Zo Vapual

EU palaite nena inpawh taka inkawmna a nih thu pi Suu Kyi-in a sawi.

Kawlrama lo kal European Union (EU) vice Chairman ni bawk, Security Council-a thurawn petu ni bawk Mr.Robert Cooper leh a hote nena inhmuhna chu inpawh tak leh tlang taka inkawmna a ni tiin pi Suu Kyi chuan a sawi.

Mr.Robert Cooper rual hian Myanmar ram chungchanga palai David Lipman leh EU in Myanmar ram chungchanga a bik taka palai Piero Fassino te telna EU palaite chu nimin chaw hnu lam khan ama inah darkar khat chuang an inkawm zawh hnuin chanchinbu mite hnenah chuan pi Suu Kyi chuan a sawi a ni. 

Hemi chungchang a sawinaah hian NLD hmunpui rorel khawl atangin U Ohn Kyaing chuan ti hian a sawi, "Secretary chuan EU leh NLD inbiak pawhna hi tun hma atang khan a tha sa reng a, chuvangin thian tha leh thian tha inkara tun ang dinhmuna kan inhmuh pawh hian pakhat leh pakhat inpawh tawn takin leh mahni ngaihdan fel fai takin, tlang takin kan inhrilh bawrh bawrh thei a ni. Ani pawhin a hmuh dan chu tlang takin a sawi a, keini lamah pawh hmunpui rorel khawlin kan hmuh dan kan sawi bawk. He inkawmhona hi a tha thaw khat a, pakhat leh pakhat tlang taka kan inbiakna chuan nakin leh zelah pawh inlaichinna tha tak a hrin chhuah ngei a beiseiawm hle a ni tih te a ni a, a chip chiar zawkin kan sawi tawh lo mai ang a."

EU palaite nena inkawmna hun chhung hian hmunpui rorel khawlte mai bakah mipui thlan palaite pawh telin sawihona neih a ni. Hetia inhmuh khawmnaa hmunpui Chairman U Tin Oo thusawi chu U Ohn Kyaing chuan ti hian a sawi a, " Vice Chairman nena an sawihonaah khan General Secretary nen khan darkar hnih chuang an sawi dun avangin kimchang tak an sawi ang tih chu a rinawm........" 

EU palaite nena inkawmna, sawihona chungchangah U Nyan Win chuan ti hian a sawi a,,"Ka hmuh dan chuan kan ram Democracy chungchang leh Human Rights chungchang te hi kan zavaia mawhphurhna a ni a, kan tangrual tur a lawm, nimahsela, khawvelah hian hetianga pawl lian tak, EU palaite ngei maiin duh thawh taka an awmna hi kan tan hian a van nihlawhthlak em tih hi ka hmuh dan a ni. 

EU palai vice Chairman pawh ni bawk, Security Council thurawn petu ni bawk Mr. Robert Cooper leh a hote chu a vawi khatna atana kan ram an rawn zinnaah the Republic of the Union of Myanmar vice President U Tin Aung Myint Oo telin minister te chuan Napyidaw ah an hmu bawk a.

Chu mai ni lovin party hruaitute leh mi then khat te nen pawh an inhmu bawk a ni.

Thulakna : DVB