Zo Vapual

Bible Chhiar Malsawmna

C. Lalmuankima

Newcastle, United Kingdom

 

Photo Image : Google Image

Bible chhiar dawn apiangin min tibuai thei thil a rawn thleng ve ziah thin te han hriat/tawn hian Setana thikthu chhiatzia tilangtu a nihzia a lang leh thin a ni. Mahse Isua hmingin han hau thuai thuai ila, tui takin a lo chhiar chhunzawm theih zel a ni. Chuti a nih loh pawn Gospel hla te hi play pahin han chhiar ila, Bible chhiar hi a nuam em em bawk. Then khat chu hmun reh takah lo chuan an lehkhabu/Bible chhiarah an rilru a luh loh thu an sawi thin a, kei chu Gospel hla play paha Bible ka chhiar hian ka rilru a lut em em thung.

Bible chhiar thlarau dawng khawpin nasa lehzualin i chhiar sauh sauh vang u. Khawvel thawnthu bu chhiar thlarau pawh kan dawng thin a nih chuan engvanginnge Bible chhiar thlarau hi kan dawn theih loh bik ang? Bible chhiar thlarau dawng thei khawpin tawngtaina nen i chhiar zel ang u. Khuai riltam takin pangpar zu a hmu fuh a, a birh nghal tlut tlut a, a tlan sawn duh tawh lo ang hian Bible te pawh hi kan thlarau riltam tan chhiar tlut tlut ila, keimahni vekin a hlawkzia kan hmu zel dawn a ni. Kan taksa riltamna chu ei leh in hmangin kan phihru thei a ni mai thei, kan thlarau riltamna erawh chu ei leh ina hnawh khah theih a ni lo va, a hnawh khah dan awlsam ber mai chu Bible chhiar hi a nit hung. Chuvangin kan thlarau riltam hnawt khat turin Bible hi thahnemngai takin i chhiar uar zual sauh vang u.

Bible hi lehkhabu dang aiin a danglamna sawi tur tam tak a awm a, chung zinga pahnih khat lek han sawi lang dawn ila. Bible hi lehkhabu dang aia a danglamna pakhat chu kan chanchin inziahna bu a nih vang a ni. Video, TV, Thlalak, Chanchinbu, Magazine leh Lehkhabuah te kan hming lanna chhe tê emaw kan hmel lanna reilo tê emaw a awm chuan chhiar/en nuam kan ti em em thin a, en nawn leh fo kan chak bawk thin. Chutiang bawkin Bible pawh hi Pathian kaltlanga kan chanchin inziahna a ni a, kan chanchin inziahna a ni tihah hian chiang bawk ila, mahni chanchin a ni tihah kan chian phawt chuan hlim tak leh phur takin kan chhiar thei thin a ni. Hmanlai Israelte chanchin mai mai inziahnaah ngai ngai suh la, anmahni atang zir tur pawimawh tak tak i neih thu hi chhiar kan ngai suh la, nangmah pawh i tel ve a ni tih hi theihnghilh ngai suh ang che. Tichuan chutianga nangma chanchin inziahna pawh a ni tel ve a ni tih i hriatchian hunah chuan hlim tak leh phur takin i chhiar tawh mai dawn a ni. Chu tak mai chu Bible danglamna leh hlutna a ni kan ti lo thei lo vang. Kan chanchin tel vena a nihna hian ngaihhlut a hlawh a, mahni chanchin na na na chu kan ngaihven a, chhiar nawn fo kan chak thin a ni.

Bible danglamna leh hlutna pakhat leh chu Pathian thawk khum a nihna hi a ni. Timothea hnena Tirhkoh Paula lehkha thawn pahnihnaah chuan, ‘Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni.’ tiin (2 Timothea 3:16) a lo sawi a. He khawvelah hian lehkhabu tam tak an siam chhuak tawh a, an siam chhuak mek bawk a, an la siam chhuak lehzel bawk ang. Chung lehkhabu an siam chhuah zawng zawng zingah chuan lehkhabu tha tak tak hringnun chawm tak leh ngaihnawm tak tak te pawh a awm teuh va, chatuan nunna thu pai tel erawh pakhat mah a awm lo thung. Bible danglamna erawh chu a chhunga Pathian Lehkha Thu te hi Pathian thawk khuma pek a nih avangin chatuan nunna thu a pai tel a, nun a tihlim bawk a ni. Lehkhabu dang hi chu chhiar ngaihnawmah kan tawpsan a, kan ngaihtuah zui viau peih lem lo, Pathian thawk khum Bible chhung thu erawh hi chu a chhung thu ngaihnawmah a tawp mai lo va, kan sawi tawh angin kan chanchin tel vena a nih tlat avangin kan ngaihtuah chhunzawm lo thei lo va, chatuan nunna pai tel lehkhabu a nihna hian a tihluin a tidanglam lehzual a ni.

