Zo Vapual

I mission i thawk tha em? 

C. Lalmuankima 

Slough, United Kingdom 

'Mission' tih thumal hi kan mi thiam hmasa J.F.Laldailova khan a Dictionary-ah heti hian a hrilhfiah a, 'Palai intirhna, palai tirh chhan, palai rual, kohna, palai hmunpui, sakhaw theh darhtu atana tirh chhuahte' tiin a dah a. A bik takin Kristiante chuan Lal Isua vana lak chhohva a awm dawn tum khan a zirtirte hnena a thuchah hnuhnung chu chang chawiin khawvel hmun tinah kala hnam tina mite zirtira siam tura tih kan nih thu hian a tifiah hle a ni. (Matt 28:19-20a).

Mission han tih hian mi tam tak rilrua lo lang hmasa ber mai chu ram thim ram rova (Chanchin Tha la hmelhriat reng reng lote hnena rawngbawlna) rawngbawlna hi a ni a, a dikna lai tam tak a awm ve bawk tho mai. Pathian thu la hre ngai reng reng lote sawina a nih theih lai hian keimahni in chhungah pawh Pathian thu hre fo si-a piantharna la chang hauh lote hi a kawhtir theih ve bawk a ni. Mission thumal hi Tlangmite rilruah chuan a mikhual lo hle mai a, mahni tawng tluka kan hman leh rilrua fiah a ni a tih theih bawk awm e. A...mission chungchang hrilhfiah vak lam kha chu kan sawi tum a ni viau lem lo va, mimal tin hian kan mission hi kan thawk tha tawk em tih lam hi kan sawi tum tak zawk chu a ni. 

Pathianin a hunna hmun che a nih chuan rinawm takin thawk mai ang che. Lalpa Pathianin min hunna hmun a nih chuan taima tak leh rinawm taka thawh mai tur a ni. Chuti ni lova min hunna zawnah lungawi lohna emaw a ti-titeuh zawnga awm kan chin viau chuan Lalpa malsawm dawngtu kan ni thei ngai lo vang. 

Kan mission hna hi khawi hmunah pawh a ni thei. Pathianin thawk tura min tihna hmun apianga rinawm tak leh thuawih taka thawh zel mai hi malsawm dawnna pawh a ni. Entirnan ; Chhungkaw nu ber i ni a, i mission thawhna hmun atana i in chhung kha Lalpan a thlansak che a nih chuan i pasal fanaute tan rinawm taka thawh kha i hna tur chu a ni mai. I in chhung a nih avang khan mission hna thawk lo bikah inngai reng reng suh. Chhungkaw kal pela ram thim ram rova kan va kal avang ngawt khan mission kan thawk bik viau tihna a ni lo va, Pathianin min hunna hmunah zawk hian kan thawk em tih leh Pathianin min hunna hmunah hian thahnemngai takin kan thawk em tih hi a pawimawh ber chu a ni zawk. Mi zawng zawng hi ram thim ram rova kal vek ta ila, tuna chhungkua leh kohhrana enkawl chhunzawm ngaite hi tuin nge enkawl chhunzawm ta ang?

Entirna mawlmang tak ka han zep tel teh ang. Mi zawng zawng hi lo vatin thlai chi tuh vek ta ila, chu kan thlai chi tuh chu tuin nge enkawl chhunzawm ang? Hei hi kan sawi tum tak zawk chu a ni, a thenin thlai chi an tuh a, a thenin an enkawl chhunzawm a, a thenin a chawmlen hna an thawk bawk ang hian Lalpan min hunna hmunah hian rinawm takin thawk ila, tichuan Pathian hnathawhpuitute kan lo ni mai dawn a ni. 

