Zo Vapual

Ka Pa Theological College

C. Lalmuankima

Slough, United Kingdom

'Ka pa Theological College-a ka kalna kha tun thleng hian ka chhawr ta a ni...' Rev. Vanlalzuata

Kohhran leh khawtlang rawngbawlnaa pate hniak hnung theihtawpa ka lo zui ve thinna kha vawiin thlengin chhawr tangkai hlein ka inhre thin. Mi thenkhat chuan kohhran leh khawtlanga akul ataia inhman te hi an sawisel lek lek thin a, mahse kei ka tan chuan ka hringnun inzirna bul tanna pawimawh tak a ni ve thung a, kei chuan kohhran leh khawtlanga a tam thei ang bera inhman tluka min chherhriamtu thil tha hi a awm thei chuangin ka hre lo. Kohhran leh khawtlangah kan inhmang lo a nih chuan thil dangah kan inhmang tho tho va, chutianga thil danga kan inhmanna chuan sual kawng min zawhtir fo thin zawk a ni. Chuvangin kohhran leh khawtlanga inhman hi a hlawk a, hringnunah min chher puitling bawk. 

Mi upain an lo sawi angin, 'Dotu za, duhtu za' tih a ni a, kan thiltihnaah hian dotu za kan neih laiin duhtu za pawh kan nei tel ve a ni tih hi hre kar ila. Min sawiseltu leh min sawihnawmtu an awm laiin min duhsaka min fuiha min chawimawitu pawh an awm ve bawk a ni tih hi kan hriat reng atan a tha hle ang. Mite sawisel avanga kan thiltih tha lai kan chawlhsan zel a nih chuan engtikah mah hlawhtlinna kan tawng ngai lo bawk ang. Mite sawiselna hi a thlir dan kan herrem thiam phei chuan min tichaktu hmanraw tangkai tak a ni thei thung. 

Photo Image: Google 

Ka pa thu min hrilh hi ka sawi chhawng ve fo thin a, vawiin thlenga ka benga a la cham reng avangin sawi nuam pawh ka ti a, sawi chhunzawm zel pawh ka tum. Chhung inkhawmnaah heti hian a fate min hrilh a, "Engpawh tiin khawi hmunah pawh awm mah ula, LALPA leh a kohhran hi bel tlat zel ang che u. Keini mi retheiten kan mawina awm chhun chu LALPA leh a kohhran belh tlat hi a ni." tiin. LALPA leh a kohhran bel tlat tura min lo fuihna tawngkam kha vawiin thlengin ka bengah hian a la cham a, hei tluka fate tana thurochhiah tha tak a awm chuang dawn em ni ka ti hial a ni. Kan fate hi sum leh pai, in leh rohlu tha tak tak kan hnutchhiahsak thei lo a ni mai thei a, amaherawhchu sum leh pai, in leh lo tha pui pui aia tha leh hlu zawk chu kan fate hi Pathian leh a kohhranho zinga tel tlat tura fuihna hi a ni ka ti lo thei lo. Pathian leh a kohhranho thiltihhonaa tel tam tluka nun min tihlimtu pawh a awm thei chuangin ka hre lo bawk. Khawi lo kal ni khuaa LALPA leh a kohhran thiltihhona ngaih pawimawh loh hi thil tha ber a ni lo va, a tawpah phei chuan sualin min hneh duh hle a ni. Chuvangin khawi hmunah pawh kalin awm mah ila, LALPA Pathian leh a kohhran belh tlat zel hi ringtu tan phei chuan a pawimawh em em a ni. Hei hi ka pa Theological College atanga ka zir chhuah pawimawh tak a ni ka ti lo thei lo. 

Ka pa hi zirna lamah chuan middle sikul passed awrh a ni a, chhungkaw harsatna avangin zirna chhunzawm thei tawh lovin lo leh ram lam hna thawh a ngai a. Zirna chu zir chhunzawm chak hle mah se, a chawlhsan a ngai ta tlat a ni. A chhinchhiahna a tha a, chhiarkawp han chawh vel phei hi chu a fate hian kan tluk lo hle hian ka hre thin. A tu leh faten kan zir peih chhung chu zir tura min fuihtu tha tak a ni. Faten zirnaa an hlawhtlinna tur a nih dawn phawt chuan mahni pawh rethei zawka insiam ngam nu leh pate tluka fate tana hlu hi an awm chuang lo vang. 

Tun tumah hian kan thu sawi tum a fiah theih nan ka pan min lo kaihhruai dan tlem azawng ka han zep tel duh a. Thu hmasa lama kan sawi tawh angin ka pa hi a that lai hunah khan kohhran leh khawtlanga akul ataia ama thiam ang tawk tawka inhmanga khawtlang thalai pawl te pawh lo hruai ve thin a ni a, chu chu Khawtlang Thalai Pawl pawhin nemnghehpuiin Khawtlang Thalai Pawl (Satawm Khawtlang Thalai) pawhin Satawm Khawtlang Thalai (SKT) Golden Jubilee a hman tum khan President nihna chelh rei ber chawimawina pawh a lo hlan ve hial a, khawtlang hi ta neih ve tak thin a ni. Khati lam kha kan sawi tum a nih dawn loh avangin khati zawng khan han chep bung tawp rih ila. 

