Zo Vapual

I thlarau nun hrisel nan engnge i tih ve thin le? 
C. Lalmuankima 
Slough, United Kingdom 

Ni 14/12/2017 zan dar 7:30 vela ka taksa insawizawi (ka exercise la zo), stretching ka tih mek laiin ka rilruah he thu hian min compare a, testimony han tih em em atan chuan a ho deuh mai thei bawk a, a hming vuah tur ka hriat mai loh avangin testimony category chhungah ka khung tel ta hram a, a lo inhmeh vak lo a nih pawhin a ngaihthlak dan tawk min lo thiamsak a ni mai ang chu.

Thu dang lam teh chiam ni lovin.... Ka exercise la zo ka taksa ka han inpawt mar/fan (stretch) lai takin ka rilruah he thu hi a lo lang hlawl mai a, min rawn chhuahchhal ti tih hian min rawn khaikhintir mah zawk a tih theih awm e. ''Nang chuan i taksa hriselna ngai pawimawhin leh i taksa mawi loh hlauvin darkar hnih/thum i hun i pe a, i thlarau lam hriselna erawh i ngaih thah lawi si a, i thlarau lam hriselna atan hian darkar khat pawh i pe tha peih lo va, thlarau lama hrisel turin eng thil nge i tih thin le, i taksa hriselna i ngaih pawimawh rual rualin i thlarau nun hriselna tur pawh ngai pawimawh tur i ni asin.....?" tih thu hian ka ngaihtuahna a thum rawn tlut tlut a, changing room-ah kalin ka inthlak a, ka inbual zawh pawhin he thu bawk '....i thlarau hriselna atan engnge i tih thin le?' tih thu bawk hian min la um zui ta zel a, in ka thlen hnuah ka ngaihtuah nawn lehin ka zak chem chem a ni.

Photo : Google Image

Ka taksa hriselna atan darkar hnih/thum hun ka pek theih laiin ka thlarau hriselna tur chuan darkar khat pawh hun ka lo pe thin lo va, darkar khat pawh ka lo tawngtai thin lo va, chuti chung chuan thlarau lam hriselna leh malsawmna tam tak dawng turin Pathian hnenah ka beisei leh lawi si a, kei hi mi zawmthaw tak ka lo nih hi.....! tiin keimah leh keimah chu ka inchhang bawrh bawrh a, Lalpa tana hun ka pek tlemzia ka inhre chhuak roh roh mai a ni. 

Pathian tana hun kan pek tam poh leh a lak atanga kan malsawm dawn tur pawh khi a letin a lo tam dawn a ni tih hi min hmuhchhuahtir a, Lalpa tana hun pe tlem chuan malsawmna a dawng tlem dawn tihna a ni. Thlarau lam malsawmna pawh hi a ni tho tho. Lalpa tana hun kan pek tam loh chuan kan thlarau nun pawhin malsawmna a dawng tlem bawk tihna a ni. 

Kan taksa hriselna kan ngaih pawimawh tlukin kan thlarau lam hriselna pawh hi ngai pawimawh thin ila chuan thlarau lamah malsawmna tam tak kan dawn belh zel ang tih hi lei ben thelh a hlauhawm loh tluka thu chiang sa a ni. Chu tak chu kan tih thin lohva kan thlarau nun hriselna kan ngaih pawimawh thin loh avangin 'Ka thlarau nun a chau' 'Ka thlarau nun a ro' kan ti leh thin a ni. Nun ram chau tih rehna tha tak tura ka hmuh chhuah tak chu 'Pathian nena inpawl tam' 'Lalpa nena hun hman tam' 'Lalpa biak tam' hi a lo ni dawn reng mai tih hi a ni. Chu chu tawngtaina hmang te, Bible chhiar te, inkhawm leh thilpek hmang tein hmalakna kalpui thin ila chuan 'nun ram chau' kan tihna lakah hian kan fihlim thei tawh dawn a lo ni reng mai. 

