Ka mi ngaihsan zawng (Bible thlirna atangin....)
 |
| Photo : Google Image |
C.Lalmuankima
Newcastle, United Kingdom
Khawvelah hian mi ropui tak tak te, mi nei nung leh hausa, mi thil tithei tak tak te, mi chak fing tak tak ram leh hnam tana mi hratkhawkheng te, mi ropui tlawmngai leh chhuanawm, entawntlak tak tak te an awm a. Chung mi te chu an ngaihsanawmin an chhuanawm tak meuh meuh va, amaherawhchu mi mal tin ten kan ngaihsan zawng te chu a in ang vek kher lo mai thei a ni. Kristian kan nih angin Kristian thlirna (Biblical view atangin thlir dawn ila....) atanga thlirin kan nitin nuna kan entawn fo tura ka duh leh ka mi ngaihsan zawng te chu a hnuaiah hian ka han tarlang ang e. Heng mite nun hi a awhawm mai ni lovin an ngaihsanawmin an chhuanawm a, an entawntlak tel bawk. An nun atang hian ringtuten zir tur tam tak kan nei a ni.
Abrahama
Abrahama angin Pathian i ring ngam ang u (Genesis 12:1-7) Abrahaman Pathian kohna a chan khan, "LALPA, chumi chu ka va ti phawt ang e, khami kha ka va ti phawt ang e, ka unaute ka va hrilhin thlahna ka va siam phawt ang e," a ti reng reng lo. Amah koh tu Pathianah a chiang a, a kalna tur lam pawh hre hawt lovin a kohtu Pathian chu a ring a, a zui nghal tawp a ni. A rin Pathian ngei chuan a tithlawn dawn lo tih a hrechiang a, chu a rin Pathian ngei chuan ama felna ah ruatsakin a lo awm ta a ni. Keini hi engnge kan an ve le...? Min kohtu Pathian khi kan hrechiang em? Hrechiang hlei lo hian miten an zui/biak avangin kan lo zui/be ve tawp a ni ang e. Sakhaw rawng bawl hi awl deuh mai a nia. Sakhaw rawng hi kan bawl ang a, min kohtu Pathian rawng bawl lo hian kan awm palh ang tih a hlauhawm hle a ni. Pathian rawng bawl tel lo hian sakhaw rawng hi thui tak a bawl theih a ni.
Min kohtu hrechiang hlei lovin kan lo zui ve ringawt te a nih chuan keimahni hi a buai tur chu kan ni a, in enfiah hmasak kan ngai tihna a ni. 'Rinna chu thil beiseite awm ngeia hriatna, thil hmuh loh te hriatfiahna' tiin Hebrai 11 : 1 ah kan hmu a. Miin a rin Pathian ber mai a hriatchian loh chuan a thinlung zawng zawng leh a rilru zawng zawng leh a thlarau zawng zawngin engtinnge a rin theih teh lul ang? Pathian Rinawmna in kan nun hi min thlen chilh hmasak a ngai a, chu rinawmna nun chuan rinna nung (Isua nun) min pe a, chu rinna nung min petu Lalpa atang chuan, thil beiseite awm ngeia hriatna leh thil hmuh loh te hriatfiahna kan lo chang ta thin a ni.
