Zo Vapual

Kristian Chhungkaw Nun Zirhona Part VI

I chhungkua kal pelin midang vei hmasa suh

C. Lalmuankima

Newcastle, United Kingdom

Mahni fate vei hmasa lova mi fate va vei hmasak thin hi a tha lo va, rah tha a chhuah hek lo. Mahni fate vei hmasa lova mi fate vei hi awmzia a nei lo bawk. A tawpah mahni inchhungkhur boruak a lo pawih a, chhungkuaah fa sual leh tha lo kan dah pung teuh ting a ni.

Photo: Google Image

Fanu leh fapa enkawl that hleih theih loh kan kawl tun mai te hi kan enkawl dan nen a inmil tawk vel a tih theih awm e. A chhan chu nu leh pa tam tak te hian fate enkawl leh zirtir kawngah hian mahni fate vei hmasa lova midang fate kan vei hmasak thin vang a ni. Fate enkawl leh zirtir kawnga kan inthlahdah chhung hi chuan fa fel leh fa tha kan nei ngai lo vang tih hi ka hmuh dan a ni. 

Mahni in chhung ramthim kal pel zawnga ramthim vei hi a hlawkthlak loh hle a, a tawpah chhungkaw chhiatna thlentu a ni fo thin a ni. Chuvangin mahni in chhung ramthimna hi tieng hmasa ila, tichuan kan rawngbawlna pawh tun aiin a alh tha lehzual ngei ang. Ramthim vei hi a sual a ni lo, mahni in chhung ramthim kal pela hmun dang va vei daih hi a tha lo mai ni lovin kohhranah pawh rah tha a chhuah mawh hle kan tihna zawk a ni. Mahni in chhung vei kanin thenawmte kan vei fo thin te hi ngaihtuah chian a ngai ta hle mai.

Mi fanu leh fapa te fel leh tha tura enkawlna leh zirtirna kan pek that duh viau laiin kan fate erawh enkawlna leh zirtirna tha pek lamah kan inthlahdah leh tlat thin hi a pawi a, chhungkua bawkin a sawhkhawk tha lo kan tuar thin. Nangma fate enkawl leh zirtir an ngaih laia mi fate i va zirtira i va enkawl daih khan i inchhungkhurah rah tha a chhuah ngai lo vang.

Mi fate kan vei tluk hian kan fate hi veiin enkawlna leh zirtirna pe tha ila chuan kan in chhungkhur boruak hi a va nuam dawn tak em! Kan in chhungkhur boruak a nawm chuan kohhran leh khawtlangah rah tha a chhuah ang a, kohhran leh khawtlang bawkin a zar kan zo dawn tihna a ni. Kan tihdik tawk lohna atang hian kan inzir chhoh zel a pawimawh hle. Chhungkua atang hian bul tan tha thin ila, tichuan kohhran leh khawtlangah rah tha a chhuah chho zel dawn a lo ni reng mai. I chhungkua atanga bul i tan that loh phawt chuan hmun dang atanga i bul tanna chuan rah tha a chhuah chuang lo vang.

Kohhran leh khawtlang thil tih neuh neuha tel tam te hi a tha e, amaherawhchu kan fate nunkawng kal zel tur enkawl leh zirtir hman lo khawp hi chuan i ti thin lo vang u. Hei hian kohhran leh khawtlangah rah tha lo a chhuah thin a, kohhran leh khawtlang bawkin kan tuar leh thin a ni.

Chhungkua hian harhna a dawn hmasak loh chuan engtin nge midang kan tihen theih ang? Chuvangin chhungkua atanga bul tan that hi a pawimawh a, chhungkua atanga bul kan tan that phawt chuan kan chhehvel rawngbawlna pawh hi a lo hlawhtling zel dawn a ni. I chhungkua kal pelin midang vei hmasa suh ang che.