Sipai sawrkar buatsaih inthlan kum 1 tlinna
by LM Kima
Vawiin ni 7 Nov, 2011 hi sipai sawrkarin inthlanna a buatsaih kum 1 tlinna champha a ni a, London-a awm thalai rual, mipui sawrkarna duhtute chuan London-a awm Burma Embassy hmaah duhloh entirna, kawng zawh runpui kan nei a ni. Mi 100 tha vel kan kal khawm a. Vawiin hi kan hriat theuh angin sipai sawrkar buatsaih inthlanna kum khat tlinna champha a ni. He inthlanna fel hlel leh dik lo tak mai hi keini mipui sawrkar duhtute chuan kan pawm thei lo va, kan tawmpui thei lo bawk. Nikum inthlanna kha sipai sawrkar huaihawta buatsaih a nih avangin anmahni sipai sawrkara nihna sang tak tak lo chelh tawh te tlin ngei ngei na tura a tik taka buatsaih a ni te pawh a tih theih ang chu.
 |
| Photo : Ko Martin |
State thenkhatah chuan anmahni sipai sawrkar party (pyi-khine-phyo) vote ngei ngei tura vau na te pawh a awm a, hmun tam takah chuan sipai hlauh avanga tihluihnaa vote thlak te pawh an awm nual a ni. Chuvangin he inthlanna tenawm tak leh duk dak lo tak hi engtikah mah kan tawmpui dawn lo va, kan pawm dawn hek lo. Chu kan rilru put hmang leh kan rilru puak chhuak chu he kawlram sawrkar Embassy hmaah hian kan rawn lantir a ni.
Tichuan tunah hian political avanga lung in tang mek, 1988-a student leaders te lung inah an la tang mek a, chung mite pawh chu a rang thei ang berin chhuah thuai thuai turin he kawlram Embassy kaltlang hian kawlram sawrkar hnenah kan ngen mawlh mawlh a ni. Democracy ram tak takah chuan political avanga lung in tang ten Zalenna an chang pha tur a ni. Democracy ram tak takah chuan zalen taka thusawina, zalen taka campaign na, mihring chanvo (Human Rights), zalen taka sakhaw biakna te pawh a awm thin. Chuti ni lo va political avanga lung in tang mek te a la hrek tan chhung hi chuan Democracy ram tak tak a ni thei lo vang.
Vawiina kawngzawhtute kan phurin kan tih turah kan chiang hlawm a,. hetianga in lungrualna leh impumkhatna tha nena ke kan pen zel phawt chuan kan ram hian engtik niah emaw chuan hlawhtlinna ropui tak a la hmu ngei ngei ang tih hi ka ring tlat a ni.
No comments:
Post a Comment