Zo Vapual

Demonstration For Global Action Of Ethnic Kachin

by L.M.Kima

Vawiin 14th October 2011 Zirtawpni khan Kachin National Organization (KNO) te huaihawtnain Burmese Embassy hmaah kawng zawh runpui neih a ni. Thalai mi 100 tha vel kan kal khawm a, kan thahnem hle. Hemi kawng zawhin a tum ber chu tun hnaia China sawrkarin Myit Sone Dam a siam tum chungchang duhloh entirna a ni.

  Holding Demonstration For Global Action Of Ethnic Kachin
In front of Burmese Embassy

Chawhnu dar 1:00 a pelh hret hnuin hunserh hman tan a ni a, tichuan Kachin unaute huaihawtna a nih angin Kachin unaute hnen atangin thu pawimawh puanna leh an hruaitute hnen atangin thuchah tawi ngaihthlak hmasak a ni. Tichuan ram leh hnam tana Martyr te chibai bukna leh hriatrengna lantirna hun hman a ni a, chumi hnuin pawl hrang hrang hruaitute hnen atangin thuchah tawi ngaihthlak a ni. Heng pawl hrang hrang Kachin, Chin, Karen leh NLD LA, BDC lam atanga hruaitu then khat te hnen atanga fuihna thuchah tawi ngaihthlak a ni bawk.

Fuihna thuchah tawi sawitute hian tun dinhmuna kan ramchhunga Myit Sone Dam Project chungchangah a taka tawpsan ngei tura an duh thu sawi a ni ber a. (U Thein Sein-a chuan a sawrkarna hun chhung ngeia tihtawp a tum thu sawi tawh mah se, tunah hian a takin an la tawp/chawlh san rih lo va, hmalakna a la kal zel tak avangin duhloh entirna hi neih chhunzawm zel a ni.) Tichuan U Thein Sein sawrkar hian Ethnic Group hrang hrang te nena tlang taka sawihona neih a that thu leh sawiho ngei tura ngenna a ni bawk. Chuti lo va anmahni thu thua sawrkar an kalpui zel dawn a nih chuan Democracy dik tak a nih loh thu te pawh sawi lan a ni. Pawl hrang hrang hruaitute hnen atang fuihna thu tha tak tak ngaihthlak a ni a, fuihna thu sawitute hian an sawi thiam bawk nen, hunserh kan hman zawh meuh chuan chawhnu dar 2:10 a pel dawrh mai. Tichuan hunserh kan hman zawhin kal khawm ho zawng zawng te a huhova thlalakna neih a ni bawk.

Tun tun Demonstration hian kan Kachin ram dung leh vanga rah tha chhuah se la, U Thein Sein sawrkarin Myit Sone Dam Project hi a takin titawp ngei se tih hi kan duh dan a ni. He Dam siam hi a puitlin vaih chuan a chheh vela cheng mipui tam takin harsatna an tawh mai bakah a ram pum huapin he harsatna hi a lo thleng thei a ni. Ramngaw a che reu ang a, tichuan sik leh sain awmze mumal a nei thei tawh lo bawk ang. A hlawkna zawng zawng lah chu China sawrkar leh sipai hruaituten an insem leh vek bawk dawn si nen , he Dam hi tipuitling lo tura hmalakna runpui neih hi keini thalai ho hian kan mawhphurhna lian tak a ni. He Dam hi puitling lo turin kan theih dan dan leh kan theihna zawn zawn atangin hma lak theuh kan tum dawn a ni. Tichuan kan ram leh hnam hi kan chhanhim thei ang.