Zo Vapual

Kristian Chhungkaw Nun Zirhona

C. Lalmuankima

Newcastle, United Kingdom

Thuhmahruai

‘Kristian Chhungkaw Nun Zirhona’ han tih ngawt mai pawh chu thupui vuah tur hriatlohthlak ang reng hle mai a, a pawimawh hlea ka hriat ve avangin a thupui inhmeh tur leh inhmeh loh tur lam pawh ngaihtuah chuang lovin ka han pem buh bel ve chawt mai a ni e. Thupui dang han thlan ka tum ngial pawhin he thupui bawk hi a rawn lang leh thin a, thupui rawn lang zingah a buk a rit deuh bera ka hriat avangin mahni insit tak chungin ka han vuah lui hram a ni.

Photo: Google Image

‘Kristian Chhungkaw Nun Zirhona’ tih thupui ber kher hi chu tlema phanchang deuh leh tawnhriat nei tam deuh te, kum thuah pawh tlema chal deuhte han sawi atan a mawi teh reng nen. Chu mai bakah chhungkua lo din tawhten an tawnhriat atangin han sawi zawk se la kan hlawkpui zawk awm mang e aw…tia ka inbuk mek laiin ‘Kristian chhungkaw nun hi chutiang mite chauhvin sawi rawh se…’ tih a awm lo hian min tingampa ve leh deuh va, mahni insitna chu dah thain a pawimawhna hian min uai rih tak siah chuan theihtawp chhuah ve thawr turin ka rilru ka siam fel ta a ni.

Kristian Chhungkaw Nun Zirhona hi kan sawi duh dan azir leh kan uar duhna lam azirin zir tur leh sawi tur tam tak a awm thei ang a, chung zir tur leh sawi tur tam tak awm thei zingah chuan rilruin a ngaih pawimawh zualte la chhuakin kan zirin kan sawiho dawn a ni.

Krista luah chhungkua

He khawvelah hian Krista tel lo pawhin chhungkua tam tak a din theih a, miten an din mek zel bawk a, an la din zel bawk ang a; Kristian Chhungkua erawh chu Krista tel lo chuan a din ve theih tlat loh a ni. Chu chu Kristian Chhungkaw danglamna a ni pawh kan ti thei awm e. Chhungkua hi Kristan a luah loh chuan Kristian Chhungkua a tih theih bawk loh vang. Kristan a luah chhungkua chu ‘Kristian Chhungkua’ tih a nih angin kawng engkimah Lalpa Isua Krista chu an innghahna bulpui ber a ni a, Krista tel lovin chhungkuain ke a pen ngai lo bawk.

Kristan a luah chhungkuaah chuan hlimna leh lawmna, thlamuanna te a awm thin. Chhungkua hi Pathian thu ni lo thil dangin a luah khah vaih chuan a rah chhuah lo awm tur chu ngaihtuah mai pawhin a lungchhiatthlakin a rapthlak a ni. Chuvangin Kristian chhungkua chu Kristan Lalna a channa hmun a ni a, Kristan Lalna a channa hmunah chuan remna leh muanna a awm thin. Lalpa tel vena hmun zel hi hmun nuam, hmun ralmuang a lo ni thin a, Lalpa Pathianin kan in chhungkhurah chair a laka Lalna a chan phawt chuan chhungkua hian a nih dan tur dik takin ke a pen thin a ni.

Kan chhungkua min thlung bettu leh min phuar khawmtu hi Chanchin Tha ni fo rawh se. Pathian thu ni lo thil dang hmanga inphuar khawma inthlun behtir kan tum phawt chuan kan hlawhchham fo vang. Mihring thahnemngaihna hmanga inphuar beh hi a that viau laiin eng emaw ni thil tihsual thuah in mawhpuh a awl thin. Chuvangin chhungkua hi Pathian thu hmanga kan inthlun zawm tlat a pawimawh a, chutianga Pathian thu hmanga kan inthlun zawm tlat phawt chuan engtik lai mahin a keh chhe ngai lo vang. Chhungkua Pathian thu hmanga inthlun zawm nachang hre lo te pawh hi a ni chhungkuaah harsatna leh buaina tawk leh thin ni. Chutianga tilotute nunah chuan a tawpah chhungkaw kehchhiatna hial te pawh a lo thleng thin reng a ni.

Chuvangin kan chhungkua hi Lal Isuan a luah tlat chhungkua ni thin rawh se. Kristan ro a relna chhungkua ni thin rawh se. Tichuan a chhunga cheng member tinte tan pawh malsawmna a lo ni zel dawn a ni.

     A.  Kan fate chungah kut nghatin kan tawngtai thin em?

Hei hi a pawimawh hle mai. Kan fate hian an lu chunga kut nghata tawngtai hi an phu asin! Engvangnge kan tih chuan Pathianin a malsawmna min pekte an ni a, nu leh paten Pathian thua kaihruai tura mawhphurhna kan neih tlat avangin an kal chhuak tur leh an lo hawng tur te pawh Pathian hnena hlanna leh lawmthu sawina neihsak fo hi a pawimawh a ni.

Nu leh pate an fate kal chhuak tur an lu chunga kut nghata an tawngtai thin ka hmuh te hi a va Kristian Chhungkaw Nun tak em ka ti thin. In ni vee m ka hre hauh lo, kei chu hmana ka zin chhuak tur ka pan a kut nghata min tawngtaisak kha vawiin thlengin ka la thlamuanpui tlat  nia! Chuvangin nu leh pate hian kan fate chunga kut nghata kan tawngtaisak hian an ni hman a nuamin a hlim a, an rilru chhungril ber thlengin an thlamuanpui a ni tih hi kan hriat a tha hle mai. Fate malsawm thin nu leh pate pawh an ngaihsanawm ka ti thin. Thenkhat chu kan fate hauh nan aw ki vin tak tak leh sang tak tak chhak chhuah hreh lo tam tak kan awm a, hei hi thil tha ber a ni hauh lo mai. Fate an khum nan aw ki sang tak tak hmang thei si khan fate malsawm nan engvangin nge kan aw kan chhuah ngam loh thin le? Tih hi nu leh pate hian inenfiah tur tam tak kan nei a ni.

Fate hian an puitlin hnuah pawh an nu leh pate tih dan an rawn la chat zel a, an nu leh pate hnung an rawn zui duh hle. Chuti a nih chuan ka fate hian nakinah an puitlin hunah ka hnung an rawn zui dawn a nih chuan vawiina ka awm ang hian rawn awm ve ta se la, ka duh ang em tih hi kan inenfiahna atan kan hman fo a tha a ni. Vawiina kan awm dan anga kan fate awmtir kan duh loh khan insiamthat ngai apiang kan insiamthat fo a pawimawh. Vawiina i awm dan ang chiah khan i faten an rawn chhawm zel dawn a nih chuan i fate tan awm dan tha lo zet hnutchhiah kha a thiang hauh lo vang. Thu sawitu pakhat thu sawi tha ka tih deuh mai ka han zep tel teh ang. Heti hian a sawi a, “Ka upa hnu thlenga ka faten min zah theih nan ka fate hmuh lai ngei pawhin ka nu leh pate hi ka theih chin chinah ka chawimawi a, ka zah a ni….” tiin a sawi a, a tha ka va ti tak em! Thenkhat chu mahni lam chauh hi kan lo inen leh thin a, kan faten nakin lehzela min rawn en dan tur hi kan ngaihtuah thleng thin lo va, a pawi tak zet a ni.