Zo Vapual

"To achieve something you've never had before, you must do something you've never done before....."

You earn your body...... 💪💪💪

Hriselna tha neih hi a pawimawh a, hriselna tha neih a pawimawhzia hre mah ila; hrisel tur leh hriselna tha nei tura insawizawi erawh a harsa hle thung. Hriselna hi Pathian thilpek hlu ber te zinga mi a ni a, chumi enkawl chhunzawm tur erawh chuan nangmah ngei i chet chhuah a ngai a ni.

Hriselna tha nei tur hian ei in tui tui leh ei tur tha tha te ei thei mah ila, insawizawi leh a enkawlna lamah kan inthlahdah leh si chuan kan taksa hi awm ze nei lo leh bawrhsawmna khurah kan nawr liam thei bawk. Chuvangin hriselna tha nei tur hian ei in chauh a pawimawh lo va, taksa insawizawina tha neih hi a pawimawh tel a ni. Chu mai ni lovin rilru sawizawina neih tel a pawimawh bawk. Chumi pathum tang kawp a hma i lak phawt chuan a tlo fat tawh mai a, hmuh theihin a rah chhuah i ei thei ang.

Sawi tawh angin i taksa kha nangmah ngeiin i tihrisel thei a, chutiang bawkin kawng leh lamah chuan nangmah ngeiin i tibawrhsawm thei bawk. Vitamin tha tak tak ei hi hriselna a ni ngawt lo va, i rilru ngaihtuahna ngei pawh kha a hrisel tel a pawimawh a ni. Chuvangin i hmaa Hriselna awm hi nangmah ngeiin i la thei a, chutiang bawkin nangmah ngeiin i hnar thei bawk. 'You earn your body....' tia sap thufing pakhatin a sawi ang hian, i taksa hriselna kha nangmah ngeiin i hlawhchhuak thei a ni.

Mi hrisel te bula awm nawmzia hi kan hre fovin ka ring. An bula awm a nuam a, an hmel hlim leh an taksa hrisel hmel tak te hian an bula awmte pawh min tidam sawng sawng a ni lawm ni tih tur khawpin an bula awm a nuam a ni. Chumi opposite chiah chu hrisel lo te bula awm hrehawmzia hi a ni ve thung. Mi hrisel lo leh damlo bula kan awm tam viau chuan kan taksa hian damloh hi an chak ve mai dawn angin kan awm thin a ni. Hrisel lo te bula kan awm tam chuan an hmel hlim lo kan hmu tam nge nge a, hmel hlim lo bula kan awm tam chuan an bula awm a hrehawm thin a; chu mai ni lovin an hmel hlim lo kha kan kangkai ve thei a ni. Hrisel leh hrisel lo bula awm inthlauhzia hi sawi tur tam tak a aawm ang a, duh tawk mai ila.....

Photo : Google Image

Hriselna te hi a van tla dawn ngawt theih a ni lo, mahni ngeiin thawh chhuaha neih chi a ni. I va sawi huai ve..? min ti mai thei. Mahse a dik tlat si a ni. I taksa hrisel tur khan nangmah ngei i thawh chhuah loh chuan i thenawm pa, i thenawm nu khan a rawn pein a rawn thawh chhuah sak dawn lo che a, mahni ngei thawh chhuah a ngai.

Hriselna kan sawi ta sa sa.....hriselna hlutzia i hriat duh chuan hrisel lovin a thla tel khum betin han awm ve chhin teh (a thla tel pawh a ngai lo vang, chawlhkar khat chhung damloh/hrisel loh pawh a hrehawm a....), miten an hrilhfiah che ngai hauh lovin 'a lo ni maw..... a lo nih tak hi' tiin i 'Amen' thei nghal vat tawh ang.

Kan thu hmawr bawkna atan heti hian ka han sawi teh ang. Hriselna tha neih te hi kei chuan Pathian malsawmna a ni ka ti lo thei lo. Engvangnge kan tih chuan hriselna te hi duh hun huna neih theih leh chan theih ah kan ngai palh ang tih hi ka hlau a ni. Hriselna petu Pathian atanga chhuak a nih loh chuan duh hun hunah a dawn theih miah loh a nia. Chuvangin hriselna tha petu che Pathian hnenah khian vawi engzatnge Lawmthu i sawi ve tawh le..? Hriselna tha i neih avanga a petu Pathian hnenah khian lawmthu i la sawi ngai lo a nih ngat chuan bawrhsawmna in a hmuak reng che tihna a ni ang.

Hei leh chen hriselna tha min petu Pathian hnenah khian lawmthu i sawi mawlh mawlh ang u. Lawmthu sawi ngailote pawhin lawmthu i sawi zel ang u. Tichuan hriselna tha min petu Pathian kan ti lawm ang a, hriselna tha min petu Pathian ber a lawm chuan hriselna tha lehzual min pe zel dawn a ni. Chuti ni lova a petu chungah pawh lawm nachang hrelo kan nih phawt chuan bawrhsawmna in min tlak buak thuai mai ang. Pathian hnenah khian lawmthu i sawi zel ang u.

Kan thu hma lamah khan 'nangmah ngeiin i hriselna i siam thei' tiin kan sawi kha kan la theihnghilh em lo vang chu maw...? Khang zawng zawng pawh khan Pathian atanga malsawmna kan dawn a ni a, chu a malsawmna kan dawn chu keimahni ngeiin Pathian thu kal tlang leh insawizawi chungin kan enkawl hrisel thei a ni....tih hi i vawng reng ang u.

Pathianin a malsawmna a pek che zinga hlu ber leh pawimawh ber (Bible tawngkam hawh in a chenna in....Pathian in chu a thianghlim si a, chu in chu nangmahni in ni e. I Korinth 3:16,17) chu i taksa ngei a ni a, chu a malsawmna i dawn chu nangmah ngeiin i tihrisel thei a, chutiang bawkin i tibawrhsawm thei bawk. A enkawltu atan nangmah ngei kha i pawimawh a, chu in chu i tih khawloh chuan nangmah ngei pawh tihkhawlohvin i awm ve dawn a ni.

Kan thu a sei dawn ta...... A hmawr bawk nan, "Pathian in chu a thianghlim si a, chu in chu nangmahni in ni e.....( I Korinth 3:17)