Kan thupuia 'Ka Pa Theological College' ka han tih kherna chhan zawk hi kan thlur bing dawn a ni. Ka pa hian Theological College a kal tak tak tihna lam ni lovin Pathian thu leh kohhran lama min kaihruaitu pawimawh a nihna zawk hi sawifiah nan ka rawn hmang mai zawk a ni. 

Kohhranah hian department chi hrang hrangin kan inthen thin a, naupang, thalai, nuho, pavalai leh kohhranpui tiin. Naupang Sunday Sikul kan luh theih atangin ka pa hian Sunday Sikul tha taka kai tura min fuih mai bakah amah ngeiin hruaitu hna te a thawh ve thin avangin min hruai thin a, Sunday sikul kai loh te kha a duh ngai lo a ni. Ka la hriat reng mai chu Junior department kan nih laiin zing Sunday Sikul inkhawmnaah hian Bible chhiar turin min ruat ve a, ka huphurh hle mai a, keimah chuan eng ber nge ka chhiar dawn tih pawh ka hre chuang lo. Matthaia 5 thua Lal Isuan Tlang chunga a thu sawi (nihlawh thu) kha chhiar turin min ti a, tichuan keipawh chuan kaiza tha leh aw khur dar dar chungin zing Naupang Sunday Sikul inkhawmnaah chuan ka han chhiar ve a, hlau leh zak chung chungin ka chhiar chhuak ve ta hram a ni. Khatia hlau leh zak leh khur chung chunga chhiar tura min fuihna khan a lehpek lo awm turah pawh huaisenna min pe a, a hnu lehah chuan zam chhe lutuk tawh lovin tha takin ka chhiar ve zel theih phah ta a. Tichuan Naupang Sunday Sikul inkhawmpui te kha a han ngai pawimawh thei khawp a, kan damlo te a nih loh chuan naupang inkhawmpuinaah hian min kaltir ngei ngei thin. Kha khan kohhran naupangho zingah pawh ngampatna leh inkiltawih lohna min siamsak a, kohhran ngainatna min siamsak tel bawk a ni. Hei hi ka pain Pathian leh a kohhran rawngbawlna lama min kaihhruaina pawimawh tak niin ka hria. 

Pathian leh kohhran thalaite duhsakna zarah ziaktu (Secretary) hna te tling lo chung chunga kan han chelh ve lawp lawp lai pawh khan ka pa hian minute ziah dan leh committee sawm dan thlengin min hrilh thin a, ka tan chuan a tangkai tak zet a ni. Chu mai baka ka la hriat reng chu kohhran thalai committee-naah pawh kan pafain kan tel a, thalai lama tawnhriat lo ngah tawh a ni bawk a, rorel ilo velah pawh thu kal lam leh hawng lam a man chak hle a, thalai tana tha tur nia a hriatte chu zam hauh lovin a dinchhuahpui ngam thin a ni. Hei hi kohhran thalai lama ka pa Theological College-a ka zir chhuah pakhat a ni ka ti ve bawk. Rorelnaa kan tangkaipui loh tur nia hriat sa reng member tam lam vote pek ngawt te hi a tha lo a ti thin a, a hnu leha kan thatpui tur leh tangkaipui tur lama vote thlak fo hi a finthlak thu min hrilh a, hei hi keimahah pawh ka tangkaipui hlein ka inhria. Mi thenkhat chu kan thian thaten an rawn rawt a nih phawt chuan a hnu leh lama kan thathnempuina tur pawh awm hauh si lovah thiante hmaizah avanga an rawtna tawmpui mai kan ching thin a, hei hian pawl hmalakna a tithuanawp fo thin reng a ni. 

Sawi tawh angin ka pa hi lehkha zir sang a ni lo nain ama thiamna zawnah erawh chuan mahni chanvo fel taka hlen kha a ngaih pawimawh ber a tih theih hial ang. Tuk tin mai chhuaka Hna thawk ve thin a nih avangin kohhranin duhsak taka chanvo (inkhawm kaihruaitu, duty leh adt.) an pek changa zanriah emaw tukthuan emaw ei kan la hman loh chang te hian chaw ei aiin kohhrana a chanvo neih kha a ngai pawimawh zawk a, chaw ei lova a inkhawm chang a tam mai. Kei ngei pawhin vawi duai lo ka hmu a ni. Kohhran rawngbawlna hi a ngaih pawimawh hmasak ber a ni a tih theih hial ang. Hetianga kohhran rawngbawlna lama kawng kawhhmuhtu leh min kaihruaitu pa ka nei hi vannei ka inti hle a, ka pa lak atang hian thil tam tak ka zir chhuak ka ti lo thei lo. Khawi lo thiltihhonaa kalkhawm mipui hmaa zam chhe hauh lova han din chhuah ve ngamna te, Bible chhiar leh tawngtai hun han hmanna te, a tul dan azira Thukhawchang han sawi ngam ve mai te hi ka pa lak atanga ka zir chhuah a ni a, ka lawm tak zet a ni e. Tun dinhmun thleng thei tura min chhertu chu ka pa leh kohhranho hi an ni.  

Chu chu 'Ka Pa Theological College' tiin ka han vuah ve tawp a, chumi atanga ka zir chhuah chu vawiin thlengin ka la chhawr tangkai zel a nih hi maw!