Rinawmna
C.Lalmuankima
Rinawmna hi Pathianin lei mihringte a malsawmna min pek zawng zawng zinga pawimawh ber a ni awm e. Rinawmna tluka hringnun ze mawi leh tha, duhawm hi a awm chuang lo vang. Rinawmna hi mihring min timihringtu te pawh ti ila kan sawi sual tam lo vang.
Rinawmna chuan mihring hi mihring tak takah a siam a, a tizahawm a, midangte a tithlamuang a, a tihlim thin. Rinawmna hi Pathian malsawmna kan dawn zinga thil ropui ber a ni. Chuvangin kan nunah hian thil hlu a tling tak zet a ni. Rinawmna lo liama thil dang pawimawh hi a awm thei chuang lo vang. Sum leh pai aia hlu, rangkachak leh thil hlu tinreng aia hlu zawk, mihring tana lallukhum mawi ber leh ropui ber, mihring tana hriamhrei pawimawh ber mai chu Pathianin mihringte a pek rinawm theihna hi a ni.
“Rinawmna hlutzia i hriat duh chuan vawi khat chauh rinawm lovin han awm chhin teh” tiin thufing pakhat chuan a lo sawi a. A van thain a van dik teh reng em! Rinawmna hlutzia hrefiah tur hian vawi tam beih a tul lo va, vawi khat rinawm loh chhin chauh pawh hian a hrilhfiah em em a ni. Thil dangah hlawhtlinna ropui tak nei thei tur chuan hun leh tha senga vawi duai lo beih a lo tul te pawh a ni mai thei e, mahse rinawmna hluzia hrechiang tur erawh hi chuan vawi khat rinawm loh chhin hi a tawk em em a, a hrilhfiah chiang em em bawk.
Rinawmna hi mihring taksa pianphung, ruangam a lan dan atanga teh chi a ni lo va, chhungril atanga in tan a ni zawk. Hmeltha leh nalh tak tak te, taksa pianphung pawn lam lan dana zahawm leh mi hausa pui pui te pawh a rinawm loh theih a. Mahse pianphunga hmuhsitawm leh reithei zawk te nunah rinawmna a in tuh ngheh phawt chuan mi hausa pui pui te aiin an nun a duhawm zawk daih.
Rinawmna hi mihring zahawmna min siamsaktu a ni. Engtiang khawpa mi ropui leh thiltithei, engtiang khawpa mi hausa leh neinung, engtiang khawpa hmeltha leh zei, engtiang khawpa hriatna/thiamna sang tak nei ni mah la, i rinawm miau si loh chuan i zahawm lo hrim hrim. Chuvangin rinawmna hi mihring min tizahawmtu a ni a, khawvelah mi reithei leh berh chep ber pawh ni mah la, i rinawm phawt chuan mi hausa leh thiltithei, mi ropui leh mithiam rinawm si lote ai chuan i zahawm tawh hrim hrim a ni. Mihring hi a tawng apuiin mi zahawm tak a nih theih ngawt loh va, mihring nun vawng zahawmtu (zahawma siamtu) chu rinawmna a nih tlat avangin rinawmna hi a pawimawh a, mihring min tizahawmtu a ni. Kan hnam zahawm leh zahawm loh chu kan rinawm leh rinawm lohvah thui tak a innghat a ni.
Rinawmna chuan mahni himna, hmasialna leh lawmna a zawng lo va, thiantha leh unau pawh a dim chuang hek lo. Tawrh a tul hunah te, nghah a tul hunah te rinawm takin a tuar/nghak tang tang thin a, atawpah chuan a hlawhtling nge nge thin. Mahni sa himna duh vanga dawt var chhete sawi ai chuan thihna hial pawh lo thleng dawn mahse rinawm takin a tuar chhuak thin. Rinawmna chuan unau laina a duhsak chuang lo va, thiantha ber pawh a dim chuang hek lo. A nihna ang anga lantir hi rinawmnain a ken tel a mize mawi tak leh pawimawh tak a ni.
