Zo Vapual

Thalaite hi khawtlang darthlalang kan ni

C. Lalmuankima

Slough, United Kingdom

Thalaite hi khawtlang darthlalang kan ni tih hi kan inhriat reng a tha. Kan khawtlang darthlalang kan nih angin mi dangte tana entawntlaka awm zel hi thalaiten kan tih tur pawimawh tak a ni bawk. Chuti ni lova mahni mawhphurhna pawh hlen zo lo leh hlen ngam lova kan awm a nih chuan khawtlang tihmelhemtu kan ni mai dawn tihna a ni. Thalaite hi khawtlang innghahna bulpui ber kan nih hre rengin midangte tan entawntlak taka awm zel i tum ang u. Mite entawn berin entawntlak lo khawpa hun kan hmang a nih chuan kan khawtlang hmel hmang lan dan kan tibal nghal tihna a ni.

Photo: Google Image

Kan khawtlang nawm leh nawm loh pawh hi kan thalaite chetzia leh nunphungah tam tak a innghat a, thalaite tel lovin khawtlang nuam a siam theih loh bawk a tih theih awm e. Khawtlang huap chauh pawh ni lovin khawvel pum huap pawhin thalaite hmalakna apiang mai chu a kaw duak duak zel a, thalaite awm dan chu khawvel awm dan tur emaw tih tur khawpin thalaite hian pawimawhna kan nei a ni. Tunlai khawvel thil siam chhuah thar reng reng hi thalaite duhzawnga siam a ni ta a ni lawm ni a tih theih bawk. Thalaiten an duh dawn phawt chuan an siam chhuak a, manto deuh pawhin an zuar chhuak a, kan bawh hum hum tho a nih hi maw!

Company lian leh factory lian pui puiah te hian han kal ila, thalaite hmel hmuh tur a tam ber a, thalaite tel lovin company leh factory lian pui pui pawhin ke pen zai a rel thei lo tih tluk a ni. Tunlai khawvel infiamna (Sports) chi hrang hrang pawh hi thlir chhunzawm ta zel ila, thalai in tha zo rualten theihtawp chhuaha inelna a nih avang pawh a ni tel bawk ngei ang, thalaite hmel hmuh tur a tam ber bawk. Chutiang zelin thil dangah pawh thalaite hmel hmuh tur a tam ber thin a ni. Amaherawhchu chu kan pawimawhna chu hrechiang lova a ni lo lama kan hman phawt chuan kan khawtlang leh khawvel tihrehawmtu leh tiraltitu kan ni ve thei bawk a ni tih hi kan hriat reng a tha.

Chuvangin thalaite hian khawtlangah pawimawhna lian tak kan nei a, chu kan pawimawhna chu hre reng turin kan infuih mawlh mawlh a ni. Thil reng rengah pawimawh ve nia inhriatna hian hmasawnna min thlen thin a, 'Ka tel lo pawhin an ti thei tho alawm... ' tih aiin 'Kei hi tel ve ila, a kila lo hnawhkhattu ka ni ve thei ang...' emaw 'Kei hi lo tel ve ila, khawi khawi laiah emaw chuan tu tute emaw tan malsawmna ka ni ve thei ngei ang...' tih rilru pu ran chunga khawtlang leh kohhran thiltihhonaah ke kan pen phawt chuan tun aiin kan kohhran leh khawtlang hian hma a sawn ngei ang.

Thalaite hi khawtlang darthlalang kan ni. Kan sawi tawh angin kan khawtlang hmel lanna ber thalaite hian kan tih tur kan tih loh hian kan khawtlangin a nih dan tur angin a nih theih loh phah thei a, khawtlang inrelbawlna leh thil dangah pawh hma a sawn thei lo bawk a ni. Entirnan: Khawtlangin kan entawn ber mai Thalaiten khawtlang entawntlak lo khawpin lo che mawi lovin ruihhlo lamah te lo tluksan ta ila, a nih loh pawhin nawmsip bawlna lamah te, gambling lamah te, zu leh sa lamah te lo uiresan ta ila, an entawn tur berin awm loh tura kan lo awm a, entawntlak awm lova kan lo khawsak chuan Khawtlangin engtinnge min zah ang? Mite zahtlak ni tur chuan mahni ngei pawh zahtlaka kan awm hmasak a pawimawh a, mahni lamah zahtlaka kan awm loh chuan engtik lai mahin mite zah kan kai thei dawn lo tihna a ni.

Chuvangin kan thalaite hlawhtlinna hi kan khawtlang hlawhtlinna a ni ti ila kan sawi sual tamin ka ring lo. Kan khawtlang pawh hian kan thalaite lo chu chhuan tur dang a nei lo va, kan thalaite zarah khawtlang pawhin a nih dan tur angin hmalam panin ke a pen ve chhet chhet a tih theih a ni. Khawtlanga kan tih theih chin a in ang lo a ni mai thei, amaherawchu kan khawtlang tana a kar awl pakhat kan lo hnawh khat ve a nih hlauh chuan khawtlang tan malsawmna kan ni tihna a ni. Chutianga khawtlang tana pawimawh tak kan nih avang chuan thalaite hi mahni awmhmunah awm mai mai thei kan ni lo va, kan khawtlang hmasawnna hi kan kovah a innghat tlat a ni tih hriain khawtlang tan darthlalang, entawntlak tak nih tling zelin theihtawp chhuahin ke i pen zel ang u. 

Vawiina kan thalaite hlawhtlinna hi naktuk thangtharte pawhin a zar an la rawn zo zel dawn a, vawiina thalaite hian kan hnua lo kal lehzel turte tan hma i lo sialsak zel ang u. Vawiina thalaite hian naktuka thangthar lo awm zel turte tan kawng sialsak nachang kan hre lo a nih chuan min la rawn dem mai dawn a ni. Chuvangin kan hnua lo kal lehzel turten min rawn dem mai loh nan theihtawp i chhuah zel ang u. Kan khawtlang tan entawntlak taka rah chhuah zel turin theihtawp i chhuah chhunzawm zel ang u.