Bible chhiar thlarau lo thawh hun nghak kher thin suh. Bible i chhiar ang a, Pathian chuan a Thu hi a tan tlat avangin a thlarauvin a pawl chhunzawm zel zawk dawn che a ni. Mi tam tak ringtu inti ve si a thlarau pawlna dawn chauhva Bible chhiar an tum thin hi a fuh lo va, kum tluana a pawl loh phei chuan Bible chhiar miah lovin an tlingtla dawn tihna a ni reng mai. Bible chhiar thlarau thawh hun nghaha chhiar chauh tum te hi ringtu sawngnawi tak te nun a ni duh khawp mai. Pathian Lehkha Thu chu rilru tawngtaina nen kan chhiar ang a, tichuan anin a Thu hmangin kan nun hi min chhiar let ve zel dawn a ni. Chuvangin thlarau lo thawh nghak kher lovin bul han tan la, tichuan Pathian thlarau chuan a pawl chhunzawm zel tawh mai dawn che a ni. Pathian Lehkha Thu hi chhiar tam ila, tichuan kan tawngka chhuak te pawh hi Pathian Lehkha Thuin a kaltlang ang a, ngaithlatute tan khawngaihna chi-a al a lo ni zel dawn a lo ni reng mai. Engvanginnge kan tawngka chhuakah miten malsawmna an dawn theih loh kan tih chuan, kan tawngka chhuaka malsawmna dawng tur khawpin Pathian Lehkha Thu kan chhiar thin loh vang a ni duh khawp mai. Pathian Lehkha Thu hi miin a chhiar ngun a, a rin tlat chuan a Thu neitu Pathianin mal a sawmsak thin a, a tawngka chhuak thu mal tin mai kha ngaithlatute tan damna tling a lo ni ta thin a ni. Kan tawngka chhuak thu mal tinah hian miten damna an lo chan theih nan Bible (Pathian Lehkha Thu) chhiar hi i uar sauh sauh vang u. Bible kan chhiar tam phawt chuan kan tawngka chhuak pawh hi khawngaihna leh hmangaihna chi-a alin a lo awm zel dawn a lo ni reng mai.

Bible hi i hmanraw tangkai taka i hman thiam hunah chuan a chhung thu malsawmna hian i in a chhuahsan tawh ngai lo vang. I tu leh fate thleng pawhin he malsawmna hian a um zui zel dawn che a ni. Malsawmna tam tak dawng thei zel turin Bible hi i chhiar uar sauh vang u. Pathian malsawm tlak ni tur khawpa kan thawhrim a pawimawh ang chiahin Pathian malsawmna dawng khawpa a Thu kan chhiar tam a pawimawh bawk. Kan hnam hi miten Bible chhiar hnam an ni min ti rawh se. Hnam anga kan dinchhuah zel theih nan kan hnam hian Bible chhiar hi i uar zual sauh sauh vang u. Pathian chuan a Thu hi a tan tlat avangin a Thua kan chen phawt chuan kan hnam tan hian thil tha hi a ui lo vang tih hi kei chu ka ring tlat thin. Pathian Thua kan chen phawt chuan kan chungah a lawm ang a, Lalpa ber kan chunga a lawm phawt chuan a hausakna ren rual loh chu kan tan dahin a awm ve ang a, kan mamawh chakkhai tinreng min pe zel dawn a ni. A pawimawh ber mai chu Pathian hausakna ren rual loh hnuk thla thei tur awmchhun pawh a Thua kan chen a, Bible chhung thu hmanga kan auh hi a ni.

Bible chhung thuah hian inchiah ila, tichuan a thuin min chhiar let ang a, Pathian Lehkha Thuin kan nun hi min chhiar let hunah chuan midangte tan malsawmna tam tak thlentu kan lo ni zel tawh mai ang. I nun zawng zawng kha Pathian Lehkha Thu hmangin han luah khahtir teh le. Hmelma Setana hlauh ber leh hnialkhan tha ber pawh ‘Tih ziak a ni….’ (Matthaia 4:4) tih hi a ni.

I tu leh fate tana i ro hnutchhiah theih tha ber pawh Bible chhiar ngai na tura fuih hi a ni. I in leh lo tha pui pui hnutchhiah khan an tan thangkhat lian pawh a daih lo mai thei. Mahse Bible chhiar ngainatna ro i hnutchhiah phawt chuan an damchhungin an vawng reng tawh ang a, chu chuan an hringnun hi hlim takin a hmantir tawh mai dawn a lo ni. Chumai bakah an tu leh fate thlengin malsawmna luankawr atan Pathianin a hmang chhunzawm zel tawh mai ang. Fate birthday present atana tha ber mai pawh Bible hi a ni ka ti ve tlat. I fate kha Bible han present mah teh, a dan a dang zaih mai ang.

Bible chhiar malsawmna hi i tu leh fate thleng pawha dawng thei zel turin nangmah ngei khan bul han tan thin teh le. Tichuan i hmuh theih leh hmuh theih loh malsawmna thlengin Pathianin mal a sawm zel tawh mai ang che.