Zo Vapual

Lalpaah i tlan lut thin ang u

C.Lalmuankima

Newcastle, United Kingdom

Nimin 5th September 2015 (inrinni) khan thil mak deuh mai ka hmu ve tlat mai pek a, (thenkhat tan chuan a ho viau vang a) mahse ka tan chuan thil mak ve deuh a nih avangin ka han share ve teh ang.

Photo : Google Image

Ka inluahpui (room leh lama mi...a hming chu ka sawi lo mai ang a...) hian ka tuk tho kitchen lama breakfast ka siam mawlh mawlh laiin mangang lungchhe tak mai hian min rawn pan a, good morning hlei thei lo khopin a rilru a mangang a, a lungngai a ni. Naupang tap leh Hmeichhe mangang lungchhiatthlak taka tap hi ka lo hmu ve fo tawh thin a, patling (tlangval) lungchhiaa tap erawh ka lo hmuh ngai meuh loh avangin ka rilru a khawih hle mai a, (video/movie ah te chuan hmu ve bawk thin mah ila, hmaichhana hmuh nen chuan a dan a dang kher mai.....) tichuan ka han zawt chiang a, ni hnih kal ta khan medical report lamah a pum lam chianlohna endoscopy (kawchhung lam en ngai....) khopa a awm avanga lungngai leh a ekah thisen a tel thu hi niin. A mangangin a mitmeng te hi a dul ruih a, ka thiam ang tawk chuan ka han thlamuan ve a, tichuan a darah kut nghatin ka tawngtaisak nghal a......A rilru hahna chu tawk fang chu a chhawk zangkhai ta a......

Ka han sawi tum tak zawk chu..... kan awmna hmun theuhvah hian kan chheh vela thil thleng leh kan nuna thil thlengah hian chanchin chhia kan dawn/hmuh chang a awm thin, (mihring kan la ni miau si a, chanchin thalo hriat chang kan nei thin ang....) chutih hunah chuan Lalpaa kan tlan luh vat hi a lo pawimawh ber dawn a ni tih hi ka sawi uar duh hle a ni. Lalpaa kan tlan luh phawt chuan a ni chuan kan harsat, manganna te leh kan phur te min chhawk zangkhai turin a inpeih reng a, a hnena pek mai leh a chunga nghah mai hi kan tih tur hmasa ber chu a ni. Chuti lova mahnia chin fel kan tum chhung chuan kan nun hi a thlamuang thei chuang lo vang. Hmelma lah hi a fing em em mai si a, thu dik zat ve hmangin mi rawn thlem leh ang a; a ni dawn tak e tiin khawvel lam thilah kan rilru kan pe leh ang a, thu dik tluan tling ni lo na na na chu a tawpah lungngaihna min siamsaktuah a chang leh dawn a ni. Chuvangin mihring kan nih chhung chuan kan chunga thil lo thleng te hi (a bik takin harsatna, lungngaihna, manganna....) keini chuan kan dang zo lo vang, mahse a lo thleng chung chung pawha Lalpaa kan tlan luh phawt chuan heng harsatna zawng zawng hi a chinfel dan a lo awm zawk a ni.

Amah ngeiin Matthaia 11:28-30 ah khan, "Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u......ka phur pawh a zang a ni." tiin min hrilhin min sawm lawm lawm a nih kha. Mahni a phurrit phurh chu a hahthlak em em a, nun hian hahchawlhna a hmu zo lo tak meuh meuh va, Lalpaa kan chawlh thiam a, kan phurrit kan nghah phawt chuan kan phur te chhawk zangkhaiin kan lo awm zel dawn a ni. Chuvangin kan manganna te, kan harsatna te, kan lungngaihna te, kan bawrhsawmna te thleng hian Lalpa hmaah i nghat ang chu. Ani tan chuan a awlsam em a, min lo chhawk zangkhaisak zel turin a inpeih reng a ni e. Keiman ka chawlhtir ang che u....titu khian a phur zan thu pawh a sawi a, mihring ngaiha i harsatna tawh lian ber pawh kha Ani tan chuan thil ho tak a ni a, a chinfel theih loh thil reng reng a awm lo. A pawimawh ber mai chu amaha innghah tawp hi a ni.

Tlemin han sawi thui leh deuh ila, Pathianin min chhandamna ah hian harsatna leh manganna te, lungngaihna leh tahna te tawk tawh lo zawngin min chhandam lo va, he khawvela kan chen chhung hi chuan kan la tawk fo/zel ang, chutih hunah chuan amah nena tuara ama hming avanga amah chawimawia a awm zel theihnan min lo chhandam zawk a ni.

Chhandam fa i/ka nih avangin harsatna tawk lo turin i in ring suh ang u. A chang chuan mite aia tuar bik viau ang tein kan inngai fo thin a, chung lam kan mawh puh lek lek chang a awm thin. Harsatna kan tawk chung chunga a tawrh dan kan thiamna turin kawng fel tak kan tan ruatin a awm fo thin. Chu chu hrethiam turin kan nun hi a hnena hlana intihthianghlim fo hi a ngai a ni. Harsatna te hi keimahnia chinfel kan tum chhung chuan chinfel chu sawi loh kan inching hnawk nuaih thei. Chuvangin mahnia chinfel tum lovin Lalpaah zel hian nghat thiam ila, harsatna a lo thlen hun apiangah Lalpaah tlan lut zel ila, Anin kan tana thatna turin min lo chinfelsak zung zung mai dawn a ni.

Ringtute tan chuan harsatna chinfel dan tha ber mai chu Lalpa hmaa kan harsatna te thlena Amah chinfeltir hi a ni. Ani chuan kan harsatna zawng zawng chinfel theih loh a nei si lo va, Amahah zel hian i innghat thiam ang u.

'LALPA hemi chungchangah hian keimah chuan ka do zo leh dawn lo, ka chingfel leh dawn lo, chuvangin i hnenah rawn thlenin i lam ka lo hawi tawp a ni e, nang chuan ka tana thatna tur i hre zawk si a, i hnen rawn thlen tawp loh chu keimahin ka zuam lo a ni....' tiin a hnenah i thlen tawp zel ang u. Tichuan kan nun chu thlamuang takin a chawl thei tawh ang a, hahdam takin ke kan pen thei tawh dawn a ni.

"I mangan a hnen thlen la,
I mangan a hnen thlen la;
I mangan a hnen thlen la,
Anin a lo tanpui zel ang che'

tia fak hla siamtu in a lo sawi ang khan, kan manganna te Lalpa hnenah/hmaah i thlen zel ang u. Tichuan anin min lo tanpui zel dawn a ni.