Zo Vapual

Lalpa Pathian nen bul tan thin rawh

C. Lalmuankima 

Slough, United Kingdom 

Thuhmahruai

Pathian khawngaihna zarah kumthar kan lo chuangkai leh ta a, kumhluia thil thlengte kha mumang angin an ral riai riai mek zel a, khawvelin hunkhirh tak a tawn chhoh mek karah kumthar hun hlimawm tak kan hmang thleng leh thei hi a lawmawm tak zet a ni. Thenkhat tan chuan kumhlui liam ta kha mumang atan pawha kan man duh loh thil rapthlak tak a ni a tih theih ngei ang le. Engpawhnisela, Pathian remruatnaah kan thuneihna a tel lo em a, a remruatnaa innghah thiam zel erawh a him berin rilru a hahdam ber zel a, mi tam takin tunlai hrileng lakah nunna tam tak an chan mek laia kumthar kan hmuak thleng thei ringawt pawh hi Pathian hnena lawmthu sawi lo thei lo kan nih tichiangtu a ni chiang mai le. 'Kum a lo thar chuan chumi khami chu ka/kan ti ang a, chutah khatah ka/kan kal ang....' tia mimal leh chhungkua leh pawlho leh thianzahova ruahmanna siam kan awm leh teuhvin a rinawm. Ni e, ruahmanna chu mihring lam chan a ni a, lei chhanna erawh Pathian atang a nih zawk avangin kan ruahmannate chu a taka thlentir theitu Pathian hnena kan kawltir hmasak fo hi a him ber thin a ni.

Photo: Google Image 

Tun kumtharah hian ruahmanna tam tak kan siam leh ngeiin a rinawm. Chutianga ruahmanna kan siamnaah chuan ringtute tan chuan Pathian nena bul tan hmasak hi kan tih tur pawimawh lian tak a ni ngei mai le. Pathian ring chunga kan tih phawt chuan kan bul tanna hi sawi tham lohvin tê hle mah sela, kan la hlawhtling zel dawn a ni. Pathian rawn chung zela ke pentute Lalpan a hlawhchhamtir ngai lo va, an mualpho ngai hek lo. 

A lo mak khawp mai...! Pathian ringtute tan chuan kan thiltih engkim mai hi Lalpan min lo hriatpui/hriatsak vek hi a duh a ni. 'Heti em em chu a ni thei dawn em ni...' tia thil tê ber anga kan ngaih thleng pawh hian min lo hriatpui a duh a, thil tê ber anga kan ngaihte pawh hi a hmel mawi min hmuhtirtu hmanraw pawimawh tak atan a hmang thei tlat nia! 

Mosia tiang pawh kha Pathianin a beram venna atan chauh a hmang lo va, a thilmak chi hrang hrang tih nan a hmang tel bawk a (Ex 4:1-4; 9:23; 17:5 ), Lalpan a hman dawn chuan khawvel ngaiha thil hmuhsitawmte hi a hmang fo reng a ni. Josua hova Jeriko kulh an beih dawn tum pawh khan berampa ki, miten engah maha an ngaih loh a hmang a, a thiltihtheihna ropui tak a lanchhuahtir a nih kha! (Jos 6:4)

Pathianin a hman dawn chuan khawvel ngaiha thil hmuhsitawm te thleng hian a hmang thei tlat a ni. 'Pathianin khawvel thil âte chu a thlang zawk a, mi fingte chu a tihmualpho theihna turin; tin, Pathianin khawvel thil chak lote chu a thlang a, thil chakte chu a tihmualpho theihna turin....' tiin Korinth lehkhathawnah pawh a ropuina puanchhuahna tura thil âte pawh a thlan thu kan hmu a ni (1 Korinth 1:27). 

