Zo Vapual

"Zalenna Famkim"

C.Lalmuankima

 Bible bung leh chang : Ezekiela 36:27; Rom 7:6; II Korinth 3:17ff

 

Photo : Google Image

'Lalpa thlarau awmna apiangah zalenna a awm thin ' tiin Bible chuan min hrilh a. Lalpa thlarau awp behna hnuaiah chuan Zalenna Famkim a lo awm ta thin a ni. Chu zalenna famkim chu tu dang ni lovin amah Lal Isua ngei chu kan zalenna famkim leh min thlentu chu a ni. Pa thinlung hliam hnu chu ama (Isua) thisen hmangin a han thawi dam a, chumi azarah chuan lei leh van inrem tawh lo chu, Isua Krista thisen avangin kan lo inrem leh ta a, Isuaah chuan Remna Thuthlung kan siam ta a ni. Chu Remna Palai Isua nun neitu apiangte chu, mi zalen an/kan lo ni ta a, Isua zarah Pathian chu 'Ka Pa' 'Ka Pathian' kan lo ti ve thei ta a ni. (Johana 20:17)

 

Chu zalenna famkim min siamsaktu Isua avang chuan Pathianin ni tura min tih chu kan lo ni thei ta a, dawng tura min tih leh chang tura min tih chu Isua zarah a ro luahpuitute kan lo ni ve thei ta......!

Kan thupui lamah khan kir leh dawn ta ila; zalenna famkim kan tih angin zalenna hi chi khat chauh a awm lo tih chu a hriat mai a. Kan nitin nuna kan thil tawn atanga zalenna kan neih hi a pawimawh hle a ni. Zalen tih avanga nun thaw veng, thil engpawh ti ila a thiang vek, thiangzau zirtirna lam kha kan kalpui tum dan a ni lo va, Zalen takin Lalpa rawng hi a lo bawl theih a ni tih leh engthawl taka nun hi a theih a ni tih hi kan sawi uar tum zawk chu a ni e.

 

1. Hlauhna ata Zalenna (Rom 8:15; II Korinth 13:17)

 

Rom lehkhathawna kan hmuh ang hian "Hlauva awm leh turin bawih nihna thlarau in hmu a ni si lo va; fa nihna thlarau in hmu a ni zawk e, chu thlarau avang chuan 'Abba' (Ka Pa) tiin kan au thin hi..." tiin. Mihring hlui mizia chuan kan sa panna lai rawn dekin min rawn tih thaih a tum leh ngei ang, mahse chutih hunah chuan zalenna famkim min petu Isua hming lo lam khuma hlauhthawnna ata zalenna thu lo puan khum hmiah mai tur a ni. Eg. Ringtu nuna ke i pen dawn apiangin nangmah tih thaihtu tih thuanawp tumtu i tawng ve fo vang. A chang chuan kan pianpui, kan thisen zawmpui ngei ngei te hnen atang pawhin hmelma hian hna a thawk thei a, chutih hunah chuan Zalenna Famkim Isua nun kha lo puan khum hmiah la, hmelma (Setana) chu tih tlawmin a awm zel mai dawn a ni.

 

Keini chu a changin ke pen kan han tum a, Peteran tuipui chunga kea kal ve thu Isua hnena a dil a, a kal ve ta ang kha kan ni fo thin. Lal Isua lam en lova a ding leh vei a tuipui fawn hlawp hlawp te a en khan Petera kha a zam a, tuipui ah a pil dawn ta mai ang khan.....keini pawh chunglam Isua lam en lova min tihthaihtu lam kan en zawk avangin kan zam leh thin a, Lal Isua en lova min tihthaihtu lam kan la thlir chhung hi chuan kan la zam leh fo vang a, kan la hlau fo bawk ang a, Isua nun kan neih hi kan thlamuanpui thei thin lo vang. Amaherawhchu amah Isua lam kan en tlat erawh chuan kan hmaa thlemna/fiahna lo thleng thin te chu kan chaw tui ber a lo ni tawh ang a, hnehna kan chang zel dawn a ni.

 

Mihring pianphunga dawihzep riau hi a awm theih bawk a, chung mite tan pawh chuan Isua thlarau hi thlamuanpuina tham a tling tho tho. Lalpa khi i rinchhan ngam chin chinah thlenpui tur che in a inpaih reng a ni.

