotu/hruaitu kan neih chhan chu tuna kan dinhmun atanga dinhmun tha zawka min hruai thei tura kan rin avangin hotu/hruaitu kan nei thin. Kohhran leh ram inrelbawl danah pawh dinhmun ngaia ding reng lova hmasawnna rahbia kai chhoh zel kan duh avangin hotu/hruaitu kan in ruat/tlang ta thin a ni. Chu dinhmun chu a zahawm piah lamah a hau tak em avangin chu dinhmuna ding tur chuan mipuiin kan rilru zawng zawng kan nghat tel bawk thin.

Photo: Google Image 

Kan thupuiah hian ‘Kohhran leh Politics’ tih a nih angin a hrilhfiahna tlem azawng han tarlang hmasa ila. Kohhran awmzia hrilhfiahna pakhatah chuan heti hian a inziak a, ‘‘Kohhran chu, Krista ringtute pawla indin, Pathian Thu-Thuthlung Hlui leh Thuthlung Thar, dik taka pawm a, dik taka zirtir; Lal Isua siam chhuah sakrament pahnih – Baptisma sakrament leh Lalpa zanriah, dik taka hmangtute hi an ni.’’ tiin (Fanai, 2016). Thuthlung Thar lama a lan dan chuan, kohhran chu Kristan Ama tan leh Amaha nghata a din a ni a, Mitthi Khawkulh kawngkharte pawhin an ngam loh tura a din a nih thu (Matt. 16:18) leh Amahah chuan thil engkim siam a nih thu leh engkim Ama ta tur a nih thu leh Ani chu kohhran lu a nih thu kan hmu a ni (Kol. 1:13-20). Kohhranho chu Krista taksa a nih thu leh engkim engkima tikhattu famkimna a nih thu Ephesi 1:22-23 hian a tarlang bawk a, chu kohhranho chu Krista thu tiam kaltlanga Pentecost ni atanga bul tan a nih thu kan hmu tel bawk a ni (Tirhkohte 2:1-ff).

Mitin ta tur Chanchin Tha lâwmawm êm êm

(Isaia 9:6,7; Luka 2:8-10)

C. Lalmuankima

Newcastle, United Kingdom

"Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu. Tin, hei hi in tan chhinchhiahna tur a ni, nausen puana tuam, ran chaw pekna thlenga mu in hmu ang." (Luka 2:8-10)

Chanchin lawmawm thenkhat hi chu thenkhat tan lawmna a nih rual rualin thenkhat tan erawh lawmna a tling zo tlat thin lo. Chanchin lawmawm thenkhat te phei chu thenawmte leh thian thate tan pawh thinhrikthlak tak leh ngaihnawm loh tak a ni thei bawk. Engvang nge kan tih chuan khawvel atanga chhuak chanchin lawmawm a nih vang a ni. 

Photo: Google Image

Entirnan thil pakhat ka han zep tel lawk teh ang: Rawngbawltu thenkhatin mihring thinlung makzia an sawinaa tehkhinthu/entirna fiamthu ti tak deuhva an sawi thin angin 'Keini aia dinhmun hniam zawka kan ngaihte leh keini aia sumdawnnaa tlachhe zawka kan ngaihte an rawn len thur thur chinah chuan lawmpui a hnekin thiknain kan khat a, thenawmte lawmna kha tawmpui a har thin......' an tih hi vawiin thlengin kan thinlungah a la thleng dik zel chu a nih hi maw. Kan level-puite ai pawha hniam zawkten keimahni aia a ni atela an thanlen thur thur chuan muttui a har duh khawp mai an tih ang deuhvin. Thenawm te tana chanchin lawmawm kha keini tan chuan thikna avangin chanchin lawmawm lo a ni ve leh thei tlat a ni. 