Chuti chu Pathianin thil â zawk te a thlan tho tho chuan fin pawh a ngai em ni, thil chaklo zawk te a thlan si chuan chak a ngai em ni...tiin kan ngaihtuah palh ang e. A ni chuang hauh lo, thinlung chapo tlat te, amah dodal tlat thin finna te, Pathian aia chak zawk leh thiltithei zawka inhriatna te hi a dodal tlat a, chung mite chu a tihmualpho theihna atan a ni khawvel ngaiha thil hmuhsitawm te a thlana a hman zawk thin ni! Nang leh kei teh lul Pathianin a ropui puanchhuahna atana min hmang ve duh a nih phawt chuan engvangin nge kan zawh let kher ang? Pathian hmantlak ni khawp erawh chuan Lalpaah inserh thianghlim fo erawh kan tih tur a ni ngei ang le. 

Chu tak chu a ni a hmasa lama kan sawi tak 'Pathian rawn chunga kan tih phawt chuan kan bul tanna hi sawi thamlohvin te hle mah sela, kan la hlawhtling zel dawn a ni.' tih kha. Lalpan hmanrua a nei tlachhamlo tih hi kan hriat reng a tha. Thil ho tak hmang pawhin a thiltihtheihna leh a ropuina nasa takin a tilang thei a ni. Pathian hmanraw ngahzia hi Amah bel lo thei lova inhriate nunah a fiah fo thin. 

Lalpa nena bul tan hi a lo hlawk ber a, kan thiltih a tê emaw leh a lian emaw lam ai mahin Lalpa nena bul tan kan nih avangin rilru a hlim a, thla a muang tel bawk. Lalpa nena tih chu kan duh dan leh tum dan angin thil lo thleng ta lo mah sela a aia tha zawkin min thawhsak leh zawk dawn a ni tih hriatna hian min tihlim tel tlat a ni. Chuvangin thil engkim i tihnaah khan Pathian nen bul han tan thin mah teh, i inchhir hauh lo vang. Inchhir a hnekin i zawngchhang ang a, i thiltihna apiangah Pathian rawn lovin i awm thei tawh lo vang. 

Lalpa nena bul tan zel hi ringtuten kan chakna thahrui lakna pawimawh tak a ni. Chuvangin eng thil pawh ti dawn ila, Pathian rawn chung zela Pathian nena bul tan fo zel hi a lo hlawk ber a, nun a hlim ber bawk. Pathian tel lova bul tanna chuan a tawpah lungngaihna leh tahna a hring chhuak chawk thin. Thil lian leh ropui tak takin bul kan tan thei lo a ni mai thei, mahse kan neih chhun chhunah hian Lalpa Pathian rawn chung zela Pathian nena bul tan nachang hre thin ila, nun a hlawkin a hlim thin a ni. Miin a hringnunah hlawk taka a nun a hman dawn chuan a thiltihna kawng engkimah Lalpa Pathian nen bul a tan thin a ni. 

I thenawm khawvengte chuan Pathian hming lam nachang hre lovin an sumdawnnaah bul an lo tan pawh a ni mai thei, mahse khatiang kha awt duh suh. An tawpna hmun tur chu lungngaihna leh mittui bak a ni ngai lo a nia. Chuvangin nang chuan i sumdawnnaah a ni emaw i zirnaah a ni emaw i hnathawhna kawng engkimah Lalpa Pathian rawn chung zelin bul tan thin la, tichuan i hringnun chu Lalpa nen hlawk takin i hmang tawh dawn a ni. Lalpa rawn chung zela bul tanna hian nang leh i chhungteah hlimna leh lawmna a thlen thin ang che. 

Thutlangkawmna

Pathian nena bul tan fotute hi an nun a awhawm thin a, an bula khawsak a nuam thin. Pathian nena bul tan fo nachang hre lo khawpin i hringnun hruai kawiin a awm palh hlauh ang e. Pathianin kumthar min hruai thlen chhan hi eng dang vang a ni lo, a khawngaihna avang liau liau a ni a, chu a khawngaihna changtu chu i nih angin nang leh i chhungte chuan he kum thara i thiltihna kawng engkimah Lalpa Pathian nena bul tan nachang hre thin ang che. Lalpa Pathian nena bul i tan fo phawt chuan nang leh i chenpuite chu midangte tan malsawmna luankawrah Lalpan a hmang chhunzawm zel dawn che a ni. I thiltihna kawng engkimah Lalpa Pathian nen bul tan fo thin ang che.