Martin L. Chhakchhuak
'Nupui/pasal kan inneih ni atanga tehna sang tak hmanga kan inteh thinna hian inthenna a chawk chhuak fo thin a, hmangaih luat vangin kan inthen chawk thin....'
Hmangaih luat vangin kan inthen... han tih chu,a ti mah mah in ti mai thei. Mahse a nihna a ni tlat si a ni. Huat vangin kan inthen.... ti ila chuan thu dik awm sa a sawi a nih hi min ti mai thei, mahse kei chuan heti zawng hian ka thlir ve tlat. Nupaa kan insiam hma atangin he Hmangaihna hi a lo piang a, chu chu a vawn nun dan kan thiam loh thin avangin chu hmangaihna chu huatnaah kan chantir fo thin. Huatnaa kan chantir chinah chuan pakhat leh pakhat inkarah lak tlak awm lo khawpin kan inchhuah a, chu chuan nupui/pasal inthenna hi a lo chawk chhuak ta thin a ni. Nupui/pasal inthen ta te hi han zawt hlawm ila, an chhanna tam zawk chu an inhuat vang a ni hauh lo vang.
 |
| Photo : Google Image |
Nupaa kan insiam atanga tehna sang tak kan hman thin avangin nupaah ti teuh leh neuh neuh a lo awm tan a, tichuan 'ka rin i lo ang lo' 'ka rin i pha lo hle mai' tiin kan inmawhpuh tan a, 'khami kha lo nei zawk ila' emaw 'chumi chu lo nei zawk ila' emaw tia rilrua kan ngaihtuah thlen meuh chuan pakhat leh pakhat inkara kan inngainatna leh hmangaihna inkar chu a lo kak zau ta hle mai a, a tawpah chuan tehna sang tak chuan pakhat leh pakhat te inhmangaihna parmawi tak chu sathau khawnvara tui kan leih lut ang maiin a khal ta a, par chhuahna hun remchang nei leh tawh lo turin a khal/thamral ta thin a ni. Chumiah chuan kan intehna hi kan tih hniam loh avangin a tawpah nupa inthenna a lo thlen ta thin a, hmangaih luat vangin kan inthen ta thin a ni.
Tehna hi nupa inkarah a hman dan kan thiam loh phawt chuan min tithentu a ni khawp ang. I kawppui kha nangmah ang bawka mihring ve mai, tih sual chang nei thin leh ti sual ve thin; tlinloh leh felloh chang nei ve thin a ni tih i hriatthiampui loh chuan in nupa inkar chu a kak zau telh telh ang a, a tawpah in nupa inkara in duh loh ber inthenna a chawk chhuak hial thei a ni. Chuti ni lo va, i kawppui chu nangmah ang tho va thil tisual ve rem rum thei leh tibahlah ve nuaih thin tih i hriatthiampui hunah chuan i kawppui nena in inkar hmangaihna hruihrual chu tihnghehin a lo awm lehzual ngei ang a, inthen chu in hlau hliah hliah tawh mai ang. Chuvangin nupa inkarah chuan tehna dik hi hman thiam a pawimawh a, tehna dik kan hman thiam phawt chuan nupa inkarah hmangaihna tizualtu a lo ni zel dawn a ni.
 |
| Photo : Google Image |
Mizo tawnga 'Innei' tih tawngkam hi a va tha ve aw.... tiin ka ngaihtuah thin. Nupui/pasal inneih chungchangah hian hei tluka hrilhfiah leh chuan tur pawh a awm theiin ka hre tawh lo. Nupui pasal inneih chungchanga Rev.Dr.Rohmingliana thu sawi ka hriat reng pakhat a awm a, "Mizoten 'Innei' kan tih hian leh lam leh lamin kan innei tawn a, an chhungte zawng zawng pawh kan nei tel vek a ni...." a tih hi a ni. Tunlaiah kan mite zingah kan kawppui te chauh neia an chhungte nei tel duh lo nupui/pasal an/kan awm ta hle mai, chumi chu mo/makpa fel leh tha, chhuanawm leh chhungte rintlak chu a ni thei lo hrim hrim. Chuvangin nupui/pasal neih chungchangah hian kan kawppui te chauh ni lova an chhungte thlenga kan neih telna hian chhungkua pakhat leh pakhat inkarah inlaichinna tha a siam a, chu chuan chhungkaw hlim takah a siam bawk a ni.
Kan thu hmasa lamah khan tehna chungchang kan sawi nual tawh a, tehna chungchanga kan innghahna tur pawimawh tak chu tehna dik lo thei lo Pathian thu, Lal Isuaa kan innghah hi a pawimawh a ni. I kawppui emaw i chenpui emaw i pianpui emaw i thawhpui emaw pawh ni rawh se, nangma thlirna zawn atanga i teh chhung chuan engtikah mah i teh tling ngai lo vang. I teh tlinglo mai ni lovin nangmah ngei pawh i hah phah hrep ang a. Nangmah ngei pawh an teh tling hauh lo vang che. Nangma tehna zawn atanga teh lo va, tehna dik lo thei lo Lal Isua (Pathian thu) atanga i teh erawh chuan mi tumah teh tlin loh i nei tawh lo vang.
Chuvangin tehna dik Lal Isua atang hian kan kawppui te, kan chenpui te, kan pianpui te, kan thawhpui te, kan pawlpui te, kan mihringpui te i teh thin ang u. Chumiah chuan mi tupawh mai hi kan teh tling tawh ang a, kan va teha te leh kan inkarah inlaichinna tha a lo piang chhuak ang a, kan inpumkhat bawk ang a; chu inlaichinna tha chuan inthenna lakah min chhanhim zel tawh dawn a ni. Tehna dik lo thei lo Krista (Pathian thu) hmang hian i inteh zel ang u. Lal Isua avang erawh chuan mi zawng zawng hi kan lo tling vek si a, amah avang vekin pa hmaah pawh mi tlinga puan kan lo ni ta a ni.
No comments:
Post a Comment