Zo Vapual

Thlarauvah awm rawh u (Pentikost Pual)

(Joh 4:24; Tirhkohte 2:1-13; Gal 5:16)

C. Lalmuankima
Newcastle, United Kingdom

Pentikost ni hlimawm chibai ka buk a che u. In awmna hmun theuhvah he hun pawimawh tak hi hlim taka in hman ka beisei bawk. He ni hi kan hriat theuh angin Isua a thia a thawhleha vana a lawn hnu ni sawmnganaa zirtirte hnena thil thleng a ni a, kohhran din tanna ni ti pawhin an koh thin a ni.

"Pathian chu Thlarau a ni; a chibai buktuten thlarau leh tih tak zetin chibai an buk tur a ni." Johana 4:24

Photo: Google Image

Zofaten Kristianna kum 100 chuang kan hmel hriat tawh hnu pawha kan thlarau chan sawngnawi tak sawi tur a la awm fo mai hian ngaihtuahna a ti tamin lung a tichhe hle a ni. Mi tam takin thlarau kan hmel hriat danah kan chiang thin lo ni tlatin a lang. Thlarau tih avanga ti deuh riai ruai leh eng emaw ni kan taksaa rawn lum deuh pup, tek deuh sawk, hit deuh chuai, nu deuh bulh, leh rim hial nei tur ang hrima kan rinna hian kan ngaihtuahna a hruai kawi thin hle a, nu deuh bulh bulha awm tumna hian min neihtir thin a ni. Chutiang anga nu deuh bulha awmte chu thlarau mi viau ta angah kan ngai leh ta nghal a, an thlarau chan kha a dik leh dik loh lam kan ngaihtuahpui thin lo bawk.

Pathian thuin awm thlarau chiam turin min ti lo va, thlarauva awm turin min ti zawk a ni (Joh 4:24). Hmelma hian va awm thlarau chiam tumna hmang hian min lo bum nasa thin khawp a, Lalpa Pathian thuah cheng lova a thu kal pela mahni awm thlarau rauva kan awm thin hi a pawi hle a ni. Hei hi Pathian thuin thlarauva awm tura min tih dan a ni hauh lo mai.

Johana lehkha thawn pakhatnaah khan heti hian a lo sawi a, "Duh takte u, thlarau nazawng ring suh u, amaherawhchu thlaraute chu Pathian laka mi an ni nge ni lo fiah rawh u...." (1 Joh 4:1) tiin. Johana hian thlarau chungchangah fimkhur taka ngaihtuaha fiah a pawimawhzia a sawi a, kan thlarau chan thin te hi Pathian lak atanga chhuak an ni nge ni lo tih fiah thin turin min fuih bawk a ni. A hnuai lama kan chhiar thlak zel chuan 'Thlarau engpawh Isua tan lo chu Pathian laka mi a ni lo ve....' tiin a sawi chhunzawm zel bawk a. Vawiina kan chan thlarau hi Lalpa laka mi a ni em? tih hi kan ngaihtuah tel fo a pawimawh hle ang.

Thlarau tih avanga nu bulh bulha hmuh tum leh chan tum tlata kan awm thin hi a tha lo hle a, a kawng kal lo hle bawk a ni. Kan tih dan dan hi thlarau hnathawhah kan puh mai a nih chuan a pawi hle ang. Thlarau Thianghlim chuan hna thawh dan a nei a, chu a hna thawh dan chu kan hriat thiam a pawimawh hmasa a ni. Awm thlarau tum chiamna hian Zofa kristianna hi min la chimbuai mek zel a, thlarau thianghlim hna thawh dan chungchangah kan chian hmasak phawt loh chuan mahni ngaihdan dana awm thlarauna ata hi kan chhuak lo hul hual ang. A nih chuan thlarau thianghlim hna thawh chu engnge ni ta ang le kan ti mai thei. Thlarau Thianghlim hian hna thawh dan chi hrang hrang a neih thu Bible-ah kan hmu a, chu mai bakah thlarau rah te pawh kan hmu a ni (Galatia 5:22,23).

Thlarau Thianghlim hna thawh tam tak sawi tur awmte zingah a then han la chhuak ila. Thlarau Thianghlim chu kan khawhar lai ber leh kan lungngaih laia min hnemtu a ni (Johana 14:15-18). A hnathawh dang leh chu kan chak loh lai leh engtia tawngtai tur nge tih kan hriat loh lai pawhin ani chuan rum sawi hleih theih lohvin min tawngtaisak thin a (Rom 8:26). A dang sawi tur a la awm teuh va, kha lam chu duh tawk rih ila. A nih chuan midang hnenah Thlarau Thianghlimin a hruai che tih engtinnge kan lantir theih ang kan tih chuan kan tih chuan kan awmdan leh chetzia, thiltih hmangin thlarau hruaia awm kan nih thu kan lantir thei a ni. Chu chu keimahni duh dan ni lovin thlarau rah chi hrang hrang hmangaihna te, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te, insumtheihna te hmang hian Pathian thlarauva hruai kan nihzia kan tilang thei a ni (Galatia 5:22,23). Thlarau Thianghlim chu tilungngai lo tur leh tlanna ni atana chhinchhiaha kan awm thu min hrilh bawk a (Eph 4:30).

Heng thlarau rah chi 9 te hi keimahniah kan neiha kan lantir chuan Thlarauvah awm rawh u tih ngai lovin Pathian thlarvauvah kan lo awm sa reng tawh tihna a ni. Awm thlarau chiam tum vanga thlarau rah chi 9 leh a hnathawh dan chi hrang hrang kal pel thak khawpa beih vak hi Pathian thlarauva awmna a ni lo va, chutiangah chuan hmelma Setana a inlar fo thin zawk. Chuvangin thlarauva awm dan awlsam ber mai chu a Thua awm kha a ni tawp mai a ni. Pathian chu a thuah a chen thin avangin a thua kan awm khan amahah kan cheng a, amaha kan chen avangin a thlarauvah kan awm nghal tihna a ni. Pathian chu ti riai ruai leh fiah lo riai ruaiin a mite hnenah a inpuang ngai lo, a inpuannaah chuan mimawl ber pawhin an hriatfiah theih turin a inpuang thin a ni. Mahni ngaihdana awm thlarau lova a thuah zawk kan chen fo hi a pawimawh ber a, chu chu thlarauva khata awmna pawh a ni. Thlarauva khat tur hian Thlarau Thianghlim kaihhruaina kan mamawh a, Pathian thlarau kaihhruaina tel lo chuan mahniin thlarauvah kan khat ngawt thei lo a ni tih pawh hi kan hriat a tha hle mai (Eph 5:18).