C. Lalmuankima
Newcastle, United Kingdom
 |
| Photo: Google Image |
Kan fate hian kan pawisa aia an mamawh ber chu kan hun
hi a ni. Nu leh pa tam tak hian an fate tan hian an hun pek nachang an hre thin
lo va, an fate nena an inkar inlaichinna hi a chhiat phah fo thin reng a ni.
Chuvangin i fate nena in inlaichinna tihngheh reng i duh chuan i hun pe tam
thin ang che. I fate bulah cheng tam thin ang che. I faten an mamawh chhung che
kha a rei dawn lo, an rawn puitling chho ang a, naupan laia an mamawh tluk che
khan an mamawh tawh dawn lo che. Chuvangin tuna kaihhruai awlsam taka an awm
lai, thu tha hla tha hrilh an awlsam lai, nu leh pate angchhunga an awm lai
hian an mamawh lai bera an bula awm thei turin i hun pe tam thin ang che. I
faten an mamawh lai ber pawha an bula awm hman lo khawpa thil danga i buai thin
a nih chuan i fate nena in inlaichinna kha a tha viau thei lo vang. Nu pa
thenkhat chu an fate pawisaa thlema len botir daih te hi an ching thin a, hei
hi thil tha ber a ni lem lo a ni.
Kan hmangaih berte laka kan beisei ber chu 'Hun' hi a ni
fo va, kan hmangaih berte chu hun pek tam kan tum bawk thin. Chutiang bawkin i
fate tana i hun i pek tam tluka hlu hi i fate tan chuan a awm chuang lo. I fate
tana i hun i khawh ral anga i ngaih lai khan an damchhunga an theihnghilh theih
tawh loh tur thil pawimawh tak an nunah i tuh tel a ni tih hi hria ang che. Nu
leh pa tam tak chuan an fate bula awma han kawm te hi kan peih thin lo va,
anmawhni tlat tlata tla tura se zawl chhuah mai kan ching thin. Hei hi a tha lo
hle a ni.
Nu leh pate leh fate inkar inlaichinna tinghettu
pawimawh tak pakhat leh chu kan fate hi hlutna an neih vezia an inhriat theih
nan an thil tih thatah fak leh chawimawi hreh loh a tha. An hlawhtlinna chhe
têah pawh nu leh paten kan nemnghehsak fo tur a ni. Tichuan naupangin nuam an ti
a, nasa lehzuala tan la turin an rilru an siam puitlin phah thei. An
hlawhtlinnaah pawh an phu tawka fak loh hian an moral kan ti-down thei a ni.
Mahni chanchin han zep tel lawk teh ang; ka naupan laia Sunday School kai tam
lawmman leh exam lawmman ka dawn te, A Aw B lawmman ka dawn tuma ka nuin min lo
hriatpuia min lo nemnghehsak thin khan nasa lehzuala tanlakna min lo siamsak a,
khawsik hluah hluah chung pawhin Sunday School kai châkna min neihtir tlat nia!
Kan faten an harsatna thlenna tlakah min ngai em? tih
hi nu leh paten kan inenfiah fo a pawimawh hle mai. Kan faten an harsatna
thlenna tlaka min ngai lo va, midang hnena an thlena puihna dang an zawn hian
an nunah thil sual lian zawk an hnuk lut thei a ni. Thenkhat chu ruihtheih
thilah emaw mipat hmeichhiatna thil emawah an lut daih thei. Chuvangin kan fate
nena kan inkar hi la zai khat tia pawh indantir lo ila, kan faten a nachang an
lo hre lo a nih pawhin a nachang hre zawkten kan hrilh hriat hram hram a, kan
fate nena kan inkar inlaichinna hi kan hnuh hnaih fo a pawimawh a ni.
I fate harsatna ngaithla hman lo khawp khan awm ngai
suh ang che. Kan fate hian harsatna a lian emaw a tê emaw an lo nei mai thei.
Chutianga harsatna an lo tawh hunah chuan thurawn tha tak i pe thei lo a nih
pawhin an harsatna ngaihthlaksak hman lo khawp chuan inkhar ping thin suh ang
che. A sawhkhawk lo let leh lam tur tawrh i huam a nih chuan i en liam mai mai
thei alawm, mahse a sawhkhawk lo let leh turin a nghawng chhiat tam turzia
ngaihtuah hmasa fo thin ang che.
Kan fate hian chhungkuaah hian an pawimawhzia an
inhriat fo theih nan thil engkimah rawn fo tur a ni. Tichuan chhungkuaah neitu
rilru an lo pu ang a, chhungkuaah hian an pawimawhzia an lo inhria ang a,
tanlak nan an hman phah sawt mai ang. Thil ho tê kan ti dawn a nih pawhin
chhungkua chu inrawn hmasak zel hi a tha ber a, a Kristian Chhungkaw Nun em em
bawk a ni. Naupangin chinchang an hriat theih chinah phei chuan (Naupang hriat
tur pawimawh chinah chuan...) rawn tel ve zel a tha, tichuan kawng engkimah
neitu chan chang takin an thawk zel ang a, chu chuan nu leh pate nena an
inlaichinna a tinghet zual sauh dawn a ni.
No comments:
Post a Comment