Zo Vapual

Hun ka nei lo...??? 

C. Lalmuankima 

Slough, United Kingdom 

'Hun ka nei lo....' tih hi chu mite hmaa kan inphat mawina leh tlip mawina mai a ni. Hun ka nei lo kan ti hi chu kan hun pek duhna hmun azira hun nei leh hun nei lo thei kan ni ve bawk. Chuvangin i hun pek duhna hmun azirin hun i nei thei a , i hun pek duhna hmun azir bawkin hun i nei lo thei bawk.

Siamtu Pathianin kan ni tin hun hi kan hman tur indaih tawk theuhvin min pe vek a, chu chu kan hman thiam dan azira tangkaipui thei leh tangkaipui lo thei kan ni. Kan hman thiam dan azara hlawkpui thei leh hlawkpui lo thei kan ni bawk. 

Photo : Google Image

Pathian pawlna hun nei lo khawpin i buai thin em ni? Lalpa nena inpawlna hun ka nei lo kan ti hi chu mahni leh mahni kan inbumna mai niin ka hria. Pathian be hman lo khawp chuan i hnaah i buai ka ring lem lo. I ngaih pawimawh loh avang zawka Pathian be hman lo anga inngaihna i nei a ni zawk ang. Entirna pakhatin ka han tarlang teh ang. Pathian be hman lo khawpin i hnaah lo buai ta pawh ni la, i hnathawhna kalkawngah tal khan Lalpa nen hun hlimawm tak in hmang thei asin!

Ka tih dan thenkhat ka han share ve teh ang che aw. Keimahah a hlawkzia ka hriat atang chuan ka kawng kal hi a thlawnin ka kal ngai lo va, kal paha sermon emaw Bible bung leh chang chham emaw gospel hla emaw ngaihthlak te hi a nuam ka ti em em a, Pathian nena inpawlna tha tak niin ka hria. I hnathawhna hmunah i rilru i seng a nih pawhin i hnathawhna hmun i pan mek lai te, i hnathawhna atanga i hawn mek lai te kha sermon ngaihthlakna hun tha leh remchang atan emaw gospel hla ngaihthlakna hun tha atan emaw han hmang chhin teh. I rin ai daihin i hnathawhnaah pawh i hlimin i thawk sawt ngei ang a, i nunah hlawkna tam tak i hmu ve ngei ang. 

Thil tha tih tur tih nachang kan hriat thin loh vang leh hre reng sia kan tih si loh avanga kan mamawh loh thleng thlenga harsatna kan nuna lo thleng thin te hi kan ngaihtuah ngai em aw? Lalpa tan hun kan pek phal thin loh avangin khawvel thilte hian kan nunah lalna an chang leh thin mai a ni zawk lo maw? Hun min petu Pathian tan hian engvangin nge kan hun hi kan ui leh tlat thin le? Han ngaihtuah chian chuan kan hun hlu zawng zawng hi a tan pe vek tur kan ni zawk asin....! 

Kan duhna zawnah chuan hun kan pe thei lutuk. Kan duhna zawnah chuan kan hnathawh lak lawh lai pawh kalsanin leh hnathawhnaah chhuanlam siamin hun kan pe thei lutuk ringawt. Mahse hun min petu ber Lalpa Pathian tana kan hun kan pe phal thin lo hi a pawi tak meuh va, kan malsawm dawn tur ang pawhin malsawmna kan dawn theih loh phah thin a, kan malsawm dawn tur pawh keimahni ngeiin kan inkhar hnan thin a ni. Tunlai Social Media (Facebook, Twitter, WhatsApp...etc.) khawvelah kan hun pumpui kan pek theih laiin kan biak lai Pathian tan chuan darkar chanve emaw darkar khat lek emaw hun pek pawh kan ti thei lo hi ngaihtuah chian chu a ngai a ni. Kei ngei pawh hemi zawnah hian zir tur ka la ngah hlein ka inhria. Heti zawng hian ka ngaihtuah lek pek a, Pathianin ni tin darkar 24 min pe a, mi hausa leh mi ropui leh thiltithei an nih avangin a duhsakin a pe tam bik chuang hauh lo. Mi hausa leh mi retheite pawhin ang khata kan chan theih chu siamtu Pathianin min pek 'Hun' hi a ni. Chu hun chu sawi tawh angin ni khatah darkar 24 kan dawng a, darkar 24 atanga darkar 2.4 hours chu sawma pakhat a ni ta mai a, chu sawma pakhat pawh chu min petu tan kan pe let phal lo tlat mai hi malsawmna dawn chu kan la hlat deuh hret zel niin a lang. Sum leh pai zawngin sawma pakhat chu kan pe kim thei hle pawh a ni thei, kan nunah kan hlawkpui viau pawhin ka ring. Chu aia hlawkpui lehzual tur chuan ni tin a thlawna kan hun dawn atanga sawma pakhat chu pe phal (pe thei) thin ila chuan tun ai hian kan nunah kan va hlawkpuiin malsawmna kan va dawnpui nasa dawn ve aw....tih te ka ngaihtuah thin a! Hun pek erawh la inzir ka ngai hlein ka inhria. 

Pathian tana hun pe tam apiangte nun hi a hlim thin a, an inchhir ngai lo bawk. An hun zawng zawng pawh hlan ral thak mah sela, Lalpa tana inpekna sang lutuk a awm loh thu an inhmu chhuak fo thin reng a ni. I hun hlu tak petu che kha hrechiang la chuan a tana 'Hun ka nei lo' i tih hi i sawi chhuak leh tawh ngai lo vang. Tun hun zel pawh hi a khawngaihna avang chauhva kan dawn a ni a, chu hun min petu Pathian tana kan hun zawng zawng kan pek hi a phu hliah hliah a ni.

Tun hun zel hi Pathian khawngaihna azarah kan dawn a ni tih hi hrechiang ila, tichuan a tana hun pe hman lo khawpa khawvel thila kan hmanhlel thin te hi a nep sawtin a rinawm. Khawngaihna hun hlu tak min petu hi kan hriatchian thin loh avangin a tana hun pe hman lo khawpin khawvel thilah kan inhambuai thin a, chu chuan a tawpah keimahni bawk min vel tap leh thim a ni. 

Tun hun zel hi Pathian khawngaihna zar liau liauva kan dawn leh kan chan a ni a, nakin hun erawh Setana chan a ni ve thung a ni tih hi i hre thar leh ang u. I nakin hun lo awm tura inchhirin awmzia a neih tawh lohna hmuna a hruai thlen hma che khan i tun hun hlu tak kha Lalpa Pathian tan hlawk takin hman tum thin ang che. I tun hun hlu tak kha Lalpa Pathian tan i hman that phawt chuan i nakin hun lo awm leh turah pawh i ngaihtuahawm lo vang. I tun huna Lalpa Pathian tan 'Hun ka nei lo' i tihna khan nakin hun lo awm turah Lalpa Pathianin i tan hun a neih loh ve hun a thlen palh hlauh chuan a pawi hle dawn a nia. Chuvangin Lalpa Pathian tan hun nei lo khawpin insiam ngai suh ang che.