Zo Vapual

Sam 139 atanga zirlai pawimawhte
C. Lalmuankima
Newcastle, United Kingdom

 

He Sam 139 hian sawi a hlawh hle mai a, he Bible bung leh chang atang hian zir tur pawimawh tak tak te kan nei tih chu a hriat a ni. Sam 139 pumpuiah hian Pathian chu engkimtithei leh engkim mai hria a nihzia te, a enkawl zui zelzia te leh khawi hmuna pawh awm, a lak atanga tlanbona awm miah lo, amah chu khawi kipa awm Pathian a nihzia te kan hmu a. Sual erawh chu huain Sam ziaktu ngei pawhin a huat ve thu te, engkim chunga thunei, engkimtithei, ropuinaa khat leh thiltihtheihnaa khat a nihzia kan hmu bawk a ni.

 

Bible mithiamte chuan Sam 139 pumpui hi then thum emaw then li emaw in an then a, tun tumah hian then lia an then hmangin ringtu nun zir ho kan tum dawn a ni.

Photo : Google Image

Chang 1-6 ( Pathian chuan engkim a hre vek)

 

Chang 1-6 thleng kan chhiar chuan Pathianin engkim a hriatzia kan hmu a, chu engkim hriaa chu amah Sam ziaktu Lal Davida hian hrechiangin a rawn auchhuahpui ta a. ‘Aw LALPA, nangin ngun takin mi en chhuak a, mi hre ta. Nangin ka thut leh ka din hi i hre thin a, ka ngaihtuahna hi hla tak atang pawhin i hre thiam thin…..’ Pathianin a rilru ngaihtuahna chhungril ber thleng pawha a hriat chhuah vek thu a au chhuahpui a.

 

Photo : Google Image

He lai chang atanga zir tur pawimawh tak mai kan hmuh chu Pathian hriatchianna hi a ni. LALPA chuan engkim a hria a, vawiin nia kan ngaihtuahna, tun hun tun darkara kan ngaihtuahna thleng pawh hian a hre vek a ni. Chu chu Sam ziaktu hian hrechiangin….. "LALPA chu mi vengtu a ni a, ka tlachham lo vang….(Sam 23:1)” ti te pawhin a lo au chhuahpui tawh a. Sam ziaktu hian a rin Pathian khi a hriatchian em avangin a tlakchham loh tur thu thlengin a au chhuahpui ngam tlat a ni. I rin/ka rina hi kan hriatchian hmasak miau si loh chuan engtinnge a chungah kan innghah ngam teh lul ang? Pathian hriatchianna atang lo chuan a thu awihna a awm bawk si lo . Pathian hriatchianna chuan amah tiha a thu awihnaah min hruai lut a, chu Pathian thu awihna chuan a malsawm dawnna a hring chhuak thin.

 

Kan thupuiah khan let leh dawn ila. A nih chuan chutia kan awm dan zawng zawng a hriat vek si chuan kan ngaihtuahna te hi a sualin a chhe hlawm ropui si a, thuthlung hlui dan ang chu ni se la nitin maia thi tlak kan ni. Amaherawhchu thuthlung thar a fapa Isua Krista hmanga tlan kan nih avang zawkin vawiin ni thlengin a khawngaihna kan chang a, kan ngaihtuahna sual ang anga min thungrul lo te pawh hi a hnena lawmthu sawi mawlh mawlh tur kan ni zawk e.

 

Pathianin min hrechiang em em a ni tih hriatna hian kan nunah engtinnge awmzia a neih le? A thlamuanthlak kan ti nge a hlauhawm kan ti zawk? Heti hian i rilruah han ngaihtuah chhin la: Nangmah hrechiang em em tu che Lal ropui tak mai chu nangmah vengtu lo ni ta se la, engtianginnge i awm ang? I thlamuanpui ang nge i hlau zawk ang? Thil tha titute tan chuan a thlamuanthlak hle ang a, kan hma lam leh hnung lam min hual a, kan chungah a kut a nghat bawk a, thil sual tihna remchang a awm hauh lo vang. Chuti ni lova thil sual titute tan erawh chuan a hlauhawm hle thung ang. Pathian hmaah chuan engkim thuhruk a awm lo a ni tih hriat chuan a rapthlak angin a lang a, kawng leh lamah chuan kei teh lul min ngaihsaka min hria hi erawh chu a thlamuanthlak hle thung.

Chang 7-12 ( Pathian chu khawi kipah pawh a awm a ni)

 

He Bible chang te hian Pathian chu khawi hmunah pawh awm a nihzia a rawn tarlang a. Pathian chu khawi hmunah pawh a awm a, a hnen atangin tlanbona tur reng reng a awm lo tih kan hmu a ni. Keini chu kan rilru ngaihtuahna awmna apiangah kan awm thei lo. Kan taksa hian min la kar dan tlat avangin. Pathian erawh chu khawi hmunah pawh a awm a, chu chu Sam ziaktu bawk hian hrechiangin a hnen atanga vahbona/tlanbona a awm lohzia a rawn tarlang leh a, “Vanah han lawn ila, chutah chuan i awm si a, Seol ah mutna siam ila, chutah chuan i awm bawk si a….” tiin Pathian hnen atanga tlanchhuahna kawng a awm lohzia kan hmu bawk.

