Zo Vapual

I Nu Chu….

C. Lalmuankima

Newcastle, United Kingdom

Thuhmahruai

Photo; Google Image 

In awmna hmun theuhvah Nute Ni hlimawm tak hi hlim taka in hman ka beisei a, duhsakna ka hlan a che u. Nute Ni pualin he thu ziak tawi hi ka han dah ve ang e. Nute hi an pawimawh em em mai a, an pawimawhzia pholang thei tura ka’n ziak chhuak thiam thin lo erawh a pawi ka ti hle a ni.

"Ka nu ziak leh chhiar thiam lo khan, a fate hi lehkhabuin a zirtir theih aia nasa mi zirtir a ni." (Cardinal Cracius)

Vawiina i nu hmangaihna ang hmangaihna hi khawvel hmun kir khawr berah pawh zawng mah la, i nu’n a hmangaihna che aia hmangaihna nasa hi i hmu chuang lo vang. Chuvangin i nu hmangaihna hi a chhanlet dan i thiam loh phawt chuan nakinah lungchhirin i la kun ngawih ngawih mai thei asin….??? Chutih hunah chuan koh kir leh tum mah la a sawt tawh lo vang a, inchhirin awmzia a nei tawh bawk lo vang. Vawiin thlenga 'Ka Nu' tia koh tur i la neih avang pawh khan Pathian hnenah lawmthu sawi mawlh mawlh ang che. Vawiin thlenga nangmah anga 'Ka Nu' tia koh tur neilote hian an nute an ngaih thinzia hnukulh teuhvin an sawi thin asin... Chuvangin 'Nu' koh tur i la neih avang pawh khan Pathian hnenah lawmthu sawi mawlh mawlh ang che.

I nu chu,….

I nu chu ziak leh chhiar a thiam lo a ni mai thei, mahse vawiin dinhmuna lehkha thiama siamtu che kha i nu asin.....!

I nu chu hriatnaah a lo tlachham deuh a ni mai thei, mahse amah anga hriatnaa i tlakchham hlauva a theih tawp chhuahtu kha i nu a sin.....!

I nu chu a lo pachhia a ni mai thei, mahse i ei tur neih loh hlauva a ei ai ai pawh petu che leh i puar loh hlauva amah pawh riltama awm fo kha i nu asin......! (I puar loh hlauva i tana riltama insiam thak thin kha i nu asin….!)

I nu chu a hriselna a lo tha tawh lo a ni mai thei, mahse a vanglai hun tha zawng zawng i tana hlan ral thaktu kha i nu asin......!

I nu chu a lo phunchiar deuh a ni mai thei, mahse nun kawng dik lo zawh hlauva i hma khaw thatna tur ngaitu leh zilh/fuih fotu che kha i nu asin....!

I nu chu a lo upain a ha a tha tawh lo a ni mai thei, mahse hmui phu hlarh hlarha i chaw ei tur te seh sawma barhtu che kha i nu asin......!

I nu chu tunlai mite angin a lo up-to-date lo a ni mai thei, mahse tunlai khawvel marphu a chet ruala che ve thei tura siamtu che kha i nu asin......!

I nu chu a lo upain a lo phunchiar deuh a ni mai thei, mahse i naupan laia dil chhut taka i thil zawh thin te dawhthei taka chhang thintu che kha i nu asin.......!

I nu lakah khan bat tam tak i nei tih hria la, a tana i tihsak theih aia tamin tihsak tum thin ang che.

Tlangkawmna

Nute Ni i tan malsawmin lo awm se la, i nu tan thil ropui leh tha ber ber tih sak thei lo mah la, i hmangaihna thu tal hi kumin Mother's Day present atan han hlan teh le. I nu khan i present ropui ber ber pek aiin i hmangaihna lantir fo kha a hlimna ber a ni thin asin! Kumin Nute Ni te i nu tan i hmangaihna thu kha i pe ve dawn lawm ni?