SER

SER

by Khuma Chhakchhuak

Naupan tet deuh lai han ngaihtuah ila, tun lai naupangte angin computer kan la nei ve lova, inchhung lama inkhung chiah chiah kha a theih loh hrim hrim a ni. A harh fal deuh te chuan hliam hnuhma leh pem te pawh (k)an lo ngah bik thin. Chungte chu serah an lo chang thin a, chu ser chu kumkhuaa kan lo put tur; kan taksaa bet ve reng tur a lo ni ta a ni. Chu hliam ser anga fam dairial min chanpui ve tur hi a lo awm reng zuk nia!

Kan ni tin nunah thil tih that leh that vak loh chang te a awm nuk mai. Tumah famkim reng kan awm lo. Ama’rawhchu, thil kan tih fuh vak loh te zingah hian kan tih phak(thiam) tih tak si loh te a awm thei hle thung. Chutiang tidik/ chhuahdik tur erawh chuan mahni bawk kan lo pawimawh leh thin. Mite’n an tih avanga tih ve rikngawt te hi a lo dik mawh thin khawp mai. Kan thil tih/sawi te hi sut leh theih mai zu ni suh.

Mizo te hian zuk leh hmuam hi kan ti nasa hle a, ti tan mek te hi ti tawh nghei mekte aiin an lo tam leh zel bawk a. Mahni taksa tana thil tha lo chu tih loh mai tur hi a ni a, mahse kan thil tih dawklak atang chuan ban a har a ni ang e. Athen lah chuan vaiah pawh a changkang lo hovin an tih, sikhar/khaini/kuber etc te hi a tel lo chuan an awm thei tawh lo chu a ni ber mai lawm ni? Nghei hleih theih loh tur, mahni tana tha bawk si lo hi chu tih hma atanga bansan hmiah tur a ni asin mawle. Tin, ei leh in chungchangah te pawh kan taksa tana tha tur hi hriat reng a sual lovang.

BIBLE-a fapa tlan bo thu kha kan hre vek awm e. Vawikhat chauh a tlan bo a, a sim vang vang mai a nia. A ti nawn miah lo. “Don’t make same mistake twice, coz there are lot new mistakes to make,” an tih ang deuhvin mahni thil tihsual/ tih dik loh te hi chu insiam that theih zung zung mai tur a ni. Mi thil tihsual atanga kan zir thiam phei chuan a tha/hlu leh zual ngei ang le.

Pastor pakhatin a sawi ka la hriat reng, ka duh em em chu: “Input is proportional to output” tih hi. Kan rilrua kan tuh tam chu kan nunah a lang chhuak leh thin. A chhe lam emaw a tha lam zawng emaw pawhin chhut ila, a dik thei viau ang. Tehkhin nan, kan thil chhiar leh kan thil ente hian keimahniah thu a lo sawi thin asin. Football channel en ngun deuh chuan khelh ve mai kan chak et et mai a ni. Chuvang chuan, thil tha apiang, a thang mawi apiang te hi en ngun sauh sauhin, kan rilruah te tuh thin ila, thil tha kan lo thawk chhuak tam ting dawn a lo ni. Kan ni tin nuna kan awmdan tur min kawhhmuhtu ber Bible hi a tam thei ang bera chhiara kan zawm bawk chuan he leiah hian van nawmna kan tem lawk thei dawn a ni. 

Beihrualna lamah te thu tha tak tak kan ngaithla thin a. Thalai tam zawk chuan comment han pek mai kan hreh tlat zelin ka hria. “Proclaimation is better” an tih ang deuhin kan thiam tawka comment pek hi a van pawimawh tak em! Tupawh mai hi chak famkim kan awm lova. Hetah tak hian Paula chuan a chak lohnaah chuan Krista chakna a lo chhuang ta a. Keini pawh kan chak loh apiangin Krista chakna chhuang tur kan lo ni reng mai(1korinth). Kan tana a lo tuarna te leh a inpumpekna te chu a thlawn mai loh nan Krista chakna kan chhuang fo tur a ni lawm ni? A thlawn liau liaua kan present hlu dawn hi i hmang theuh tawh ang u khai..

Sualna hi cho tur erawh chu a ni lo. Thil kan tihsual loh nan kawng peng dang a awm chuan pan fo mai tur a ni. Ama’rawhchu, kawng dang a awm miau si loh chuan Krista chakna ringin ral kan do a tul reng dawn a lo ni. Kan buan te hi tisa thil ni lovin van hmuna thlarau sualte an ni si a (ephe 6:12). Kan chakna thlarau ngunhnam(Kristaa kan chakna) chu ringin hmatiang kan sawn thei zel ngei ang le.

Kan ni tin nuna thil kan tihsual leh ser kan insiam te hi Pathian hnena ngaihdam kan dil chuan Kan PA chuan sim turin min ko reng a ni. Chuvang chuan, ser leh hliam te’n awmzia a neih lohna hmun pan chung zelin kan hun hlu te hman thiam dan i zir zel ang u hmiang.

“Rinna-a I hnung zuiin I chakna ring tlat chung zelin

Thlah lovin ka vuan zel dawn, Ka chhandamna Kraws

Van In ka thlen thlengin”