Zo Vapual

Kan pulpit hi ba thinna a ni em...?

C.Lalmuankima

Pathian hi a zahawm teh reng nen, thahnem ngaih luat vang kan ti dawn nge kan at/mawl vang? Kan pulpit te hi ba thin nan kan hmang ta zawk a ni lawm ni...tih mai turin kan inphut nasa ta mai le. Dan thu hnuaia awm kan ni tawh lo va, khawngaihna hnuaia awm kan ni tawh zawk. Thuthlung Hlui Dan hmanga fel, that, thianghlim famkim tura in phut vak hian awmzia a nei tawh lo. A khawngaihna Dan hnuaia awm kan nih angin a khawngaihna ropuizia puan chhuah mai hi kan tih tur awm chhun a ni.

Photo : Google Image

Pathian thilsiamnaah kan tel lo va, a remruat leh tha a tih angin min lo din zawk a; chu chu nang leh keia han complaint theih zia zang a ni lo. A remruatnaa lawm thiam mai hi a lo hahdam ber zawk. Chuti ni lova Lalpa remruatna a lawm tum lova kaw dang hreuh kan tum chhung chuan kan nunah hian in enfiah tur kan nei tihna a ni.

Mi fel aiin mi sual thihna thu, Kalvari tlanga misualte aia a thihna thu hi Chanchin Tha chu a ni a, Lal Isuan misual hi a en kham thei reng reng lo. A hmaia an ben dukna te, an hnekna leh a hmaia chil an chhaka hrehawm tinrenga an sawisakna te chuan min hmangaihzia a tilang a, fakna hla siamtu in ' min hmangaih hi tuman an dang zo lo ve' a tih angin misualte min hmangaihna hi dan a hnekin a zual zel zawk a ni.

Kan sual avang tak hian a ni min kalsan phal loh ni...? Lal Isuan misualte hi a hmangaih a ni ngawt lo va, misualten an sualzia inhriaa an sima a hnen a lo thlen leh theih hun hi a nghak thin. Heti zawng hian ka han sawi leh teh ang, Lalpa khian sual a hmangaih a ni lo va, sualin a khawih buai mek a thilsiam zinga a duh ber leh a ngainat ber mihring zawk hi a ni a hmangaih ni. Chu ngei chu chhanchhuah leh tumin Kalvari kraws ah khan amah ngei mai chu sual pu taksa puin, tisa sual ang puin sawi thawi nan a rawn inhlan ta zawk a ni. Chu tak mai chu Pathian hmangaihna kan tih chu a ni. Miin mi fel avangin an nun hial pawh an lo pein an lo thap a ni mahna, Lal Isua erawh chuan amah ngei chu misual te ai awhin misual berah a rawn tang ta zawk a, he mihring bum thintu mihring mizia ngei mai hi kraws ah a rawn thihpui ta a ni. Kraws-a a thihpui mai chu duh tawk lovin chatuana tho leh tawh lo turin thlanah a phum a, chuta tang rawn tho lehin chu a thawhlehna nun ngei chu kan nun atan min thlan sak ta zawk a ni.

Kan thu hmasa lamah khan let leh ta ila, Thuthlung Hlui hun lai atang tawha zawm famkim an tum, Dan thu chi hrang hrang mai chu kan zawm famkim theih lohzia hriain amah ngei Dan zawng zawng zawh famkim sa nun chu min pek theihnan Thuthlung Hlui Dan thu te chu a khengbet a, Thuthlung Thar Dar thar, Dan zawh famkim sa nun ngei mai chu kan nun thar atan min hlan ta zawk a. Chuvangin kan pulpit te hi ba inthin nan hmang tawh lovin a khawngaihna dan hnuaia awmten a khawngaihna ropuizia fak nan i hmang zawk tawh ang u. Chumiah chuan keimahniah hian a khawngaihna tihpunin a awm zel ang.

Photo : Google Image

Thuthlung Hlui Dan chuan kan that, fel, thianghlim famkim min phut a, (mi tumah an fel famkim zo tawh lo va....) Thuthlung Thar Dan erawh chuan kan fel, that, thianghlim famkim theih lohzia hriain ama nun, fel leh tha leh thianghlim famkim sa chu min lo pe ta zawk a, chu ngei mai chu chatuana kan nun atan min thlan sak ta zawk a, thiamloh chantirna reng a awm tawh dawn lo a ni. Kan sual te thihpuitu kha Amah a ni a, tho leh ta zawka a nun min hlantu pawh kha Amah ngei a ni bawk si a; chumai ni lovin nakin Pa hma kan thlen hunah pawh min sawisak turin a la intiam ta cheu va, hei tluka khawngaihna thil thlawn pek hlu leh ropui hi a awm tawh chuang dawn em ni. .....?

Thuthlung Hlui Dan hnuaia ding kan ni tawh lo va, Thuthlung Thar khawngaihna Dan thar hnuaia awm kan nih angin a khawngaihna thu puan chhuah hi kan chaw tui ber lo ni fo rawh se......

Vawiin ni hun hman nuam ule......