Pathian hian chhungkua a ngaih pawimawhzia chu Bible-ah pawh hmuh tur tam tak a awm. Chuvangin i in chhung tiengtu atan Lalpan a tir/hung che a nih chuan i chhungkaw kal pelin i mission ramri zauh tum duh suh. I bial loh tur pui hi i lo bialin i enkawl tha leh thei si lo ang a, a tawpah i mission hna chu tihtawpin a awm palh thei a ni. Kan in chhung tiengtu atan Lalpan min tir a nih chuan hei tluka kan mission hna hi a awm chuang lo. Chutianga Pathianin min hunna hmun tur kan hriatchian hnuah chuan kan mission hna hi kan thawk tha tawk em tih lam hi a pawimawh hle a ni. 

Mi thenkhat chu mahni in chhungah pawh thawk tha duh thak lo hi an awm ve fo thin a, chutianga mahni in chhung pawha thawk tha duh lote chu an rawngbawlna a hlawhtling mawh reng a ni. Lalpan min hunna hmun berah kan thawh that duh miau si loh chuan rawngbawlna hi a hlawhtling mawh duh hle a nia. Kohhranho zingah pawh a then chu tirhkoh atana koh te, a then chu zirtirtu atana koh te,....adt..kan ni deuh hlawm fur a. A Bible tawngkam takin a hnuaiah hian i han tarlang law law teh ang:

Krista taksa siam tha turin thenkhatte chu tirhkoh atan te, thenkhatte chu zawlnei atan te, thenkhatte chu Chanchin Tha hriltu atan te, thenkhatte chu kohhran chawmtu leh zirtirtu atan te a pe a. (Ephesi 4:13). Chuvangin Lalpan min kohna hmun a nih chuan hnial let kher lovin a thu awiha rinawm taka thawh mai kha rawngbawlnaah pawh Pathian malsawm dawnna a ni. Pathian hunna hmun ni lova thawh chu a langin thawkrim viau angin lang ve bawk thin mah ila, thlarau lamah kan hlawkpui lem lo khawp mai. Chuvangin Pathian min hunna hmun hriat a, min hunna hmuna theihtawp chhuaha a rawngbawl hi ringtute tan chuan Lalpa Pathian tana kan tih theih sang ber a ni thung. Lalpa tirh lohva mahni thahnem ngaih ngaiha thawh te hi thil pawi deuh mai a nia! 

Pathian kan in chhung khur tiengtu atan min tir a nih chuan mahni in chhung khurah theihtawp chhuaha thawh mai kha mahni nunah pawh Pathian malsawm dawnna a ni a. Lalpa Pathianin kohhranho enkawla tithanglian tura zirtir hna min thawhtir a nih chuan rinawm leh taima taka thawh mai kha kan rawngbawlna a ni bawk a ni. Lalpa Pathianin tawngtaia rawngbawl tura min koh a nih chuan rinawm taka tawngtai mai kha kan tih tur a ni bawk a, chutiang zelin thilpek hmanga rawngbawl tura koh kan nih chuan thahnemngai taka theihtawp chhuah leh mai kha kan tih tur a ni mai dawn lawm ni? 

Kan mission hna hi kan thawk tha tawkin kan hria em? Vawiina Lalpa Pathianin min pek kan mission hna hi kan thawk tha tawk lo a nih chuan Pa Pathian hmaa rorelna a lo thlen hunah engtin nge kan chhan tak ang le? Chhungkaw nu leh pate tan kan fate hi kan mission rawngbawlna atan Lalpa Pathianin min pe a nih chuan lawm taka thawha a enkawl puitlin hna pawh thawh mai tur a ni zawk dawn lawm ni? I mission hnaa rinawm taka i thawh aliama tha leh pawimawh hi Lalpa Pathian hmaah chuan thil dang a awm chuang lo. Lalpa Pathianin a hunna hmun chea rinawm tak leh thahnemngai taka i thawh khan Lalpa Pathian tan i tih theih sang ber i ti zawk a ni. I mission hna i thawh that leh that loh chu rorelna niah Lalpan a la zawt ngei ang che.