Midangte tan malsawmna ni turin min fuih lai hian engvangin nge midangte malsawmna kan nih theih loh thin tih hi mahni leh mahniah zawhna han siam ta ila. A chhan bulpui ber nia lang chu midangte tan malsawmna ni turin Pathian nen hian hun kan hmang dun khat hlawm em atin a ni. Pathian nena hun hmang khat na na na chuan a hnen atanga malsawmna dawn pawh a khat pharh dawn tihna a ni. Chutianga Pathian hnen atanga malsawmna kan dawn khat viau chuan midangte tan malsawmna kan lo ni thei dawn hauh lo tihna a ni bawk ang. Chuvangin kan mihringpuite tan malsawmna ni thei tur hian Lalpa Pathian nen hun hmang tam thin ila, tichuan Lalpa Pathian nena hun kan hman tam phawt chuan a hnen atangin taksa leh rilru leh thlarauvah malsawmna tam tak kan dawng ang a, chumi atang chuan kan mihringpuite tan pawh malsawmna luankawrah kan lo tang thei dawn a lo ni reng mai. 

Thu hmasa lama testimony-a kan ngaihthlak ang khan kan taksa hriselna kan ngaih pawimawh tluk hian kan rilru leh kan thlarau hriselna hi ngai pawimawh tel bawk thin ila, tichuan keimahni ngei hi kan mihringpuite tan malsawmna luankawrah siamin kan lo awm zel dawn a ni. Kan taksa hriselna kan ngai pawimawh angin kan rilru leh kan thlarau hriselna hi i ngai pawimawh bawk ang u. 

Kan nunah thlarau nun hrisel tak nei tur hian thil tam tak tih tur kan nei chiang mai a, chu chu thuawihna hmanga kan zawm/tih loh chuan Pathian duhzawng hi hlenchhuah a lo awl lo khawp mai. Pathian hman tlak tak ni tur chuan keimahni lama kan tih ve tur thil tam tak a awm a, entirnan tawngtaia Pathian nena indawr tawn fo te, Bible chhiara Pathian thua inchhunkhah fo te, midangte tana malsawmna ni zel tura thilpek hmanga mahni lam insawhkeh zel nun te, midangte tana tawngtaisak fo nun te...adt, sawi tur tam tak a awm thei ngei ang. A pawimawh ber mai chu Pathian hman tlak ni fo tura mahni lama inchher hriam ve fo hi a ngai a ni. Heng kan sawi tak te hi mihring thahnemngaihna hmangin kan tih theih tawk fang a awm ngei ang, mahse Pathianah zel innghata Pathian rawn chung zela kan tih hi a thain a him ber a, nun a hlim ber bawk. 

Gym kal thang chuan gym equipments/tools chi hrang hrang a awm tih kan hre theuh awm e. Chung equipments/tools chi hrang hrang chu hmang thiam tur chuan kan khawih ngun a ngai a ni. Equipments/tools pakhat leh pakhat hman dan pawh a in ang lo thluah bawk. Heng gym equipments/tools ka han zeh telna chhan chu kan taksa pianhmang chi hrang hrang tihresela tinalh tur hian hmanrua pakhat chauh hman hi a tha ber lo tih hi a ni. Entirnan equipment pakhat chauh hmang ta ila, taksa peng nena inphut mawi lo zetin a lian lawr tut thei. Chuvangin taksa inphut mawi taka siam turin qym equipments/tools chi hrang hrang kan hmang ang hian kan thlarau nunah pawh inphut mawi taka lang thei tur chuan hmanrua chi hrang hrang kan hman ve a ngai a ni. Thlarau nun in fit tak nei tur hian tawngtai chauh hi a tawk lo va, chutiang bawkin Bible chhiar chauh hi a tawk hek lo. Tawngtai leh Bible chhiar piah lamah hian midangte tanpuia midangte tawngtaisakna te leh midangte tana insawhkeh ral raih khawpa nun a tul chang pawh a awm ang. Chu tak mai chu kan hman thiam phawt chuan thlarau lam nunah fit takin kan awm thei dawn a lo ni reng mai. 

I nunah i thlarau nun a hrisel theih nan eng exercise te nge i tih ve thin le.....???