Zo Vapual

Lemchang Ngai Lo - Nu Hmangaihna Thinlung

C. Lalmuankima
Slough, United Kingdom

Hringnun hi lemchanna khawvel a ni tiin ti ti thiam deuhten an tawngkamah an hmang rimin an sawi uar hle mai a, an thlirna zawn atang chuan a dikna lai tam tak chu a awm ngei ang le. Amaherawhchu hringnun hi lemchanna khawvel angin miten hmu fo thin mah sela, lemchang ve ngai reng reng lo pakhat erawh a awm a ni. Chu chu engnge kan tih chuan Nu Hmangaihna Thinlung hi a ni. 

Photo: BBC

Nu Hmangaihna Thinlung chuan thil dang zawng zawngin lem an chan lai pawhin ani chuan lem a chang ve ngai lo va, a ti tak tak a, a pasal fanaute tan a inhlan ral thak thin. Hei tak mai hi mi tam takin kan hrethiam lo fo thin a, nu hmangaihna thinlung hi pawnlang takin kan chhuah a, a pawi hle a ni. 

Nula leh tlangval tam tak inhmangaih te chuan lemchangin sakruang hlimtlang mawina a lo chuai chinah emaw rilru duh thu a hmun loh avang emaw ni te pawhin a ni mahna an inhmangaihna chu chhawm nung zel thei lovin a tawpah inhmelmakna hial te pawh an thlen thin. Chutiang zelin ram hruaitu pakhat leh pakhat inkara inlaichinna te pawh eng emaw ni avangin a chhe thuai thin a, ngai a awh thin lo bawk. Nu hmangaihna thinlung erawh chuan a tir atangin a tawp thlengin ngai a awh a, kiam lam aiin pun lam a pan zel a ni lawm ni tih theihin a hmangaihna hi a ngai reng thung. 

Lemchang thiam tak takten lem an han chan tak tak hi chuan hmuhnawm kan tiin awmhmunah khabe dawm leh khup khawkherh chung meuhvin kan thlir doh doh thin a, kan thiltih lak lawh lai pawh kalsan thak khawpin kan thlir peih a, a zunah kan uai fo thin. Lemchang thiamte hi an chan thiam poh leh engtik lai maha lemchang ve ngai lo thinlung atanga thlirna tarmit vuah thin Nu Hmangaihna Thinlung atang chuan buh lem leh buh tak thliar a awlsam angin an thliar thiam nghal mai a, a tawpah lemchang ngai lo thinlung bawkin a hneh thin a ni. 

Thinlung lemchanna hian a rah chhuah tha lo tak mai chu chhungkuaah pawh inthendarhna hial a thlen thin hi a ni. Chhungkuaah pawh hian nu hmangaihna thinlung lemchang ngai lovin a pasal fanaute a enkawl dawng pha leh pha lo chu danglam tak a ni a. Nu hmangaihna thinlungin a enkawl sei len fanaute phei chu an hlawhtling hle a ni. John Rondalph thu sawi hi chuan vawiin thlengin ka nun hi min hneh a, han ngaihtuah nawn leh thin mah ila keimahah hian ril takin thu a la sawi tlat nia! Eng thu nge a sawi i lo ngaithla teh ang aw. Heti hian a sawi a, "Ka naupan laia ka nuin ka kut vuana a bula min thingthittir a, 'Kan pa vana mi, i hming zahawm rawh se' tih min zirtir hrechhuak hauh lo ila chuan, Pathian awm ring lo mi, Pathian a awm lo ti pawl ka ni ang.'' a tih hi a ni. Nu zirtirna leh hmangaihna dawng tha lote chu an nunkawng hi a pelhe tlat thin a, a tawpah nunkawng tha lo zawhin sual lam kawng an zawh nge nge thin. Chuvangin nu hmangaihna thinlung atanga chhuak zirtirna leh fuihna hi an fate pawhin an ngeih ber a, vitamin tha ber berte ai pawhin a hlu zawk a ni. Chutianga nute hlutna leh pawimawhna chu hriain W. M. Thakeray chuan heti hian a lo sawi a, "Naupangte hmuiah chuan nu hming hi Pathian hming ang hiala hlu a ni," tiin a lo sawi hial reng a ni. 

Nu hmangaihna thinlung hian engtik lai mahin lem a chang ve ngai lo va, a ti tak tak a, a pasal fanaute tana a inpek ral thak hian a hlim em em thung. Hei tak mai hi mi thiamte pawhin Pathian hmangaihna thinlung hnaih bertu chu nu hmangaihna thinlung hi a ni an lo ti a, an tehkhin thiam hlein ka hria. Pathian hmangaihna hian lem a chang ngai lo va, mi sual ber tan pawha a thisen far ral thak khawpa a inpekna hi a ropui tawp lo a ni. Hei tak mai hi Pathian hmangaihna ropui tarlanna a ni a tih theih bawk ang. Lemchang ngai lo Pathian hmangaihna chuan mi sual leh boral mai tlak kan nih lai pawhin a fapa Isua Krista hmangin chatuan nunna min pe a, chu hmangaihna chuan lem a chang ngai lo va, a a uang ngai hek lo. Pathian hmangaihna chu mihring hmangaihna nen chuan tehkhin rual chu a awm lo na chungin Amah hnaih bertu chu nute hi an ni a tih theih ngei ang le.

Kan thu sawi kal mek hmawr bawk nan nu hmangaihna thinlung leh Pathian hmangaihna thinlung inanna tlem i han tarlang teh ang. (Pathian hmangaihna thinlung  leh mihring hmangaihna thinlung chu tehkhin theih rual a ni lo kan tih tawh kha....) Nu hmangaihna thinlung leh Pathian hmangaihna thinlung inanna lai sawi tur tam tak awm thei zingah pahnih khat chauh hi i han sawi teh ang. Pathian hmangaihna thinlung chuan mi sual ber leh chhelailet der kan nih lai pawhin min ensan lo va, ensan a hnekin a hmangaihnain min fawp fai a, a fapa hmangaih taka ramah min dah a, mi sualten a lam hawia an lo sim leh hian a hmangaihna thinlung kawngkhar a kharhnansak ngai lo. Chutiang bawkin nu hmangaihna thinlung pawh hian a faten sualah tluksan thin mah sela engtik lai pawha an lo let leh theih nan a thinlung kawngkhar hi a khar ngai lo a ni. Chu nu hmangaihna thinlungah chuan lemchang nun a awm ve ngai lo va, a ti tak tak a, a hmangaihate tan a inhlan ral thak zawk thin. Chu hmangaihna thinlung chu a hlut em avangin a man bithliah theih a ni lo va, khawvel pawhin a ngaihhlut ber leh man a pek huai ber chu nu hmangaihna thinlung hi a ni.

https://www.bbc.co.uk/news/extra/gNcHgmLgmv/yazidi-mothers-choice