Zo Vapual

LALPA chunga lawmna chu chakna
(Neh 8:9,10; Sam 4:7; 1:2; Heb 3:17-18; I Thes 5:16-22; Phil 4:4;)

C.Lalmuankima

Newcastle, United Kingdom

Photo : Google Image

Bible-ah hian 'Lawmna' tih thu mal hi hmuh tur a awm nual a, a bik takin LALPA A lawmna, LALPA avanga lawmna, LALPA chunga lawmna leh adt...a ni deuh zel a; kan thupui sawi tum pawh chu ti lam hawi zawng chuan sawi kan tum dawn a ni. 'Lawmna' tih thu mal hian pawimawhna riau a nei a, mihring kan nih chhung chuan kan tlansan theih hauh loh tur, kan nuna bet tel tlat, mahse pawimawh em em si a ni. Lawmna hi a chi neuh neuh va kan then dawn chuan then hran tur tam tak a awm thei ang a, kan thu sawi tum a fiah lehzual theihnan chi hnihin then hran kan tum dawn a ni. Lei lam thila lawmna (LALPA tel loa lei lawmna ) tih leh LALPA A lawmna....tiin.

'Lawm' han tih hian LALPA tel miah lo pawhin he khawvel thilah hian a lawm theih teh meuh a. Mahse lawmna ze dik leh tluantling a nih tlat loh avangin a rah chhuah erawh a tha lem lo a ni. LALPA tel lo a khawvel thila lawmna hi chuan kan lawm zat chiah min titap leh thin. Lei lam thila lawmna hi chuan mihring min tichapo va, chumai ni lovin nei ve lo te leh hre ve lo te chaldelh leh hmuhsit nan kan hmang fo thin. Entirnan: kan sumdawnna a lo hlawhtlinin emaw, thil thar motor, bike, thawmhnaw thar kan neih in emaw te hian nei ve lo te chunga intih theihna leh inlak khum kan ching thin a ni.

Kan lawmna te hi LALPA hnen atanga chhuak a ni em? tih hi mahni leh mahni inzawh nawn fo a tha a ni. LALPA tel ve lohnaa lawmna, Pathian atanga chhuak lawmna a nih loh phawt chuan kan mittui min titla tamtu ah a cheng leh thin. Chuvangin vawiin a kan lawmna hi LALPA atanga chhuak a ni em tiin i inenfiah fo vang u. Chuti a nih loh chuan kan mittui min titla tam tu ah an la tang mai palh thei a ni.

LALPA tel ve lohnaa lawmna hi chuan mihring min tichapo tel tlat zel a, nei ve lo te leh hre ve lo te hmuhsitna a siam chhuak thin. Lei malsawmna hi kan dawn sen loh khawpa tam dawng mah ila, a petu Pathian chunga lawm na chang hre lo va kan awm phawt chuan malsawmna khingbai kan dawng tihna a ni thei ang. Chuvangin kan neih ang ang leh kan dawn ang anga a petu Pathian chunga lawmna hi lawmna dik a nih mai bakah a petu tan pawh lawmna a ni tel bawk.

Mi tam tak chuan kan hma zawna malsawmna a lo thlen phawt loh chuan lawmthu sawi na chang kan hre thin lo emaw tih tur khawpin kan awm thin. Malsawmna dawn vang chauhva lawmna hi lawmna tluantling a ni lo bawk. Lawmna ze dik leh tluantling chu kawng engkima lawmna tur a awm loh lai pawha chhungril atanga lawmna lo chhuak hi a ni. Chu tak mai chu LALPA a lawmna kan tih chu a ni. Habakuka anga kan nun kawng kan hman thiam phawt chuan kan innghahna zawng zawng tih boralin lo awm vek mah sela, LALPA a lawm cheuna hi a lo awm thin a ni. 'Ka lawm zel alng, LALPA ah chuan ka chhandamna Pathianah chuan ka lawm cheu dawn...' tiin. (Hab 3:18) He nun hi a ringtu nun hliah hliahin ka hria.

Tichuan lawmna dik tak LALPA atanga chhuak lawmna erawh chu lei lam thila lawmna tur chhete mah a awm loh hun pawha lawmna hi lawmna ze dik leh tluantling chu a ni. Thihna te, natna te, buaina te, manganna te, harsatna tin reng lo thlengah hian lawm em em turin min ti a ni lo va, chutiang kan thlan loh harsatna chi hrang hrang a lo thleng chung pawha LALPA a lawm turin min ti zawk a ni.

Rawngbawltu pakhat thu sawi hi ka hre reng thin a; ' Nupui/pasal te ruang chunga lam derh derh thei nun tluka ropui hi ka hre lo...' a tih tawngkam hi ka hre reng thin a ni. A sawi tum tak zawk chu, a nupui/pasal boralnaah khan a lawm a ni lo va; a chunga thil thleng, a thlan ni miah si lo, chunglam rorelna lo thleng dan zawh rual loh a nihzia a hre chiang a, nakinah vanramah a la hmu leh dawn a ni tih a hriatchianna atang khan a nupui/pasal ruang chungah khan Lawmthu a sawi thei tlat a ni. Chu tak mai chu lei dana lawmna tur pakhat mah a awm loh tawh loh hun pawha chhungril atanga lo irh chhuak lawmna kan sawi chu a ni.

Photo : Google Image

A nih leh eng thilah te nge lawmthu kan sawi thin? Thenkhat chuan a malsawmna kan dawn lai emaw, kan sumdawnna kan tluan lai emaw, kan hriselna a that laiin emaw hriselna tha min pek vang tein emaw lawmthu kan sawi thin kan ti ngei ang. A dik a ni. Chu chu ringtuten kan tih tur pawimawh tak pawh a ni reng a ni. Chu mai ni lovin kan sawi tawh ang khan lei lam thila lawmna tur pakhat mah a awm loh hun pawha lawmna hi lawmna dik tak a ni kan tih tawh kha. Hamthat lai, a malsawmna dawn lai chuan chunglam hawia a hnena lawmthu sawi a awl viau va, bawrhsawmna leh harsatna chi hrang hrang kar atang erawh chuan lawmthu sawi a har hle thung. Mahse Bible in 'LALPA ah chuan lawm fo rawh u, ka ti leh pek thin ang lawm rawh u....(Phil 4:4) Lawm fo rawh u... (1 Thes 5:16)' tia a sawi angin keimahnia lawm turin min ti lo va, amah LALPA a lawm zel turin min ti zawk a ni.

Sam 1:2 ah chuan, "A lawmna chu LALPA danah a ni zawk a, a dan thu chu a chhun a zanin a ngaihtuah thin." Kan lawmna te hi LALPA danah zel lo ni rawh se, tichuan LALPA khi kan chungah a lawm ang a, LALPA khi kan chunga a lawm phawt chuan he rama thil tha te hi min eitir dawn a ni. Nehemia 8:10 ah khan 'LALPA chunga lawmna chu in chakna a ni si a....' tia a lo sawi ang khan LALPA chunga kan lawmna chuan keimahniah chakna thar min siamsak ang a, kan lawmna hi LALPA ah zel khian ni se la, chu LALPA a lawmna chuan kan nitin nuna a malsawmna kan mamawh ang zelin min vur zel dawn a ni. Chu chu kan chakna hnar a ni bawk.

LALPA a lawmna chu kan chakna a ni si a.....