Zo Vapual

Kristian Chhungkua 

Chhunzawmna

C.Lalmuankima

Newcastle, United Kingdom

Kristian Chhungkua chu zavaia Kristian a nihna ni mai lovin Chhungkuaa Kristian nuna chenhona a ni. Kristian nuna chenho hi a va pawimawh tak em...! A hmingin Kristian kan ni ang a, Kristian nuna cheng pha lo ringtu kan nih vaih chuan ringtu azawnga mi khawngaihthlak ber kan ni ang tih hi a hlauhawm hle mai. Ringtu ni ve si, Lalpaa beiseina pakhat mah nei hauh lo ringtu i/kan nih phei chuan i/kan nun chan hi inenfiah nasat a ngai hle tihna a ni. Chung mite chu an damlai pawhin an thi a ni.

Photo : Google Image

Kristian Chhungkua hi zir mai a tawk lo va, inzirtir leh inkaihhruai tel a ngai a ni. Dr Billy Graham-a chuan,"Tunlai in tha, bungraw famkim leh cheimawina kim hian Chhungkua a siam thei lo. In chhung hi Hotel emaw, mite chawlhna leh chaw eina hmun a ni mai lo va; Thlarau lam thiltihtheihna leh inzirtirna hmun he leia awm, van hnaih ber chu a ni." a ti a. He evangelist ropui tak thu sawi hi a va ropuiin tha ka va ti tak em...! Mi tam takin chhungkua kan din dawna kan tih fuh loh fo mai chu, in tha pui pui, building lian leh changkang tunlai tak taka sak, a chhung bungrua pawh changkang, nalh leh manto tak taka chei mawi, pangpar huan (garden) mawi tak leh tui chenna (swimming pool) pawh nei thlap, car nalh leh manto tak tak hung tlar thei leh nei tha te chu chhungkaw hlawhtling leh ropui ber berah kan ngai fo thin hi a ni. Chu chu a ni hauh lo.

Kristan a luah leh luah loh Chhungkua zawk hi a ni kan thlirna mit kan fuktirna hmun tur chu ni. Kristan a luah loh chhungkua leh in ropui tak chu eng anga ropui, nalh leh thaa sak ni mah sela a chhunga chengten an hlim phah reng reng lo. An neih thil ropuina chuan lei malsawmna vurtu Lalpa mamawh lohnaah a siam a, an hlim zat chiah an tahpui leh thin. He miah hian Lalpa tellohnaa a malsawm dawnna hian kan dawn zat chiah kan mittui min tih tlak sak thu kan hmu thei a ni. Kristan a luah chhungkuaah erawh chuan eng ang khawpa in chhia leh luah tlak loh khawpa chhia leh zanriah chhum tur nei lo khawpa rethei pachhia pawh ni se la, Kristan a chenchilh tlat avangin an nun a hlim tho a ni. Tuisik no khat chauh an neih pawhin a petu Lalpa hnenah lawmthu an sawi thei a, an nun a hlim bawk thin.

Lalpan a chenchilh Chhungkua chu, he khawvel ropuina leh nawmsakna hi chuan chatuan a daih lohzia leh an Hringnun khawvel a lo tawp hunah pawh he khawvel thil hi chu pakhat mah an chhawm tel theih lohzia an hrechiang a, an nun hi thlamuang takin a chawl thin. Thlamuanna nun Isua an neih tawh tlat avangin khawvel thil te hian an nun a khawih buai pha tawh lo va. Tichuan Lalpa chu an hausakna a ni a, awmlo ata dinchhuaktu Pathian ngei chu, thil zawng zawng a awm tawh loh hnuah pawh Awma Pathian a nih tur thu an hrechiang a, hahdam takin an nun a chawl thin.

Rawngbawltu pakhat thu sawi ka duh em em mai chu,"Hapui min petu chuan a thial tur pawh min pe zel dawn a ni, engah mah mangan loh tur," a tih hi a ni. He tawngkam hi ka van duh tak em! A rawng a bawlsak thin Lalpa khi a hrechiang hle tih a hriat hle mai maw. Awmlo ata awma min siamtu ngei chuan min tithlawn dawn si lo va, kan za atana a fapa hlantu/petu chuan thil dang zawng pawh a thlawna pek tel min la tiam ta cheu va.....! Hei tluka thu thlamuanthlak hi a awm chuang dawn em ni...?

Chhunzawm leh atan.....