Zo Vapual

Lalpa Pathian tan i hun sen a thlawn ngai lo

C. Lalmuankima 

Slough, United Kingdom 

Lalpa tan a nih chuan minute khat chauh pawh hun seng mah la, i hun sen kha a thlawn ngai lo vang. Pathianin heti khawp hian hun tha min pe a, chuti chung chuan a tana hun sen kan hreh thin lutuk erawh hi chu a nih dan tur a ni ngai lo. 

Lal Isua ngeiin a taksa leh a thisen zawng zawng Kraws lerah kan tan a hlan ral thak a, chuti chung chuan eng vanga a tana hun sen hreh nge kan nih le? Kan nun hi inenfiah a va hun tak em!

Photo: Pinterest 

Lalpa Pathian tana hun sen hreh siin a van malsawmna erawh dawn kan chak leh em em lawi si a, mihring rilru hi chu a va mak thin tak em! Van malsawmna tam tak au thla tur hian Lalpa Pathian tana hun sen ve a ngai asin! Lalpa Pathian tana hun seng phal si lo chuan eng malsawmna mah i au thla hlei lo vang e.

Pathian nena inlaichinna nghet leh tha siam tur pawh hian a tana hun sen ve a ngai asin! Lalpa Pathian tana hun seng ngai lo chuan engtik lai mahin Amah nenin inlaichinna tha leh nghet a siam ngai lo vang. Chuvangin Pathian nena in inlaichinna nghet siam turin Amah Pathian tan hun seng thin ang che. 

Lalpa hminga kan tihna hmun zelah hian a ni Pathian nena kan inlaichinna siam ngheha lo awm zel ni.

Kan ni tin hun hman dan hi thlirlet nawn fo ila, ni khatah darkar 24 a thlawna pekin kan awm a. Chumi zing atang chuan darkar khat tal pawh Lalpa Pathian tana hun seng hman lo khawpa khawvel thila kan inham buai a nih chuan Hun min petu Pathian hnen atangin thil tha beisei leh chuan tur kan nei lo tihna a ni. 

Mi tam tak chuan Lalpa Pathian tana hun sen han sawi hian tawngtai ngawr ngawr emaw Bible chhiar ngawr ngawr emaw inkhawm ngawr ngawr emawah kan ngai thin a, a dikna lai awm mah se, chumi bakah kan taksa hriselna atan exercise chi hrang hrang kan la ang hian kan thlarau nun a hrisela a thanlen zel theih nan Pathian thu chhiar leh ngaihthlak te, Pathian lam hla ngaihthlak te, rinnaah kan awm leh awm loh mahni inchhin te hi kan tihmakmawh zinga pakhat a ni. Chu chuan keimahni leh Pathian inkarah inlaichinna nghet min siamsak ang a, hringnun hi hlawk takin kan hmang zel tawh mai dawn tihna a lo ni reng mai. 

Mi dangte tan hun sena tanpui ngaite tanpui leh chhawmdawl ngaite chhawmdawl chen hian Lalpa Pathian tan hun kan seng thei. Lal Isua ngeiin 'Heng mi te berte chunga ti chu ka chunga ti in ni....' (Matthaia 25:40) a tih angin tanpui ngaite kan tanpui a, chhawmdawl ngaite kan chhawmdawl hian kan hriat loh hlanin Lalpa Pathian tan hun kan lo seng reng tawh tihna a ni bawk. 

Mi thenkhat chu thil ropui tak leh lian tham takin bul tan kan tum a, chutianga kan tih chauhvin Lalpa Pathian tan hun seng bik viauvah kan inngai thin. Mahse chutiang chu a ni hauh lo, kawngsira mi rethei leh kutdawh kan tanpuia kawm melh melh chung pawh hian Lalpa Pathian tan hun a lo sen theih reng mai. Mi zawng zawng hi ramthim, ramrovah rawngbawlin kan chhuak vek thei lo vang, mahse kan rawngbawl ve theihna tur Lalpan min siamsakah erawh chuan rinawm leh taima taka kan thawh phawt chuan Lalpa Pathian tan hun kan seng tihna a ni. Chutianga kan hun kan hman phawt chuan kan hun hi kan seng thlawn ngai lo vang. Hringnun a ral huna kan tlantu hmel kan hmuh hunah kan lawmman tur tam tak nen a pungin Lalpan min la pe leh dawn a ni. 

Lalpa Pathian tana hun sengtute nun tluka duhawm leh awhawm a awm lo va, Pathian nena in inlaichinna a ngheh zel theih nan Lalpa Pathian tan i hun sen hreh ngai suh ang che. Mahni tuhrah seng theuh tur kan nih avangin nakinah i inchhirna khua a sei loh nan Lalpa Pathian tan i hun sengral thin ang che. Lalpa Pathian tan i hun i senral ngam chin chinah Lalpa Pathian khi i hnenah inpuang lovin a awm ngai lo vang. Lalpa Pathian tana hun seng thinte hian an hun sen a thlawn ngai lo a ni.