Zo Vapual

Chhungkaw Maicham

(Josua 24:15; Ephesi 4:30; Genesis 12:7)

C. Lalmuankima

Newcastle, United Kingdom

"Kei leh ka chhûngte erawh hi zawngin LALPA rawng a nia kan bâwl dâwn ni." (Josua 24:15)

I in chhung room tinah Lalpa a chen phawt chuan i in chhung chu a malsawm hlimna leh lawmnain a tikhat ang che. I in chhung room tina ramhuai inlar thei tur kha chhungkaw Pathian biakhona hmangin hnawt kiang thin ang che.

Kan in chhung hi Lalpa Pathian nen kan inbiakna Bethel hmun ni thin rawh se. Kan in chhungah hian Thlarau Thianghlim a ngampa em? tih hi a chhunga chengten inzawt fo thin ila a va tha dawn em! Kan in chhungah Thlarau Thianghlim a ngampat loh chuan thil dang (sual) a ngampa tihna a ni. Chuvangin kan in chhung hi Thlarau Thianghlim pawhin nuam a tihna hmun ni fo rawh se. Thlarau Thianghlim tihlungngaiha tihvui phei chu a hlauhawm em em a ni.

Photo: Google Image

Chhungkua hi Krista tel lo pawhin a din mai theih a, Kristian Chhungkua erawh chu Kristian tel lovin a din theih miah loh thung. Kan chhungkuaah Kristan Lalna a chang thin em? Kan in chhungkhurah hian Chair latu Lalpa Isua a ni thin em? tih hi Kristian Chhungkaw inah chuan kan ngaih pawimawh ber tur a ni ang. Kristian Chhungkuaah chuan Chair latu ber Krista a ni a, Kristan a luah chhungkua chu Kristian Chhungkua tih a ni thin. Kristian Chhungkua hi thua sawi maiah a tawp lo va, kan nun ngeia a taka nunchilh ngai a ni. Lal Isua ni lo thil dang kan dah lal chinah hian chhungkua pawh hi a lo buai thin.

Zofa Kristianten kan tihsual lian tak pakhat chu Kristiannaah chauh kan lungawi thin a, Kristaah zawk hian lungawi nachang kan hre thin lo. Hei tak mai hi ringtu nuna kan thanmawhbawk lian tak a ni. Engpawh ti dawn ila Lal Isuaah hian lungawi hmasa ila, Lal Isuaah hian bul tan hmasa thin ila a lo fuh vek zel a, chu chu awlsam tak anga lang si hian kan tihhmaih leh fo thin a, ringtu nunah kan thanlen theih loh phah thin. Chhungkua hi inzirtir mai a tawk lo va, Pathian Thu hmanga inkaihhruai tel a ngai a ni.

I Kristian Chhungkaw dinah khan Chhungkaw Maicham i hung thin em? Chhungkaw Maicham hung fote nun hi hlimna leh lawmnain a khat thin. Kan in chhung room tinte hi Thlarau Thianghlimin kaltlang thin rawh se. Kan in chhungah hi Thlarau Thiang hlim chenna tlakah kan siam thin loh avangin Thlarau Thianghlim kan tivui fo thin a ni. Lalpan chhungkua min dinsakah hian a chenna tlak ni tura kan chhawm nun zel a pawimawh a, chutiang tih nachang kan hriat loh chuan kan in chhungah hian Thlarau Thianghlim a ngampa thei lo vang a, kan in chhunga Thlarau Thianghlim a ngampat loh chuan sual a ngampa thuai mai dawn a ni.

I in chhungah khan Lalpan hun leh hmun a chang tam em? Nge khawvel thil mitkhap kara ral leh mai turin hun leh hmun a chang tam zawk? Chhungkuaa Pathian pawlho leh tawngtaiho kerh kerh chhungkua hi Lalpan mal a sawm thin. Kan chhungkua hi Pathian malsawm dawngtlakin a thu kan awih em? Kan chhungkua hi Pathian malsawmna dawng tlakin kan nung em, Lalpa malsawm dawng tlakin Lalpa tan maicham kan hung thin em? tih hi vawiina Kristian Chhungkua mimal tinten kan inzawhna lo ni fo rawh se.

Ramthim kan vei a, ram pilril leh hmun hla tak taka rawngbawla chhuah te hi a tha e, kan sawisel hauh lo. Amaherawhchu Chhungkua kal pela rawngbawl hi a hlawk mawh hle a. Mahni in chhungkhur ramthim hi tiêng hmasa thin ila, chumi zawhah feh chhuak ta thin ila, rawngbawlna pawh a tla thain a hlawk duh hle a ni. Mahni in chhungkhur ramthim kal kana midang va veia va tihên tum chu thil tha ber pawh a ni lo. Kan in chhungkhur ramthimna hi Krista êngin chhun êng hmasa thin ila, tichuan kan thenawma ramthim pawh kan chhun eng zel dawn a ni.

C.H. Spurgeon hian chhungkuaa Pathian biakho hi a ngai pawimawhin a duhthawh hle a ni ang, "Chhungkuaa Pathian biakho hi chhungkaw thianghlimna hmanrua a ni a, chhung inkhawm nei duh lote chu anchhe dawngin awm rawh se." a ti hial a ni. Nova chuan Lalpa tan maicham a siam (Gen. 8:20) leh Abrahaman a hnena inlar Lalpa tan maicham a siam (Gen. 12:7) ang khan keini pawh Lalpa tan chhungkaw maicham i siam thin ang u. Chhungkuaa Pathian biakho tluka hlimawm a lo awm chuang lo va, chhungkuaa Pathian biakho hi chhungkuaa malsawm dawnna a ni.

I in chhungah khan Chhungkaw Maicham i hung ngai lo a nih chuan tun atangin Isua hmingin han hung chhin teh le. A hlawkzia chu hmuh theihin a rawn lang chhuak mai ang. Josua angin 'Kei leh ka chhungte erawh hi zawngin LALPA rawng a nia kan bawl dawn ni' tiin rinawm takin chhungkaw maicham i hung thin ang u.