Zo Vapual

Zir hi zir miah loh aiin a hlawk

C. Lalmuankima

Newcastle, United Kingdom

“Eng zirnaah pawh hian hlawkna a awm vek a, ngai awhtir aiin dinhmun leh ngaihtuahna a tisang zawk hrim hrim a ni.”

Mihringten Pathian hnen atanga kan rochung tha ber ber te zinga mi chu finna, hriatna leh thiamna te hi an ni. Heng Pathian thil thlawnpek hlu tak hi miin a hluta a ngaih pawimawha a zir loh chuan ransa te angin mawl takin a awm thei a ni. Chuvangin miin zirna leh thiamna hi a ngaihhlut lohva a ngaih pawimawh loh chuan a dinhmun chawikangtu a nih theih laiin a dinhmun hnuk hniamtu a ni thei bawk a ni.

Photo: Google Image

‘Zirna leh thiamna chu hringnun nena inkungkaih a ni a, hmasawnna a ni.’ tiin John Dewey chuan a lo sawi angin hmasawnna thlenlo zirna leh thiamna a awm thei lo. A zirtuin a ngaih pawimawh azira hmasawn thei leh hmasawn lo thei a ni bawk. Thil reng reng chu kan ngaihhlut leh ngaihhlut loh azirin keimahniah hmasawnna min thlenin min thlen lo thei a ni.

Khawvela zirna leh thiamna tha ber berah (College leh University tha ber ber) indahin kai thei mah ila, a zirtu berin a zir miau si loh chuan zirna leh thiamna tha chuan hmasawnna a thlen mawh hle a, a zirtu hi an pawimawh hle a ni. Zir hi zir loh ai chuan a hlawk tawh hrim hrim a, hringnun hmasawnna min thlentu pawh zir thiamna hi a ni. Zir thiamna tel lo chuan mihring thluak hi mawlnain a khat a, chu zir thiamna chuan mihring thluak mawl tak chu silfaiin mawlna zawng zawng a um bo thin a ni.

Zirna chungchanga Mahatma Gandhi thu sawi tha ka tih deuh mai hi ka han zep tel teh ang. “Zirnain a tum ber chu mihring nungchang tha, zau leh puitling, mahnia intodelh thei chher chhuah a ni a, ziak leh chhiar thiamna mai a tawk lo va, kan mihring nun, taksa leh thlarau thlenga hrisel taka kan than chhoh hi a tum chu a ni. Zirna chuan mihring nun phungah kan awm dan tur mahni intodelh mai ni lovin, ram leh khawtlang leh kan mihringpuite tana mi tangkai kan nih theihna tur thlengin a huam a ni.” tih hi a ni. Chhungkua, kohhran leh khawtlang, ram leh hnam siam tha pha lo zirna leh thiamna chuan awmzia a nei lo va, zir loh nen a in ang reng a ni.

Certificate hlai tak phenah hian hringnun zirlai tam tak zir tur a awm a, thil tam tak a inphum tel tlat bawk. Ziaktu pakhat chuan, ‘Zirna azawnga hnuk fei/sei ber mai chu hringnun zirlai hi a ni…’ a lo ti hial reng a ni. Hringnun zirlai hi a zir dan kan thiam a pawimawh hle a, a zir dan kan thiam loh chuan thil tul lova inham tan reng palh a awl hle. Fiamthu thiam pakhat chuan, ‘Mi zawng zawng hi zirtawp niah kan thi vek dawn.’ a ti a, ngaihtuah chian chuan a sawi dik hle a ni. Kan sawi tawh angin hringnun zirlai hi a hnuk a fei em em a, kan thih hun hi kan zirtawp hun a tih theih a ni. Chuvangin hringnun zirlai kan laknaah pawh hian a zir dan kan thiam a pawimawh a, kan zir thiam dan azirin keimahniah hmasawnna min thlenin min thlen lo thei ve bawk.

Miin khawvel finna leh thiamna zawng zawng pawh zir chhuak vek mah sela, engtia nun dan tur nge tih hi a zir chhuah tel loh chuan a zirlaiah a failed hulhual a ni. Billy Graham khan heti hian a lo sawi a, “London-a University zirlaite hian thil engkim in zir thiam tawh a, nimahsela in zir thiam theih hauh loh chu engtia nun tur nge tih hi a ni.” tiin. Zirna azawnga pawimawh ber te zing ami engtia nun tur nge tih hi kan hringnunah hian kan zir tel loh chuan kan hringnun zirlaiah kan hlawhchham hulhual tihna a ni ang. Chuvangin zirna chuan kan hringnun khawsak dan phung thlengin a siam tha tel tur a ni. Mihring nunphung siam tha pha lo zirna leh thiamna chuan awmzia a nei lo va, hun tam tak senga hun khawh ralna mai a ni.

Zirna hian ngai awh lam aiin hmasawnna lamah min panpui thin a, zirna leh thiamna hmasawnpui lo kan nih chuan kan zirlaiah kan hlawhchham tihna a ni ang. Zir hi zir miah loh aiin a hlawk tawh hrim hrim a, chu aia hlawk lehzual lan chhuahna chu kan hringnunah hma kan sawnpui em tih hi a ni. Zirna leh thiamna sang tak nei mah ila, kan hringnunah hma kan sawnpui loh chuan awm ze nei lovin kan zir sang ve ringawt a ni ang. Zirna leh thiamna chuan kan thil thlir dan thlengin a thlak danglam thin tur a ni. Chumiah chuan zirna leh thiamna hlawkzia kan hre thiam taw hang. Chhungkua, kohhran leh khawtlang, ram leh hnam siam tha pha zirna leh thiamna hi a tlo ber zel a ni.