Zo Vapual

Nangmahah khan insawhkeh nun i nei thin em?

(Luka 6:38; 2 Korinth 9:7, 15; 2:15-16)

C. Lalmuankima

Newcastle, United Kingdom

"Pe rawh u, chutichuan pekin in awm ang; thahnemngai taka teh a, beng muk a, sawi muk a, liam zawih zawihin, in mal chungah an pe ang che u. In tehna ngai bawkin an tehsak leh dawn che u a." (Luka 6:38)

Photo : Google Image 

I nunah khan insawhkeh nun i kawl thin em? tih hi ka zawt hmasa duh che a, i la nei ngai hauh lo a nih chuan midangte tana eitlak ni thei turin Isua hmingin insawhkeh thin ang che. I chhungrila Isua nun mawina leh par rimtuina leng chhuak thei turin nangmah tuamtu kawr kha sawhkeh thin ang che. Tichuan chu thil rimtui tak kaltlang chuan miin nangmahah kha nung an hmu ang a, rah thlamuanawm tak a chhuah zel tawh mai ang.

Fakna hla siamtu chuan heti hian a lo sawi a, 'Lalpa, ka nun hi saruangah siam ang che...' tiin. Kan nun hi Lalpan saruangah min siamsak fo thin rawh se, tichuan mite eitlakin rah kan chhuah thei dawn a ni. Mite an ei theih turin sa hmin saah min siam fo a pawimawh.

Lalpaa pekna thinlung nei tawh te chuan pek loh hi an hlau hliah hliah zawk thin. An pek tlem leh pek tam lamah an innghat lo va, Lalpa hminga pe ve thei an nih avang zawkin lawmnain an khat thin a ni. Pek hi hausaka len thur thurna a ni lo mai thei, mahse Pathian malsawm dawnna a ni. Hausakna a ni lo, Lalpan vantukverh min hawnsakna hmanraw tangkai tak a ni thung.

Pathian hian kan pek ang ang te hian mal min sawmsak dawn se la chuan dawn tur hi kan lo nei mumal lo mai thei. Mahse a khawngaihna leh zahngaihna avanga vawiin thlenga kan phuloh malsawmna min la phur hi a ropui a ni. A chang chuan he uikawmna thinlung hian kan malsawm dawn tur hi min kharbehsak tlat thin a nia. Chu tak mai chu Isua hminga sawhkeh a lo ngai thin a ni. I nunah khan Pathianin vantukverh a hawnsak che i duh a nih chuan chumi daltu leh hliahtu uikawmna thinlung kha Isua hmingin han paih bo daih mai la, i malsawm dawn tur chuan a rawn umzui tawh mai ang che. Malsawmna han tih hi kan rilruah sum leh pai, in leh lo tha pui pui hi a rawn lang leh thin a, hei chauh hi malsawmna a ni lo tih hi kan hriat a tha hle ang. Malsawmna hi kan taksaah ngei pawh a lo thleng thei a, in leh lo malsawmna emaw sum leh pai malsawmna emaw dawng lo mah ila, taksa damna leh hriselna lamah malsawmna kan dawn phawt chuan chu pawh chu Pathian vantukverh malsawmna tho a ni. Sum leh pai, in leh lo malsawmna tha pui pui nei teuh mah ila, a chentu ber kan dama kan hrisel miau si loh chuan awmzia a nei chuang lo a ni. Chuvangin kan rilruah malsawmna han tiha thil dang rawn lang tel tlat mai, thil pawimawh zawk kan ngaihthah fo thin hi a awm a ni tih hi ka duh tel duh.

A chang chuan keimahnia par rimtuina lo chhuak tur daltu hi tihkian/tihkeh a ngaih chang a awm thin a. Chu tak mai chuan Lal Isua hminga sawhkeh fo a pawimawh hle ang. Mihring thahnemngaihna maia ti lovin Lalpa thahnemngaihna kan chunga rawn thleng zawk turin Isua hminga tih fo a pawimawh a ni. Mihring chuan tlin chin leh tih theih chin kan nei fo thin a, kan beisei anga thil a kal loh phei chuan mawhpuh tur kan zawng fo thin. Mihring thahnemngaihna atanga kan tih hian thui tak chu a kal ve theih ngei mai, mahse kan thahnemngaihna zawnah miten thahnem an rawn ngaih ve loh hian keimahni lam kan na leh tlat thin. Chuvang tak chuan Lalpa atanga kan tih fo hi a pawimawh a, Lalpa thahnemngaihna atanga kan tih hian kan beisei anga thil a kal lo a nih pawhin kan tana tha zawk turin Lalpan min thawhsak leh mai dawn a ni tihnaah hian ngaihngam takin a awm theih thung a ni.

Pekna thinlung neih te hi a tha lutuk e. Chu aia tha lehzual chu Lalpa atanga chhuak pekna thinlung neih fo hi a tha a, hlim taka pek phei chu a hlawk bawk. Chuti a nih loh chuan mahni thahnemngaihna tlang atang pawhin tam tak chu a pek theih ngei ang. Mahse kan pek ang anga hlim taka pek zel hi nunah malsawm dawnna a ni tel tlat a ni. I chheh vela mite nangmahah khan nung an hmuh theih nan insawhkeh fo thin ang che. Nangmaha Isua rimtuina tichhuak zel thei turin i hringnun kha Isua hmingin sawhkeh thin ang che. Nangma lamah chan angin lang mah la, Lalpaah chuan hlawkna tam tak a lo awm thin a ni. Tirhkoh Paula pawh khan Korinth lehkhawn pahnihnaah khan heti hian a lo sawi a, 'Chhandam mekah te leh boral mekah te chuan Pathian tan Krista rimtui kan ni si a....' (2 Korinth 2:15) tiin Krista rimtui nih thu a sawi uar hle a, kan chhiar thlak zel chuan pawlkhatte tan chuan nunna laka nunna tur rim a nih thu a sawi tel bawk a ni.

Kan sawi tawh angin keimahnia Krista rimtuina ti chhuak thei tur hian mahni lamah insawhkeh phawt a ngai a, keimahni lama kan insawhkehna hmun apiangah hian Lalpa khian min lo tuam dam ang a, tichuan midangte tan damna kan lo thlen zel dawn a ni. Keimahni lam damna kan zawn hmasak phawt chuan miten keimahniah damna an hmu ngai lo vang. Chuvangin Lalpaah zel hian innghat ila, Lalpaah zel hian innghat ila, Lalpa atang zela bul kan tan phawt chuan kan hma hruai turin kan rin Pathian khi a inring reng a ni. Keimahnia sawithiah ngai awm ang angte hi Isua hmingin sawithiat thin ila, tichuan miten kan nunah hian eitlak thu nung an hmu ang a, keimahni kaltlangin miten Isuaah tuihalna thar leh ei tur tak an lo hmu zel dawn a lo ni reng mai.

Nangmahah i ui thin kha Isua hmingin han sawhkeh chhin mah teh, i nunah hlawkna tam tak i chan mai bakah nangmah kaltlangin mite damna an lo chang zel dawn a ni. Nangmaha rimtuina inthup tlat kha midangten a rim an hriat theih nan Isua hming insawhkeh thin ang che.