Zo Vapual

Mite chhiar tlak chanchin hnutchhiah rawh

C. Lalmuankima 

Slough, United Kingdom 

Mitin mai hian chanchin a chhia a tha sawi leh ziah tur kan nei theuh va, mi engmah lo leh tê ber anga kan ngaih atanga mi ropui leh thiltithei ber thlengin chanchin sawi leh ziah tur kan nei theuh a ni. Chu kan chanchin chu midangin min sawisakin min ziahsak dawn lo va, keimahni ngeiin kan damlaia kan thil tih hmangin kan sawiin kan ziak mek zel zawk thin. 

I damlaia i chanchin chhiar tlak awm lo khawpa i tu leh fate i hnutchhiah a nih chuan i tu leh fate hrilh i tihai hle dawn tihna a ni. Chuvangin kan damlaia kan nitin nun hi kan chanchin kan sawina/ziahna pawimawh tak a nih avangin kan hnua lo kal lehzel turte chhiar tlak khawpin i ziakin i hnutchhiah thin ang u. I hnua lo kal zel tur i tu leh faten fiah taka an rawn chhiar theiha an rawn chhui nalh theih turin i chanchin hnutchhiah tum ang che.

Photo: Geneva College

I hringnun a ral huna i chanchin chhiar hleih theih loh khawpa hnawk leh pawra i hnutchhiah a nih vaih chuan a chhe zawnga tehkhinnaah i tang kumkhua tawh mai ang. Chuvangin tuna i damlai ngei khan miten fiah taka an chhiar theih turin i chanchin hnutchhiah tum ang che. Mi fingte leh mi ropuite chanchin angin i chanchin chuan mite thinlungah a phek pawimawh nalai a chang ve lo a ni mai thei, chutiang zelin mi hausa leh mi thiltitheite angin mite sawi i hlawh lo a ni mai thei, mahse lungngai suh ang che. I tu leh faten fiah leh fel fai taka an chhiar theih tura i chanchin i hnutchhiah phawt chuan kha tluka pawimawh leh tha kha a awm chuang lo a ni.

Kan hnua kan tu leh fate lo kal zel turten an chhiar ngamawm loh khawp leh an chhiar tlak loh khawpa kan chanchin kan hnutchhiah a nih vaih chuan a pawi ngawt ang le. Mitin mai hi mahni chanchin ziah/sawi tur nei lo khawpa pachhia kan awm lo va, chanchin a chhia a tha sawi tur nei vek kan nih avangin kan hnua lo kal turte hi engnge kan hnutchhiah dawn tih hi keimahni leh keimahni kan inzawhna lo ni fo rawh se.

I hringnun kawng i lo zawh tawp huna i tu leh faten i chanchin fiah fel fai taka an rawn chhiar theih nan i damlai ngei khan mite tan thil tha tiin malsawmna nih tum thin ang che. Bible pawhin, "Sum tam tak aiin hmingthatna hi thlan zawk tur a ni a, tangka leh rangkachak aiin duhsakna a ngainatawm....(Thufingte 22:1)" tia a lo sawi angin i tu leh fate pawhin an tuchhuan thlenga an chhawm nun zel atana i duh tur 'Hmingthatna' ngei chu hnutchhiah tum thin ang che.

Sum leh pai, in leh lo tha pui pui hi chu ropui viau angin lang thin mah sela, chu aia ropui zawk leh pawimawh zawk chu hmingthatna hi a ni. Sum leh pai, in leh lo tha pui pui hi chu mitkhap kar lekin a boral mai thei a, tuchhuan tam tak thlengin kan inhlan chhawng thei lo mai thei, mahse hmingthatna erawh chu tuchhuan tam tak thlengin kan inhlan chhawng thei thung a, kan damlai ngeia kan chanchin hmang hian kan tu leh fate lo awm lehzel turte thinlungah pawh kan chanchin hi kan la ziak chhunzawm zel thei a ni.

Mihring dam chen hi a in ang lo va, kan damchhung hun phei chu a rei lo hle. Kan dam rei leh dam rei loh pawh a thupui ber lo. A pawimawh ber zawk chu kan damchhung hun tawi teah hian kan hnua lo kal lehzel turte tan eng emaw ni tal thil tha hnutchhiah kan neih leh neih lohvah hian mihring damchhan hi kan tihlawhtlingin kan tihlawhtling lo zawk mai a ni. I damchhung hun rei lotea i tu leh fate tan thil tha hnutchhiah nachang i hre miah lo a nih chuan siamtuin mihringa a siamchhan che hi i tihlawhtling lo a ni ang. Siamtu min siamchhan tihhlawhtlin hi a thil siamate mawhphurhna a ni. 

Kan hringnun a lo tawp hunah pawh thangthar lo la awm zel turten kan hnu an rawn chhui zel theih nan kan chanchin hi kan damlai ngei hian a tha thei ang bera ziah tum tur a ni. Chuti ni lova keimahni ngei pawhin kan damlai ngei pawha kan chhiar duh loh tur leh chhiar tlaka kan ngaih loh tur khawpa hnuhma chhe tak leh pawr tak kan siam a nih chuan kan hnua lo awm lehzel turte tan hnuhma chhui theih lohvin kan dah tihna a ni ang. Thu hmasa lama kan sawi ang khan mihring dam rei leh dam rei loh hi a thupui ber lo va, rei tak dam ve si tu leh fate pawhin an chhui theih loh tur leh chhuitlaka an ngaih loh hnuhma chhia kan hnutchhiah a nih chuan he leiah hian kan lo chhuak thlawn mai tihna a ni ang. Chuvangin rei tak dam lo mah ila, kan hnua lo kal zel turte tana hnuhma fel tak leh tha tak kan hnutchhiah phawt chuan he leiah hian kan chhuak thlawn lo va, hlawk takin hringnun kan chhuahsan zawk tihna a ni ang.