Zo Vapual

Zokhaw lam Masi kha ka ngai thin

C. Lalmuankima 

Slough, United Kingdom 

Zofate hi uihum pawh zat lo mah ila Pathian khawngaihna zarah khawmual pui tinah kan lo inzar pharh ve ta reng mai. Hnam tlem te e ti lovin kan dai chin erawh a zau ve fu ta mai a, kan dai chinah kan va mikhualna rama hnamte tih dan leh nunphung pawh kar lovah kan lo chhawm tel ve ta zel mai a, a ram chhunga kan awm duh miau si chuan a ram chhung tih dan kan ti lo thei ta lo a ni. 

Photo: Gramho.com 

Kei ngei pawh Pathian khawngaihna zarah Kumpinu leilung ka rahna kum sawm nufa a lo tling ve ta der mai a, kum sawm chhung hian nunphung a lo danglam hman nasa hle a tih theih a ni. Chutianga nunphung leh khawsak dan danglam chho mek zelah chuan Zokhaw lama kan Masi hman dan erawh chuan lung min len lo thei lo va, thlang sappui mingoten an thiam thil rimawi chi hrang hranga an siam leh ri thei chi tin reng hmanga mawi taka an tum theih zingah ka chhungril han khawng pha zu han awm hauh lo va! Kei Zopa lutuk tan hian Sappui mingo valte remhriatna leh themthiamna hian tangkaina a nei ve ta lo te pawh a ni mahna. Kei chuan Urlawk zan atanga Khuangpui leh Khuangte chumchilha kan han 'Tlung-tlut, tlung-tlut' khan ka chhungril min la khawng ber chu a nih hi maw! Thlang Sappui mingo valten an rimawi chhuak thar ber ber man to tak tak leh changkang ber ber hmanga Krismas hla mawi eltianga an rem hian ka lung min len ve tlat lo, ka bengah chuan a mawi satliah a ni ringawt mai. Kei chuan Zopa takin Zokhaw lama Masi Lengkhawm zai hla urhsun tak hmanga 'Lal pian hun lawmawm tak kan thleng leh ta...' tia Ralngama hla te, 'Hlimna ni ropui chu a eng...' tia R.L.Kamlala hla te, 'Eden parmawi chul hnu tivul leh turin...' tia Rev. Taisena hla te,...adt. khan ka chhungril a khawng zawk mah a, ka lunglen min la hnem zel chu a nih hi maw! 

Kan thian pakhatin fiamthu ti tak deuhva, 'Sapramah chuan a 'U Ama' hleih theih loh, Zokhaw lama Masi kan hman thin dan kha ka va ngai thin tak em...' a tih hi ka hrechhuak roh roh thin. A ni lah tak a, bar thla hnuhnung ber chung Pathian khawngaihna leh hualhimna zarah han chuankai leh meuh chuan zing khaw thiang leh daifim leh romei zam chiai mai han hmuh te hian rilruin Bethlehem tlang hi kan hriat loh hlanin min thlirtir nghal ringawt mai a, vanlal fapa pianni champha lawm tur hian thinlung hi a inpeih zar nghal bawk a, mitthlaah hun kal tawha Zokhaw lama Krismas kan hman thin dan te pawh a rawn lang leh roh roh ta mai.

Hnam pui karah a kum sawm tel meuh tal pawl ve hrup tawh mah ila, Zopa azawnga Zopa tak hi ka lo ni ve a ni ang chu, hnam puiho thiamthil leh remhriatna rimawi chi hrang hrangte hian engtik lai mahin min nei ngai lo va, Zokhaw lama Khuangpui leh Khuangte chumchilha kan Masi hman dan te khan min la hneh ber zel tho chu a ni e. Kha Zokhaw lama Krismas kan hman dan tluka min hneh thei kha he Kumpinu rama an hman danah hi chuan ka la hmu meuh lo chu a ni. An dawr leh kawng chei ilo velah chuan a mawi na rawh e, mahse heng an thil chei mawi chi hrang hrangte hian engtik lai mahin ka lung an dum ngai lo va, a tih-Krismas riauna pawh ka hre hek lo. Kei chuan Zokhaw lama par hun khel lova rawn parchhuak leh thin Tlangsam par mawi tak khan a ti-Masi hliah hliah hle zawk hian ka hre thin. Anniho chuan chocolate leh eng eng emaw ni ei tur neuh neuh chi hrang hrang tui tak taka siam an inpe thin a, chutiang ai chuan Zokhaw lama Zo-chhang ban ngei khan hrawk a fahin a ti-Masi hliah hliahin ka hria. 

Zokhaw lama Urlawk zan kan hman dan ringawt pawh kha sawi thiam takin sawi ta sela chuan zankhuaa ngaihthlak pawh ka nap ngei ang le. Urlawk zan atanga Khuangpui leh khuangtea kan han tlir dap dap mai thin khan Krismas hi a takin min hmantir ni ber te pawhin ka hre thin. He lamah chuan Urlawk zan hi a reh hian a reh tlawk tlawk a ni ber e. Anniho chuan Urlawk zan hi Chhungkaw chawhlui kilhona leh inhmuh khawmna hun tha atan an hmang ve thung a, an thlirna zawn atang chuan a thain a dik ve thlap mai. Amaherawhchu kei Zopa tak hi chuan an tiuiawm mah mah hian ka hre thin a ni. Urlawk zan hi chu kohhranhote nena khawtlang huap pawha han urlawk tluka nuam leh manhla kha a awm thei hian ka la hre chuang hauh lo nia. Zokhaw lam khaw thenkhatah phei chuan Tlangarh (Loud speaker) kan vuah/tar a, Krismas Lengkhawm (Zaikhawm) Zai urhsun taka kan han zai dap dap mai thin kha chu piang velote leh mual liam tate kan hlep hliah hliah te hian ka hre thin a ni. Zai a tlak that zan phei chuan tawpsan mai te kha a uiawm thin si a, zan khuaa nawn awn awn te kha a chakawm thin. Zokhaw lama khawtlang pum huapa kan Urlawk thin kha a hlutna pakhat a ni kan ti lo thei lo vang. 

Lung a len lutuk chang hi chuan lunglen tihreh nan a lungleng zawng lo deuhva han inawih dan te a awm mial lo maw tiin thlang Sappui mingote remhriatna chu han zawm ve ka han tum thin tak na a, Zokhaw lama kan tih dan tlukin chhungril a zu dek pha lo hle a ni ber mai. Engpawhnisela Zokhaw lama kan tih dan kha ngai viau thin mah ila, a rama kan chen miau si chuan a ram mite tih dana hun hman a tul chang a lo awm lo thei lo va, Zokhaw lama kan hun hman dan erawh ngaih a bang dawn lo a nih hi. Krismas tinuamtu leh tihlutu pakhat nia ka hriat ve chu kan Lengkhawm/Zaikhawm Zai kha a ni kan ti lo thei lo vang. Krismas Lengkhawm/Zaikhawm Zai hriat tawh lohna hmuna awm chiah hian Krismas Lengkhawm/Zaikhawm Zai hlutzia leh man tamzia kan hmu chhuak dawn chauh ni te hian ka hre thin. Aw...Zokhaw lama Masi kan hman dan thin te kha Vanlal fapa piancham phaphak lawmni hi chuan inchah thlen dan te hi awm thei thin sela ka va ti tak em...!