 

Pathian thutakin a man tawh, (Isua Krista nun nei tawh te…..) a hnen atanga tlanchhuak thei tumah an awm lo. A hnen atanga tlanchhuah tum chu thil atthlak tak a ni a, Pathian thil tum dodalna a ni bawk. Heti hian sawi chhunzawm zel ila, LALPA thlarauvin a man tawh chu e,….. a lak atanga pen bo (tlan chhuah) tum thin ma hila, kan tluang thei reng reng lo. Kan tum nasat poh leh kan hlawhchham ting mai a ni. A lan dan angin tluang purh angin lang mah sela, chhungrilah min veltu/vawtu/hremtu/tinuamlotu hi a awm tlat thin. Chuvangin kan Pathian hnen atanga tlanbo tum chu lei char lai bera luh tum ai pawhin a let tam takin a har zawk a ni. Kan Pathian chu khawi kipah a awm kan ti a, thil te ber thlenga venga enkawltu kan ti bawk a. Mahse a chang chuan Pathian hi hla em ema hriat chan kan nei thin ti raw….? Engdang vang ni lovin i bulah awmchilh reng chein i kohva a hmng i lam hun kha a nghak thin a ni. Min tanpuitu tur kan hriatchian hma hi chuan kan nun hi a mangang ru tlat thin. Mahse, min tanpuitu tur kan hriatchian hnuah erawh chuan kan nunah harsatna chi hrang hrang lo thleng thin mah sela kan nun hi a zam chhe tawh lo va, a mangang tawh ngai lo. Kan Pathian khi a hming lama kohva a hnena dilna thlente hnena lawm thin leh lawmman pek hmang Pathian a ni. A hnena dilna i thlen loh chuan engtinnge i thinlung duh zawng a pek theih ang che….?

Chang 13-18 (Engkimtithei Pathian siam kan ni)

 

Mi mal tin te hi Pathianin a bik tak leh a duh dan taka siam kan nih thu kan hmu a, hlauhawm tak leh maksak tak leh mawi taka siam kan nih thu kan hmu bawk. “Pathian ngaihah chuan kan hlu a ni” tih hi kan ngaihtuah ngai em? A lehkhabuah chuan kan peng zawng zawng hi ziak vek a nih thu te hi kan ngaihtuah ngai em aw? Kan taksa peng zinga a tangkai lo bera kan ngaih pawh hi siamtu kut chhuak ropui tilangtu/pholangtu an tling pha vek asin....! Nangma ngaihin nep hle leh te hlein in ngai mah la, Pathian ngaih chuan hlu tak i ni (ka ni) asin. Chuvangin i/ka taksa peng hreng hrangte hi siamtu Pathian duh dan leh mawi tih dan taka siam kan nih angin nang leh keia lo sawisel thiang a ni lo va; lawm taka kan put mai hian min siamtu min siam chhan kan tihlawhtling a, kan chawimawi bawk a ni.

 

Midangte aia chhe bik emaw hniam bik emaw khawlo leh tawmkailo bik emaw ….adt…..ah kan inngai thin te hi siamtu Pathian dodalna a ni a, heng ngaihtuahna hrisel lo tak tak te hian ringtute nun hi min tithuanawp fo thin a ni. A petu che ah lawmna i neih hma chu a thilpekah lawmna kim i hmu ngai lo vang. Vawiina nang aia fel leh tha leh duhawm bika i ngaih te pawh kha e, anni aia tha leh thiltithei te aia tha leh thiltithei nih chakin an phe kual tho asin. Tuna i nih ang anga i lawm thiam hma chu nangmah siamtu i dodal tihna a ni. Nangmah siamtu ah i lawm thiam phawt chuan tuna i nihna ang angah khan lawmthu sawi sen loh i hmu fo tawh ang.

Chang 19-24 (Pathian chu engkim chunga roreltu a ni)

 

Sual chu huain kawng dika kal/zawh a thatzia tih lanna a ni. Pathian chu engkim chunga roreltu a nihzia leh a hnuai lam kan chhiar thlak zel chuan LALPA dotute a huatzia thu kan hmu bawk.

A chang hnuhnung ber hi ka duh hle mai. “Aw Pathian, ngun takin min en chhuak la, ka thinlung hi hria ang che, mi fiah la, ka ngaihtuahna te hi hria ang che….” tih hi. Sam ziaktu hian Pathian a hrechiang a, a hriatchianah a tawp mai lo va, a chang tawp berah phei chuan amahah suahsualna kawng a awm leh awm loh chungchangah fiah pawh a ngam a ni.

 

Keini hi engnge kan an ve le? LALPA min fiah rawh kan ti ve ngam em? Kan ngaihtuahna sualzia te hi aw, fiah tlak kan va ni lo tak em…! Min han fiah dawn tak tak se la, kan fail nitin mai lo vang maw? Sam ziaktu nun hi a ropui ka ti tak zet a ni. Ani chuan amahah suahsualna kawng a awm leh awm loh chungchangah fiah a ngam a. Keini chu kan tih sual tawh sa chu sawi loh, kan la tih sual leh tur ngaihtuahin fiah kan ngamin ka ring lo. Tih sual leh tur tha tak tak kan hual sa tin ten si a. Siam ziaktu anga kan nun fiah ngam khawpa LALPA tana kan inpek/inhlan hunah chuan kan nunah hian miten chi nung an hmu ang a, rah tak ei tur an hmu taw hang. LALPA thu hi kan nun tehna buk lung khin dik tak atan i hmang thin ang u.

 

Photo : Google Image