Rinawmna chuan mi hausa a nih vang ngawtin a tlawn huam chuang lo va, mi rethei a nih avangin a khawngaih hek lo; mi ropui leh fing a nih avangin a zah bik chuang lo va, mi te leh mawl zawk a nih avangin a hmusit hek lo bawk. Mi thiltithei a nih avangin a ngaisang bik chuang lo va, mi tlawm zawk a nih avangin a ngainep chuang lo bawk. Mi hausa leh mi rethei, mi fing leh mi mawl, mi lian leh mi te pawh ang khatin a dawr tawn vek a, duhsak bik a nei chuang lo va, a lama tang apiang erawh chu dik tak leh rinawm takin a dinchhuahpui thin.
Rinawmna hi kan Mizo Society leh chhungkuaah hian kan in elna kipui ber ni thei se a van tha dawn em! Hmasang piputen Zonunmawi chhawm nun nana inelna kipui atana an lo hmante zingah khan tlawmngaihna, huaisenna leh rinawmna te a ni thin a, heng pathum zingah hian rinawmna hi sawi nep theih a ni chuang bik hauh lo vang. Tlawmngai tur chuan huaisen a ngai a, huaisen tur chuan mahni thiltiha rinawm a ngai ve thung. Hmasang pipute nun kha kan thlir let chuan an rinawm em em a, thingfak pakhatin kawngkhar pui an do va, lo lamah nilengin an fehsan a; thil bo a awm ngai reng reng lo. Thil ruk te kha thil zahthlak tak a ni ringawt. Tunlai nun hi han chhut ve teh, tala lian pui pui pawhin kan in chhung bungrua a venghim zo tawh lo chu a nih ber hi maw(?) Rinawmna dik tak chu chhungril ber atanga lo irh chhuak a ni zawk a, chumi chhungril atanga lo chhuak chu a nghet a, a tlo fat tawh thin a ni.
Rinawmna hi a pung tam tak awma Bank-a sum kawl punna tha ber a ni. I thiltihna kawng engkima i rinawm tam poh leh i Bank-a sum kha a pung tam ting dawn tihna a ni. I rinawm leh rinawm loh azirin Bank-a i sum kawltir kha a pungin a punglo thei bawk. Chutiang bawkin i rinawm leh rinawm lohna khan i hmakhuaa i hlawhtlin leh hlawhchham tur pawh a hril thui hle a ni.
Rinawmna tello chuan khawvelah hian eng pawl mah hi a hlawhtling thei lo. Rinawm lohna avangin khawvela pawl lian leh ropui tak tak pawh an lo keh chhe rup rup tawh thin. Rinawm lohna avang bawkin khawvela lalram nei zau ber ber te pawh an lo keh chhe tawh thin bawk. Khawvela in nuam leh ropui berah inkhung mah ila, a chhunga chengte kan rinawm miau si loh chuan a van rapthlak dawn em... chu tluka lei hremhmun a awm chuang lo vang.
Rinawm lohna chuan nula leh tlangval inhmangaih ngawih ngawih te a thentir a, chhungkaw hlim thei tak pawh a chawk keh a; thiantha inngaina tak pawh a inthentir thin. Rinawmna erawh chuan pakhat leh pakhat inhmelma tawh pawh a suihkhawmtir a, rem takin a chuktuah thung. Rinawm lohna hi mihring nun min eichhetu a ni a, khawvela natna hri hlauhawm ber ai pawhin a hlauhawm zawk a ni. Rinawm lohna phenah hian hlemhletna te, eirukna te, tualthahna te a inzep tel duh chawk. Chuvangin rinawm lohna hi mihring min theh dere tu a ni.
Rinawmna hi chatuan nunna lallukhum neihna a ni. (Thup. 2:10). Ringtu kan ni a, kan Bible-in min kawhhmuh angin rinawmna hi nunna lallukhum neihna kawng awm chhun a ni a, kawng dang a awm lo. Chu nunna lallukhum nei thei tur chuan ka nitin nun kan hmannaah kan rinawm hmasak phawt a ngai a, thih thlenga rinawm a ngai a ni.
Rinawmnain khawvel hi a lei/hneh theih a, rinawm lohnain khawvel hi a hralh theih ve thung.
No comments:
Post a Comment