 |
| Photo : Google Image |
Rinnaa Pa ber Abrahama chanchinah khan han let leh ila. Pathian thuin, "Abrahama chuan Pathian a ring a, chu rinna chu a felnaa ruat a ni." tiin min hrilh a. Rinna chungchang sawi dawn hian Abrahama hming hi lam hmasak ber a ni thin. 'Rinnaa Pa' tih a ni bawk. Moria ram tlanga a fapa Isaaka hlan tura Pathianin a tih khan, i he lovin a kal a; a fapa Isaaka chu hruaiin Moria ram tlangah chuan a fapa neih chhun chu halral thilhlana hlan turin a kal a nih kha. Mihring lam taka ngaihtuah chuan mawl/a nih a hlawh chiang a lawm. (Khatih hunlaia Abrahama rilru hrehawm tur zia mai kha ka ngaihtuah a lawm e, a beram leh bawngpa thau thau hlan tura tih chu ni se la, ui nei hauh lovin phal takin a pe nghal vat ngei ang.... Mahse a fapa neih chhun ngawih ngawih, a nupui Sari nena an tar lam fa, thu tiam fa ngei mai hlan tura tih a ni tlat mai le, Abrahama khan hrehawm chu a ti ve ngawt ang....) A neih chhun ngawih ngawih mai a nunna tluka a hlut a fapa Isaaka ngei mai hlan tura a han ti chu, Pathian pawh hi ti awm ang lo i ti ve lo maw....? A ran rual zinga mi a thau thau leh a tha tha leh a huanthlai zinga mi a rah tha tha hlan turin ti se la chuan ngaihdan a la siam theih ang a, chuti ni lova a fapa neih chhun hliah hliah, a thih hnua a ro zawng zawng luahtu tur leh a nupui hmangaih Sari nena an rila rah neih chhun ngei mai hlan tura a han ti ringawt mai chu mihring lam tak chuan a har hle ang a, ngaihtuah mai pawh hian kei chuan ka la tih ngam loh tur thil a ni.
Mahse Abrahama chuan a rin Pathian chu a hrechiang tlat a, awmlo ata dinchhuaktu leh petu Pathian ngei chuan he Isaaka pawh hi lak sak leh mah sela , a aia tha pawh a pe leh thei a ni tih hi a hrechiang tlat a; Pathianin ti tura a tih chu phunnawina tel hauh lovin a ti ta a ni. Chumiah chuan Abrahaman Pathian a rinzia a tilang a, a rin Pathian chuan a felnaah a ruatsak ta a; Rinnaa Pa tia koh a lo ni ta a ni.
Kan rin Pathian hriatchiannaah hian a ni huaisen taka Rinnaa ke pen ngamna a lo awm ni. Kan rin Pathian rinawmzia kan hmuh thiam hma leh leh kan hriatchian hma chuan kan zam thin a, rinnaa ke pen chu sawi loh, a awmsa hmanga/ringa ke kan pen pawhin kan thla a phan ru tlat thin. Nang leh keia thinlung mizia hi chu a zam thin a, chu nun zam reng thin thinlung kan nei a ni tih a hriat avangin chatuana zam ve tawh ngai lo tur a fapa Isua Krista nun chu min lo pe ta zawk a, chu nun ngei chu kan chatuan nun atan min lo thlansak ta zawk a ni. Lalpa chu fakin awm rawh se. Evangelist pakhat thu sawi ka hriat reng thin a awm a, "Rinnaa ke kan pen tak tak dawn hian kan chenpui leh unaute hi min tizamtu an ni fo thin, kan pianpui te hlei hlei hi min daltute an ni fo thin." a tih hi ka hre reng thin. Rinna Pa tia koh Abrahama pawh khan he nun hi a lo paltlang tawh ngei a ni. Rinnaa ke pen dawn tak tak chuan kan chenpui, kan pianpui thisen zawmpui leh kan nupui fanaute, thenawm khaw veng te mithmuhah mawl nih hlawh a ngai thin. A awmsa ringa ke pen chu a nuam viau vang a, a awmsa rin tur awm miah lohna ram atanga ke pen erawh a sak deuh talh thin.
Rinna kan tih reng reng chu kan va rinate rinawm vang a ni. Kan va rinate rinawmna khan keimahniah rinna nung min siamsak a, kan nun a hah chawl a, chu rinna nung (Isua nun) chuan huaisenna min pe a, huaisen takin rinna kawngah ke min pentir ta thin a ni. Ringtu hi a fel ngai lo va, a rin Pathian kha a fel a, chu a rin Pathian felna chuan a thawhsak zawk thin a ni.
Chhunzawm leh atan......
No comments:
Post a Comment