I tlukna hmun atang khan tho leh thin ang che

C. Lalmuankima

Newcastle, United Kingdom

Hringnun hi kan tlukna hmun atanga thawh nachang kan hriat loh hian kan mamawh loh thil tha lo thlengin keimahniah min tlakbuak thei a ni. 'Mihring kan ni a, tlu thei, tisual thei, chau thei, lungngai thei .....adt. kan ni alawm' tih hi zaa za ka tawmpui a, mahse chumi atanga thawh leh nachang hre lo khawpin kan thil tawn mek te hian min uai hnawk ang tih hi ka hlau thin. 

Photo Image: Google Image

Mahni tlukna hmun atanga thawh tawh loh hi a pawi em em a, hringnun hlawhtlinna kawng daltu lian tak a ni bawk tih hi kan hriat a tha hle mai. Mahni tlukna hmun atanga thawh tawh loh hian kan mamawh loh harsatna lian tak thlengin min tlakbuak thei a, a tawpah mahni hial intihchhiatna a thleng thin. Mi chi tin kan nih angin kan tlukna hmun chu a in ang vek kher lo vang, a pawimawh ber zawk chu khami hmun atanga thawh lehna nachang hriat kha hringnun hlawhtlinna lamtluang min hruaitu a lo ni reng mai.

I hringnun zawh mekah khan vawi engzat nge hnek thluk i nih ve tawh? tih lam ai maha pawimawh zawk chu khami hmun atang khan thawh leh nachang i hria em? tih hi a ni. Kan hringnun kawng chhuk chho zawh mekah hian eng eng emaw ni hmanga hnek thluk kan lo ni tawh mai thei. Mahse hnek thluka kan awm avang khan kan Khawvel hi a tawp ta tihna a ni lo. Kan tlukna hmun atang ngei hian tha thar thawha thawh leh hi mi huaisente miziaa bet tel tlat a ni. I tlukna hmun atanga tho ngam tawh lo khawpa i dawihzep a nih chuan nangmah ngeiin i hringnun tawp dan tur chu tuna i dinhmun ang chiah khan i siam nghal tihna a ni.

Mahni tlukna hmun atanga tho ngam tawh lo khawpa mi dawihzep kan nih chuan a pawi ngawt ang.

Hringnun kawng chhuk chhovah hian vawi engzat nge a hlawhchham tawh tih hi kan intehna tur dik a ni lo va, a hlawhchhamna atang khian vawi engzat nge a thawh leh thin tih hi kan intehna tur dik tak zawk chu a ni. Mahni hlawhchhamna hmun atanga tho ngam tawh lo khawpa kan dawizep a nih chuan hlawhtlinna chu kan tan vana rah tluka sang a ni mai ang. Chuvangin tuna i dinhmun phet tak anga lang i hriatna atang te, chan viau anga i inhriatna atang te, hlawhchham viau anga i inhriatna atang te.....adt. khan tha thar thawhin han tho leh thin la, i hringnun khawvel chu hlawhtlinna leh duhawmnain a parvul chuk tawh mai dawn a ni.

I tlukna hmun atang khan tho leh thin ang che, tichuan hlawhchhamnain a phuar beh zawh rual lohva mi chak i nihzia i tilang thei tawh ang.

Isua nihna chi 5 leh Krismas

(Bible: Isaia 9:6-7; Johana 5:8, Kolossa 1:12, 17; Luka 2:8-22)

C.Lalmuankima

Newcastle, United Kingdom

Thuhmahruai

Photo: Google Image

Thupui dang vuah ka tum pawhin he thupui bawk hi a rawn lan leh tak siah chuan ‘Isua nihna chi 5 leh Krismas’ tiin a inrem leh inrem loh lam pawh ngaihtuah chuang lovin ka han bel ve chawt mai a ni e. Krismas a lo hnai leh ta a, zawlnei Isaia hrilhlawkna bu hi kan chhiar tam leh viauvin a rinawm a, Lal Isua lo pian tur hrilhlawkna a nih angin he thupui innghahna atan pawh Zawlnei Isaia bu hi hman a ni. Lal Isua nihna hi tam tak sawi tur a awm teuh vang a, tun tumah hian a nihna chi 5 hi ngaihtuahho kan tum dawn a ni.