Photo : Google

 

 

2. Dan ata Zalenna

 

Thuthlung Hlui hun atangin kawla ni chhuak chhiarin Dan thu hmangin (Kawla ni chhuak chhiara inthawi leh Dan thu hmangin Pathian tih lawm tumin an lo bei nasa thin a...) pa lungawina thlen thei pakhat mah an awm tak si loh avangin ama fapa ngei chu tisa sual ang pu in, sual thawi nan rawn tirin kraws ah chuan Dan thu zawng zawng chu a rawn khengbet a, a khawngaihna dan thar Isua nun chu min lo pe ta zawk a ni. (Rom 8:3) Chu khawngaihna dan thar nun nei tawh tute tan chuan thiamloh chantirna reng a awm tawh lo va. Kan aia thia leh tho leh ta zawka nakina vanram kan thlen hun pawha 'Pa' hmaa min la sawisaktu tur kha kan lam tang a nih tlat tawh avangin thiamloh chantirna tur a awm tawh dawn lo.

 

Hmelma chuan i tihsualna lai changin thiam loh chantir che tumin a thlem leh ang che. Eng eng emaw Thuthlung hlui dan hmangte pawhin a ni mahna. Thuthlung Hlui Dan khirh tak tak hmangin a rawn dek leh ang che ang a, chutih hunah chuan Thuthlung Thar Dan thar Isua nun hmang khan i lo let thla hmiah hmiah tawh dawn a ni. Thuthlung Hlui Dan chuan 'Ti rawh' 'Ti la i nung ang' 'I tih loh chuan i thi ang' tih thu te hmangin khuah khirh a rawn tum leh ang che ang a, Thuthlung Thar Dan Isua nun hmangin 'Mi tihsak tawh' 'Mi tlan tawh' 'Mi peksak tawh' tih hmangin kan lo let thla zung zung tawh mai dawn a ni. Thuthlung Hlui Dan chu thihna a ni si a, Thuthlung Thar Dan erawh chu chatuana nunna a ni zawk a. Thuthlung Hlui Dan hnuaiah chuan Pathian thu nunpui turin i tih theih loh thleng thengin a phut che a, Thuthlung Thar Dan erawh chuan Isua Dan zawng zawng zawh famkimtu pek kan nih thu min puansak ta zawk a. Thuthlung Hlui Dan hnuaiah chuan pa lung tih awi tumin anmahni theihna hmangin Pathian tan rawng an bawl thin a, Thuthlung Thar Dan hnuaiah erawh chuan Isua nun min pek hmangin Pathianin kan rawng min bawlsak ta zawk a ni. Thuthlung Hlui Dan hnuaiah chuan sual tlansan turin mahniin tan an la a, Thuthlung Thar Dan hnuaiah erawh chuan mahnia kan tlansan theih loh sual chu kan nun a nih tawh loh thu min puansak a, amah Dan thar Isua nun chu kan nun thar atan min puansak ta zawk a ni.

 

Rawngbawltu pakhat thu sawi ka duh em em mai hi ka han zep tel ve teh ang.

"Nakinah rorelna niah kan la ding chhuak ang a, Nunna bua hming ziak te hming an han lam ang a, Isua hming an han lam apiangin a nun neitute chu kan lo 'Eih' ve lauh lauh ang a; chutah Setanan i hming a rawn zawng ang a, i hming a awm ve lo tiin Pathian hmaah a rawn hek ang che ang a, chutah a nun min petu leh Pa hmaa palai hna rinawm taka min thawhsak tu Isua ngeiin min han sawisak ang a. Setana hekna te chu a thisen hmanga hming nemnghet (signed) a, Pa thinlung a han tih lawmna thu hmang chuan hmelma hekna thu chu leh thalin hmelma Setana chu zak taka a han siam tur ka hmuh hian hmelma Setana, khawvel mihring awm tirh ata mi zawng zawng bumtu, sual tin renga khat chu chawh takin Hremhmun a an han paihthla tur hi ka hmu chak ber a ni." a tih hian min va hneh tak em....! Keini pawh nakinah vanram kan thlen hunah Pa hmaah kan la ding ang a, hmelma tih tlawma a awm hun hi kan la thlir dawn a ni.

 

He lai thu hian a hrilhfiah chiang viauvin ka hria. "Nimahsela Dan thiltihte avangin mi thiam changin a awm lo va, Isua Krista rin avang chauhvin thiam changin a awm zawk tih kan hre si a...." (Galatia 2:16) Mosia hmanga a pek Sinai Tlang Dan chuan 'Ti rawh' 'Sim rawh' tiin mihringte zawm famkim theih loh chu a phut a, Isua Krista hmanga a pek Kalvari Tlang Dan thar (Khawngaihna Dan) erawh chuan 'Ka pek tlak sak tawh' 'Ka tihsak tawh' tiin a thisen hmangin Pa lung a han ti awi ve ta thung a ni.